ŨNDŨ ŨTONYA KŨSINDA KĨMENA
3 | Vetanga Vyũ Kĩmena Kĩlĩkonĩ Kyaku
Kĩla Mbivilia Ĩmanyĩasya:
“[Alyũkai] kwa kwĩthĩwa na kĩlĩko kyeũ, nĩ kana mwĩyĩĩkĩĩthye inyw’ĩ ene kwenda kwa Ngai kũla kũseo na kwĩtĩkĩlĩka na kwĩanĩu.”—ALOMI 12:2.
Kĩla Yĩthĩawa Ĩyonany’a:
Ngai nĩwosaa kwa ũito mosũanĩo maitũ. (Yelemia 17:10) Tũyaĩle o kwĩvathana na ndeto kana meko mekwonany’a twĩ na kĩmena. Kĩmena kyumanaa na maũndũ ala me ilĩkonĩ sitũ na ngoonĩ sitũ. Kwoou no nginya tũvetange vyũ mosũanĩo onthe ala matonya kũtuma twambĩĩa kũmenana. Kwĩka ũu no kw’o kũtonya kũtuma ‘tũalyũka’ vyũ na tũisinda kĩmena.
Ũndũ Ũtonya Kwĩka:
Sũanĩa mũno maũndũ ala wĩsilasya ĩũlũ wa andũ angĩ, na mũno mũno andũ ma ũko ũngĩ kana ma nthĩ ĩngĩ. Kwekũlye-ĩ: ‘Nyie nĩmonaa ata? Nĩ kyaũ kĩtumaa nĩmona ũu? Nĩ kĩla nĩsĩ ĩũlũ woo, kana nĩ kĩla nĩsũanĩaa ĩũlũ woo? Ĩvathane na isese sya kũea ngewa, sinema, kana maũndũ ma kwĩtanĩthya meũtuma andũ methĩwa na kĩmena na ũng’endu.
Ndeto ya Ngai no ĩtũtetheesye kũvetanga kĩmena ilĩkonĩ na ngoonĩ sitũ
Ti laisi mavinda onthe kũmanya mosũanĩo maitũ nĩ maseo kana nĩ mathũku. Ĩndĩ Ndeto ya Ngai no ĩtũtetheesye “kũmanya mosũanĩo na kwenda kwa ngoo.” (Aevelania 4:12) Kwoou endeea kwĩmanyĩsya Mbivilia. Sianĩsya momanyĩsyo mayo na mosũanĩo maku, na ũyĩka kyonthe kĩla ũtonya ũlũnge mosũanĩo maku mosane na momanyĩsyo ma Mbivilia. Ndeto ya Ngai no ĩtũtetheesye kũsinda kĩmena, o na ethĩwa kĩmena kĩu kĩilye ta “ngome syĩ vinya” ilĩkonĩ na ngoonĩ sitũ.—2 Akolintho 10:4, 5.
No Wendeewʼe Nĩ Ii
MBIVILIA NĨALYŨLAA ANDŨ
“Nĩnaekie Kwĩthĩwa Nĩ Mũndũ ũte Tei”
Nĩ kyaũ kyatumie Sébastien Kayira atwʼa kũekana na ũngʼendu?
