Tũngaa Mũvea Nũndũ wa Ũlau wa Yeova

THAŨKA

YEOVA nĩ Ngai mũlau. (Yak. 1:17) Wũmbi wake kuma kũya ĩũlũ ndatanĩ nginya kũũ nthĩ isesinĩ nũmũtaĩaa nũndũ wa ũlau wake.—Sav. 65:12, 13; 147:7, 8; 148:3, 4.

Mũandĩki ũmwe wa Savuli nĩwendeeiw’e mũno nĩ ũlau wa Mũmbi wake nginya atila wathi akathĩĩe mawĩa make. Kwasoma Savuli ya 104 wone kana o naku ndwĩĩw’a take. Mũandĩki ũsu aisye: “Ngamwinĩa Yeova o yĩla nĩ thayũ: ngaina ngĩkatha Ngai wakwa o yĩla nĩĩkalaa.” (Sav. 104:33) We wĩ na wendi ta ũsu?

YEOVA NĨWE NGELEKANY’O ĨLA NZEO VYŨ YA ŨLAU

Yeova endaa twĩthĩwe twĩ alau take. O na nũtũtavĩtye nĩkĩ nũseo twĩthĩwe twĩ alau. Kwoona ũndũ wamũveveee mũtũmwa Vaulo: “Meaĩe ala me na ũthwii wa nthĩ ĩno, maikekathĩĩe, o na maikekwatye ũthwii ũla wanangĩkaa, ĩndĩ mekwatye Ngai, ũla ũtũnengae syĩndũ syonthe na wingĩ, tũtanaw’e nĩsyo; kana mekae nesa, kana methĩwe athwii ma kwĩkaa nesa, methĩwe meyũmbanĩtye kumya syĩndũ syoo, methĩwe me na mũamba wa ngoo na ala angĩ; meyiĩe ene mwambĩlĩlyo mũseo wa ĩvinda yĩla yũkĩte, nĩ kana makwate ũla thayũ wa tene na tene, naw’o nĩ thayũ wa w’o.”—1 Tim. 6:17-19.

Ĩla Vaulo waveveewe aandĩkĩa Akolintho valũa wa kelĩ, nĩwoonanisye nesa woni ũla mũndũ waĩle kwĩthĩwa naw’o ĩũlũ wa kũnengane. Aandĩkie ũũ: “Kĩla mũndũ nĩeke o tondũ utw’ĩte ngoonĩ yake: ti kwa kulea kwenda, kana kwa kũingĩĩw’a: nũndũ Ngai endete mũndũ ũnenganae na ũtanu.” (2 Ako. 9:7) Amina kũandĩka ũu nĩwawetie ala matethekaa nũndũ wa ũlau. Mbee, nĩ ala manengwa nũndũ methĩawa meanĩw’a mavata moo. Kelĩ, nĩ ala manengane nũndũ nĩmakwataa moathimo maingĩ mũno ma kĩ-veva.—2 Ako. 9:11-14.

Vaulo aminĩĩie kũandĩka kĩlungu kya nyanya na kya kenda kya valũa ũsu wa kelĩ kwa kũweta ũndũ ũla mũnene vyũ wonanasya kana Ngai nĩ mũlau. Aisye: “Ngai natũngĩwe mũvea kwondũ wa mũthĩnzĩo wake ũtaweteka.” (2 Ako. 9:15) Mũthĩnzĩo ũsu wa Yeova nĩ ta ũtalo w’onthe wa ũseo ũla we mwene wĩkĩte andũ make kwĩsĩla vala ve Yesũ Klĩsto. Nĩ mũnene mũno ũkethĩa vai mũndũ ũelesya nesa vyũ na ndeto ũseo waw’o.

Tũtonya ata kũtũnga mũvea kwondũ wa maũndũ onthe ala Yeova na Mwana wake matũnengete vamwe na ala matwathĩte? Nzĩa ĩmwe nĩ kwa kwĩyumya ũndũ tũtonya tũtũmĩe ĩvinda yitũ, vinya witũ, na syĩndũ ila twĩ nasyo ũthaithinĩ wa Yeova.—1 Mav. 22:14; 29:3-5; Luka 21:1-4.

Ũndũ Amwe Maumasya Mĩvothi Kwondũ wa Wĩa wa Nthĩ Yonthe

O tondũ Aklĩsto ma ĩvinda ya mũtũmwa Vaulo meekaa, ũmũnthĩ Aklĩsto aingĩ ‘nĩmaiaa’ kĩndũ kana makavangĩĩa mbesa siana ũndũ mũna na maisyĩkĩa ĩsandũkũnĩ ya kĩkundi yĩla yĩandĩkĩtwe, “Wĩa wa Nthĩ Yonthe.” (1 Ako. 16:2) Kĩla mwei, ikundi nitũmaa mbesa isu ovisinĩ wasyo wa ũvonge. O na no ũtũme mĩvothi yaku mwene ovisinĩ wa ũvonge wa Ngũsĩ sya Yeova, ũla ũũngamĩe nthĩ yenyu. Ethĩwa nũkwenda kũmanya vala waĩle kũtũma mĩvothi ĩsu, neena na ovisi wa ũvonge. No ũkwate namba sya ovisi wa ũvonge nthĩnĩ wa www.pr418.com. Mĩvothi ĩla ũtonya kũtũma ĩmwe kwa ĩmwe nĩ:

