MĨTHATA (mĩtamaiũ) yĩanaa yĩmilanĩtye na yĩ na makundo. Nũndũ wa ũu, ndyonekaa yĩ myanake wamĩsianĩsya na ĩla mĩkũũ mĩnene ya Levanoni. Ĩndĩ mĩthata yĩ ũtonyi mwingĩ wa kũmĩĩsya mavinda ma mbua na thano. O na mĩthata ĩmwe yĩ na vakuvĩ myaka 1,000. Yĩ mĩi ĩlikĩte nthĩ mũno na nĩyo ĩmĩtetheeasya kũthongooa o na ethĩwa ĩtina nĩyanange vyũ. Ethĩwa mĩi ĩsu ti myũmũ, mũtĩ ũsu ndũema kũthongooa.

Mũtumĩa wa tene, Yovu, nĩweesĩ nesa ki kana o na akatw’ĩka nũkũkw’a ndaema kwĩsa kũthayũũka. (Yovu 14:13-15) O na nĩwatũmĩie ngelekany’o ya mũtĩ kwonany’a ũndũ waĩ na mũĩkĩĩo mũlũmu kana Ngai ndaema kũmũthayũũkya. No kwĩthĩwa atũmĩie ngelekany’o ya mũthata. Aisye: “Ve wĩkwatyo ũndũ wa mũtĩ, ethĩwa ũkatemwa, ũkathongooa ĩngĩ.” Ĩla mbua yesa kũinga ĩtina wa mũnyao, mĩi ya kĩtina kyũmũ kya mũthata no yumye tũthongoo, ĩkĩthongoosya “mbonge ta mũtĩ mwĩũ.”—Yovu 14:7-9.

O tondũ mũĩmi wĩthĩawa na mea ma kwona mũthata mũteme ũithongooa, Yeova Ngai eteele na mea ĩvinda yĩla ũkathayũũkya athũkũmi make. (Mt. 22:31, 32; Yoa. 5:28, 29; Meko 24:15) Mwa tũkatana ta kĩ ĩla tũkethĩwa tũithokya ala makathayũũkw’a na tũyona o namo maitanĩa kwĩkala thayũ ĩngĩ!