Makũlyo Kuma kwa Asomi Maitũ

Ala “mate etĩkĩli” Vaulo wawetie ĩandĩkonĩ ya 2 Akolintho 6:14 naaũ?

Ĩandĩko ya 2 Akolintho 6:14 yaĩtye: “Mũikovanĩw’e ĩsokinĩ yĩmwe na ala mate etĩkĩli.” Twasisya mĩsoa ĩla ĩthyũlũlũkĩte mũsoa ũsu, nĩtũkwona nesa kana Vaulo aneeneaa andũ mataĩ kĩkundinĩ kya Kĩklĩsto. Ũndũ ũsu nũkwetwe mbau nĩ mĩsoa ĩngĩ yĩ Mbivilianĩ, kũla Vaulo watũmĩie ndeto “ũte mwĩtĩkĩli” kana “mate etĩkĩli.”

Kwa ngelekany’o, Vaulo nĩwakanisye Aklĩsto nũndũ wa kũtwaa ana-a-asa moo kotinĩ masilĩlwe nĩ andũ “mate etĩkĩli.” (1 Akolintho 6:6) Mũsoanĩ ũsu, andũ mate etĩkĩli ala Vaulo wawetie nĩ asili ala meethĩawa kotinĩ wa Kolintho. Valũanĩ wa kelĩ ũla Vaulo waandĩkĩie kĩkundi kya Kolintho aisye kana Satani nĩweekĩĩte “mbindu ilĩko sya ala mate etĩkĩli.” Metho moo mavw’ĩkĩtwe na “kĩtambaa” ũkethĩa mayĩsa kwona ũvoo mũseo. Andũ asu mayoosete ĩtambya o na yĩmwe mamũthũkũme Yeova, na twĩasya ũu nũndũ Vaulo aĩ anasya ũũ: “Yĩla mũndũ wamwĩthyũũĩa Yeova, kĩtambaa kĩu nĩkĩvetawa.”—2 Akolintho 3:16; 4:4.

Andũ amwe mate etĩkĩli nĩmatũlaa mĩao kana makathaitha mĩvw’anano. (2 Akolintho 6:15, 16) Ĩndĩ ti onthe mavĩngaa athũkũmi ma Yeova. Kwa ngelekany’o, ve amwe mendeeaw’a nĩ ũw’o. Na aingĩ matwaanĩte na Aklĩsto, na nĩmeeyũmbanĩtye kũendeea kwĩkala namo. (1 Akolintho 7:12-14; 10:27; 14:22-25; 1 Vetelo 3:1, 2) Ĩndĩ o tondũ twoona, kw’onthe kũla Vaulo ũtũmĩĩte ndeto “mate etĩkĩli” eethĩawa aineenea andũ mataĩ kĩkundinĩ kya Kĩklĩsto, kĩla kyeethĩawa na andũ ala ‘mamũĩkĩĩe Mwĩaĩi.’—Meko ma Atũmwa 2:41; 5:14; 8:12, 13.

Mwolooto ũla wĩ nthĩnĩ wa 2 Akolintho 6:14 no ũtethye mũno Aklĩsto onthe, na mũno mũno ala meũmantha mũndũ wa kũtwaana nake. (Mathayo 19:4-6) Mũklĩsto wĩyumĩtye amũthũkũme Yeova na akavatiswa ndesa kwĩtĩkĩla kũtwaana na mũndũ ũte mwĩtĩkĩli, nũndũ andũ mate etĩkĩli methĩawa na mĩkalĩle, mĩvango, na mĩĩkĩĩo yĩ kĩvathũkany’o vyũ na ya Aklĩsto ma w’o.

Ĩndĩ nao nata amanyĩw’a ma Mbivilia ala mokaa maũmbanonĩ ma Kĩklĩsto? Kana nata atavany’a ala mate avatise? Mo no mewe ti etĩkĩli? Aiee. Andũ ala metĩkĩlĩte ũw’o na mekĩte maendeeo nĩ kana mavatiswe mayaĩle kwĩtwa andũ mate etĩkĩli. (Alomi 10:10; 2 Akolintho 4:13) Kwa ngelekany’o, Kolinelio eeawa nĩ ‘mũndũ wamũkĩaa Ngai na wamũthaithaa’ o na kau ndambĩte kũvatiswa.—Meko ma Atũmwa 10:2.

Ĩndĩ o na kau ũtao ũla Vaulo wanenganie nthĩnĩ wa 2 Akolintho 6:14 ndũkonetye atavany’a ala mate avatise, w’o nĩwĩthĩwa wĩ ũndũ wa ũĩ kwa Mũklĩsto kwĩvaany’a na kũtwaana na mũndũ ta ũsu? Aiee. Nĩkĩ? Nũndũ wa ũtao wĩ ũtheinĩ ũla Vaulo wanengie eĩtu-a-asa ndiwa. Aandĩkie: “Nĩ mũthasye kũtwawa nĩ ũla ũkwenda, ĩndĩ o nthĩnĩ wa Mwĩaĩi.” (1 Akolintho 7:39) Kwosana na ũtao ũsu, Aklĩsto ala avatise mekĩĩtwe vinya matwaane na o ala me “nthĩnĩ wa Mwĩaĩi.”

