ŨNDŨ ŨTONYA KŨSINDA KĨMENA
2 | Ndũkeyĩĩvanĩsye
Kĩla Mbivilia Ĩmanyĩasya:
“Mũikeyĩĩvanĩsye ũthũku kwa ũthũku kwa mũndũ o na wĩva. . . . Na ethĩwa nĩvatonyeka, ngalĩ ĩ yenyu, ĩthĩwai na mũuo na andũ onthe. Mũikeyĩĩvanĩsye, . . . nũndũ nĩkũandĩkĩtwe, ‘“Ũĩvanĩsyo nĩ wakwa; ngaĩvanĩsya,” easya ũu Yeova.’”—ALOMI 12:17-19.
Kĩla Yĩthĩawa Ĩyonany’a:
O na kau ti ũthũku mũndũ kwĩw’a woo yĩla wavĩtĩw’a, Ngai ndendaa twĩyĩĩvanĩsye. Vandũ va ũu, atwĩkĩaa vinya tũendeee kũmĩĩsya nũndũ o mĩtũkĩ nũkũvetanga ũthũku w’onthe.—Savuli 37:7, 10.
Ũndũ Ũtonya Kwĩka:
Yĩla tweyĩĩvanĩsya, kĩmena nĩkyongelekaa. Kwoou yĩla mũndũ waũvĩtĩsya kana wakũũmĩsya, ndũkeyĩĩvanĩsye. Tata wĩsiĩĩe na ũyĩka ũndũ ũtonya kũete mũuo. Mavinda angĩ ndũũmĩaw’a mũno nĩ ĩvĩtyo yĩla wĩkĩtwe ethĩwa nĩwatw’a kũekana nayo. (Nthimo 19:11) Ĩndĩ o na vailye ũu, nĩvatonyeka mavinda amwe ũkethĩwa wĩ ũseo kwosa ĩtambya ya kũthĩnĩkĩa ũndũ ũsu. Kwa ngelekany’o, ethĩwa nĩweekwa ũndũ mũthũku mũno, no ũtw’e kũkũna livoti volisi kana mĩvĩanĩ ĩngĩ ya silikalĩ.
Mũndũ eyĩĩvanĩsya ethĩawa ayĩyĩũmĩsya we mwene
Nao nata ethĩwa ndũkwona ta vatonyeka ũkamantha mũuo na ũla ũkũvĩtĩsye? Kana nata ethĩwa nũtatĩte vyũ ũthĩnĩkĩe ũndũ ũsu nesa na vakaemela? Ndũkeyĩĩvanĩsye. Kwĩyĩĩvanĩsya no kũtume maũndũ mathũkĩĩa. Ĩndĩ kũlea kwĩyĩĩvanĩsya no kũũtetheesye kũsinda kĩmena. O na ĩngĩ, kwĩka ũu no kũũtetheesye ũkemanyĩsya kũmwĩkwatya Ngai athĩnĩkĩe ũndũ ũsu. Mbivilia yaĩtye: “Mũĩkĩĩe we, nake akeeka.”—Savuli 37:3-5.
No Wendeewʼe Nĩ Ii
MBIVILIA NĨALYŨLAA ANDŨ
Nokitĩaa Ũsili wa Katĩ
Rafika alikanile na kĩkundi kĩna kya andũ mamanthaa kũvĩndũa maũndũ nthĩ yoo nĩ kana kyũkite ũsili ũte wa katĩ. Ĩndĩ nĩwesie kũmanya kĩla Mbivilia yathanĩte ĩũlũ wa mũuo na ũsili wa katĩ yĩla Ũsumbĩ wa Ngai wĩsumbĩka.
MBIVILIA NĨALYŨLAA ANDŨ
Wendo No Ũkĩlye Vinya Kĩmena?
Ti ũndũ wĩ laisi kũkĩlya vinya kĩmena. Sisya wone ũndũ Mũyuti ũmwe na mũndũ ũmwe kuma Palestine mavotie vyũ kwĩka ũu.
