O tondũ Yesũ wathanie, ũvoo mũseo wa Ũsumbĩ wa Ngai nĩũendeee kũtavanwʼa ĩũlũ wa nthĩ yonthe. (Mathayo 24:14) Ĩvuku ya Mbivilia ya Ndanieli yĩtũtavasya kana Ũsumbĩ ũsu nĩ silikalĩ ya Ngai. Kĩlungu kya 2 kya ĩvuku yĩu kĩ na wathani ũeleetye ũndũ mosumbĩ manene ma andũ maatĩanĩe, kuma ĩvinda ya Mbaviloni ya tene nginya ĩvinda yitũ. Kĩlungu kĩu nĩkĩeleetye maũndũ ala me mbee witũ. Mũsoa wa 44 waĩtye atĩĩ:

“Ngai wa ĩtunĩ akaũngamya ũsumbĩ ũtakaanangĩka tene na tene, o na ũsumbĩki wawʼo ndũkaatiĩwa ũko ũngĩ wa andũ; ĩndĩ ũkatilanga ilungu na kũmina mosumbĩ asu onthe, nawʼo ũkekalaa tene na tene.”

Wathani ũũ na ũngĩ mwingĩ wĩ Mbivilianĩ wonanasya kana Ũsumbĩ wa Ngai ũkaveta mosumbĩ ma andũ na ũiete mũuo na ngwatanĩo ĩũlũ wa nthĩ. Maũndũ makethĩwa mailyĩ ata ungu wa Ũsumbĩ wa Ngai? Ekai twone mawatho amwe ma kwendeesya mũno ala makilyĩ kwĩanĩa.

 Ũu wĩonanyʼa kana andũ makekala thayũ ũtathela na ũte na naĩ ĩũlũ wa nthĩ nzaũ! Na ũu nĩwʼo Mũmbi witũ wĩ wendo, Yeova Ngai, wathanĩte.

• KŨIKETHĨWA KAŨ ĨNGĨ

  Savuli 46:9: “[Ngai] nũtumaa makaũ mathela kũvika kĩtulu kya nthĩ; nũtũlaa ũta, na ĩtumo aitilanga ilungu; makasya ma kaũ nũvĩvasya na mwaki.”

  Kwasũanĩa ũndũ nthĩ ĩtonya kwĩthĩwa ĩilyĩ keka syĩndũ na ũtũĩka ũla ũtũmĩawa oyu kũseũvya mĩio ya kaũ no ũtũmĩwe maũndũnĩ matonya kũtethya andũ vandũ va kũtũmĩwa kũaa andũ! Watho ũsu ũkeanĩa ungu wa Ũsumbĩ wa Ngai.

• KŨIKETHĨWA MOWAU ĨNGĨ

  Isaia 33:24: “Na ũla ũtwĩe kwʼo ndakasya, Nyie nĩ mũwau.”

  Kwasũanĩa ĩũlũ wa nthĩ ĩte mũndũ ũwaĩte ũwau wa ngoo, kanza, ndetema, na kana ũwaĩte ũwau ũngĩ. Kũikethĩwa na vata wa sivitalĩ kana ndawa. Andũ onthe makeethĩwa na ũima wa mwĩĩ.

• KŨIKETHĨWA ŨNYIVU WA LĨU ĨNGĨ

  Savuli 72:16: “Kũkeethĩwa lĩu mwingĩ mũno wa mbaa ngetha nthĩ iĩmanĩ ĩũlũ.”

  Nthĩ ĩkeethĩwa na lĩu wĩanĩtye, na kĩla mũndũ akeethĩwa atonya kũũkwata. Nzaa na mowau ala maumanaa na kũya lĩu ũteanĩtye maikethĩwa vo.

• KŨIKETHĨWA WOO, KYEVA, NA KĨKWʼŨ

  Ũvuanʼyo 21:4: “[Ngai] akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”

Maũndũ asu onthe makeanĩa? O na kaũ andũ aingĩ no metĩkĩle kana maũndũ makeethĩwa me ma kwendeesya o tondũ maeleetwʼe Mbivilianĩ, nũndũ wa itumi syĩ kĩvathũkanyʼo aingĩ mayonaa ne laisi kwĩkala tene na tene. Ũsu ti ũndũ wa kũsengyʼa, nũndũ vai mũndũ waaona maũndũ asu mayĩanĩa ĩvinda o na yĩmwe ũndũ ũtonya kũtũelesya.

Andũ methĩĩtwe masumbĩkĩtwe nĩ naĩ na kĩkwʼũ, na maikwatwa nĩ woo, na mathĩna kwa ĩvinda yĩasa nginya ũkethĩa andũ aingĩ mayonaa ũu ta ũndũ. Ĩndĩ, maũndũ asu me kĩvathũkanyʼo vyũ na ũndũ Mũmbi witũ, Yeova Ngai, wavangĩte kwondũ wa andũ.

Nĩ kana Ngai atũtetheesye tũĩkĩĩe maũndũ onthe ala ũtwathĩte, aneenie ũũ ĩũlũ wa ndeto yake: “Ndĩkanzyokea mana, ĩndĩ ĩkeanĩsya ũndũ nendete, nayo ĩkaaĩla ũndũnĩ ũla namĩtũmĩe.”—Isaia 55:11.

Mbivilia ĩeleasya kana Yeova nĩ Ngai ‘ũtatonya kũneena ũvũngũ.’ (Tito 1:2) Nũndũ nũtwathĩte maũndũ asu maseo ma ĩvinda yũkĩte, nũseo naitũ tũkasũanĩa makũlyo aa: Nĩ ũndũ ũtonyeka andũ kwĩkala tene na tene ĩũlũ wa Nthĩ Nzaũ? Twaĩle kwĩka ata nĩ kana tũtetheke kumana na maũndũ asu Ngai ũtwathĩte? Nthĩnĩ wa ilungu ila iatĩĩe ĩkasetinĩ yĩĩ, nũũsoma maũndũ matonya ũkũtetheesya kũkwata mosũngĩo ma makũlyo asu.