Syo ndeto “nthĩnĩ wa Mwĩaĩi” na “nthĩnĩ wa Klĩsto” syonanasya ata? Nthĩnĩ wa Alomi 16:8-10 na Akolosai 4:7, Vaulo nĩwawetie andũ maĩ “nthĩnĩ wa Klĩsto” kana “nthĩnĩ wa Mwĩaĩi.” Wasoma mĩsoa ĩsu, nũkwona ametie ‘atethya ma wĩa vamwe nake,’ ‘ala metĩkĩlĩtwe,’ ‘ana-a-asa endwa,’ ‘athũkũmi aĩkĩĩku,’ na ‘ngombo vamwe nake.’

Mũndũ atw’ĩkaa ‘ngombo nthĩnĩ wa Mwĩaĩi’ ĩndĩĩ? Nĩ yĩla weeka kĩla ngombo yaĩle kwĩka, nakyo nĩ kwĩlea mwene. Yesũ aisye: “Ethĩwa mũndũ o na wĩva nũkwenda kũngatĩĩa, nĩ elee mwene, na aikua mũtĩ wake wa mathĩna na ayĩendeea kũngatĩĩa.” (Mathayo 16:24) Mũndũ ambĩĩaa kũmũatĩĩa Klĩsto yĩla wenyivĩsya Ngai vyũ na eyumya amũthũkũme. Ĩtina wa ũu, nũvatisawa, na kĩu nĩkĩtumaa ethĩwa na ngwatanĩo nzeo na Yeova Ngai. * Kwoou ‘kũtwaana nthĩnĩ wa Mwĩaĩi’ kwonanasya kũtwaana na mũndũ wonanĩtye ũtheinĩ vyũ kana we nĩ mwĩtĩkĩli, kana kwa ndeto ingĩ, mũndũ wĩyumĩtye atw’ĩke “ngombo ya Ngai na ya Mwĩaĩi Yesũ Klĩsto.”—Yakovo 1:1.

Mũndũ ũendeee kwĩmanyĩsya Mbivilia na Ngũsĩ sya Yeova na wĩkĩte maendeeo nĩwaĩlĩte kũkathwa mũno. Ĩndĩ ndethĩawa anamba kwĩyumya kana kwĩlea amũthũkũme Yeova thayũnĩ wake w’onthe. Ethĩawa o aendeee kwĩka moalyũku. Kwoou atanamba kũsũanĩa kũlika mũtwaanonĩ, ethĩawa aĩle kwĩka moalyũku onthe ala maĩle nĩ kana eyumye amũthũkũme Ngai na aivatiswa.

Kwoou we Mũklĩsto nĩwaĩlĩte kwĩvaany’a na mũmanyĩw’a wa Mbivilia ũkwoneka ekĩte maendeeo, e na kĩeleelo kya kweteela nginya avatiswe nĩ kana matwaane? Aiee. Ethĩwa mũmanyĩw’a wa Mbivilia nĩwĩsĩ ve Mũklĩsto ũkwenda kũtwaana nake, na ũyĩthĩa nĩwĩsĩ ndesa kwĩka ũu ate o avatisiwe, no emanyĩsye e na kĩeleelo kĩtaĩle.

Mavinda maingĩ mũndũ ethĩawa e mũtavany’a ũte mũvatise kwa kavinda o kanini, na ĩndĩ aivatiswa. Kwoou ũtao ũsu wa kũtwaana kana kũtwawa o nthĩnĩ wa Mwĩaĩi nĩwosanĩte na kĩlĩko. Ĩndĩ nata ethĩwa mũndũ nũvikĩtye myaka ya kũtwawa kana kũtwaana, aeetwe nĩ asyai Aklĩsto, nĩwĩthĩĩtwe ayũka maũmbanonĩ ma Kĩklĩsto kwa myaka kauta, na ethĩĩtwe e mũtavany’a? Ethĩwa ũu nĩ w’o vailye, nĩ kyaũ kĩmũsiĩĩe kwĩyumya amũthũkũme Yeova? Nĩkĩ ũtindĩaa kũkũĩĩsya kũvatiswa? No kwĩthĩwa e na nzika? O na kau tũitonya kwasya kana we ti mwĩtĩkĩli, tũyĩsa kwasya kana e “nthĩnĩ wa Mwĩaĩi.”

Nĩtũunĩkaa yĩla twaatĩĩa ũtao wa Vaulo. (Isaia 48:17) Ethĩwa andũ elĩ mekwenda kũtwaana nĩmeyumĩtye mamũthũkũme Yeova, mũtwaano woo ũkeethĩawa wĩ mũlũmu na wĩ na mũsingi mũseo nũndũ me na ngwatanĩo nzeo nake. Maatĩĩaa myolooto ĩvw’anene ya mwĩkalĩle na methĩawa na mĩvango ĩvw’anene. Na ũu nũtumaa methĩwa na mũtwaano mũseo vyũ. O na ĩngĩ, ‘kũtwaana nthĩnĩ wa Mwĩaĩi’ kwonanasya kana nĩtũlũmanĩtye na Yeova, na ũu nũtũeteae moathimo matakathela, nũndũ Yeova nĩ “mũĩkĩĩku kwa andũ ala aĩkĩĩku.”—Savuli 18:25, The Holy Bible in Current Kikamba Language.

[Maelesyo ma Kwongeleela]

[Visa]

Yeova nĩ “mũĩkĩĩku kwa andũ ala aĩkĩĩku”