Kwa ngelekany’o, mũndũ mũka wĩtawa Sally * kuma Amelika, nĩwaaisye syĩndũ mbingĩ yĩla kweethĩiwe na kĩuutani kĩnene mũno. Aĩtye atĩĩ: “Maũndũ ala mangwatie matumie nĩw’a nde na vinya wa kũendeea kũmĩanĩsya na mathĩna. Mĩthenya mingĩ nĩneew’aa ta nĩvikie mũthya na kwoou ndyenda kwĩyĩtũka.”

Thĩna ũngĩ ũtonya kũkwata mũndũ nĩ kũkw’ĩĩwa nĩ mũndũ wendete. Mũndũ mũka wĩtawa Janice, kuma Australia, easya: “Yĩla imwana syakwa ilĩ syakwie, maũndũ makwa mavalaanile vyũ nginya weethĩa no mũvaka nĩtate ũndũ ndonya nĩw’e kavaa. Namwĩsũvie Ngai namwĩa-ĩ: ‘Mwa, ndyĩsa kũmĩĩsya mbee wa vau! Eka ngome ndakokĩla ĩngĩ.’”

Nake Daniel nĩweewie woo mũno yĩla kĩveti kyake kyeethĩiwe kĩte kĩĩkĩĩku. Aĩtye atĩĩ: “Yĩla kĩveti kyakwa kyandavisye kana kĩthĩĩtwe kĩte kĩĩkĩĩku, neewie naũmĩa mũno ngoonĩ weethĩa nĩĩw’a ta natonywa na kavyũ ngoonĩ. Woo ũsu wekalile myei kauta ũyĩsa kũthela.”

Ĩkaseti yĩĩ ya Mũsyaĩĩsya nĩyonanĩtye kana nĩvatonyeka mũndũ akatanĩa kwĩkala thayũ o na yĩla

• Kweethĩwa na mĩisyo mĩthũku vyũ

• Mũndũ twendete wakw’a

• Ũla ũtwaanĩte nake weethĩwa ate mũĩkĩĩku

• Wawaa ũwau mũthũku

• Ũkwĩw’a ũyenda kwĩyĩtũka

Ekai yu twambe kwona ũndũ tũtonya kwĩka yĩla twakwatwa nĩ mĩisyo mĩthũku vyũ.