MĨVOTHI ĨLA YUMAW’A VATE MŨVANGO WA KŨTŨNGĨWA

Ĩĩ nĩ mĩvothi ĩla mũndũ ũtonya kumya atũmĩĩte kaati sya vengi. Movisinĩ amwe ma ũvonge andũ nĩmaumasya mĩvothi ĩsu kwĩsĩla kĩsese kya jw.org kana kĩsese kĩngĩ kĩla kĩtĩkĩlĩtw’e.
Mĩvothi ya mbesa na syĩndũ ingĩ ta mbete, mbangili, kana syĩndũ ingĩ sya thooa mũnene. Andĩka valũa ũeleetye kana waumya mĩvothi ĩsu ũte na mũvango wa kũtũngĩwa ĩngĩ.

MĨVOTHI ĨTONYA KŨTŨNGĨWA ŨLA UMĨTYE

Ĩĩ nĩ mĩvothi ya mbesa ĩtonya kũtũngĩwa ũla waumya ethĩwa nũkwenda.
Andĩka valũa ũeleetye kana no ũtũngĩwe mĩvothi ĩsu wamyenda.

NZĨA INGĨ SYA KUMYA MĨVOTHI

O vamwe na kumya mĩthĩnzĩo ya mbesa na syĩndũ ingĩ sya thooa mũnene, ve nzĩa ingĩ ũtonya kũtũmĩa nĩ kana ũtetheesye wĩa wa Ũsumbĩ nthĩ yonthe. Nzĩa isu nĩsyonanĩtw’e vaa ĩtheo. Ũtanamba kũtw’a nĩ nzĩa yĩva katĩ wa isu ũkwenda kũtũmĩa kumya mĩvothi, neena na ovisi wenyu wa ũvonge nĩ kana ũmanye nĩ nzĩa syĩva itũmĩawa nthĩ yenyu. Nũndũ kĩla nthĩ yĩ mĩao yĩ kĩvathũkany’o na nzĩa syĩ kĩvathũkany’o sya kumya koti, nũseo ũkamba kũneena na andũ ala me na ũtũĩka ĩũlũ wa mĩao na ĩũlũ wa kumya koti ũtambĩte kũnyuva nzĩa ĩla ũũtũmĩa kumya mĩvothi.

Inisualenzi (insurance): Ii nĩ mbesa sya litaya, venzeni (pension), kana sya inisualenzi ila mũndũ ũandĩkaa onanĩtye ikanengwa ovisi wa ũvonge wa Ngũsĩ sya Yeova ĩtina wa kũlitaya kana kũkw’a.

Mbesa syĩ Akaondinĩ (bank accounts): Ii nĩ mbesa syĩ akaondinĩ ila mũndũ ũtonya kũandĩkĩthya syĩnengwa ovisi wa ũvonge wa Ngũsĩ sya Yeova kwosana na mĩao ya vengi sya kwoo.

Nyũmba Kana Kĩtheka: Ĩĩ nĩ mĩvothi ĩla mũndũ ũtonya kũnenga ovisi wa ũvonge wa Ngũsĩ sya Yeova. Yaĩle kwĩthĩwa ne nyũmba kana kĩtheka kĩtonya kũthoow’a. No avange kumya ate na mũvango wa kũtũngĩwa ĩngĩ, kana ethĩwa nĩ nyũmba ya kwĩkala, no aandĩke onanĩtye kana akw’a, ĩkeethĩwa yĩ ya ovisi wa ũvonge wa Ngũsĩ sya Yeova.

Wĩlũ (wills and trusts): Malĩ kana mbesa nitonya kũandĩkĩthw’a syĩnengwa ovisi wa ũvonge wa Ngũsĩ sya Yeova. Mũndũ no eke ũu kwa kũandĩka valũa wosanĩte na mĩao wonanĩtye kana ovisi wa ũvonge nĩw’o ũkatiĩwa malĩ ĩtina wa kũkw’a. Mũvango ũũ no ũolange koti ũla mũndũ waĩle kũĩva.

Nĩ kana mũndũ aumye mĩvothi atũmĩĩte nzĩa isu, nĩ ũndũ wa vata akavangĩĩa tene kĩla ũkaumya. Nĩ kana andũ mamanye ũndũ matonya kumya mĩvothi matũmĩĩte nzĩa ta isu, mbulosua yĩtawa Charitable Planning to Benefit Kingdom Service Worldwide nĩyumĩtw’e kwa kĩthyomo kya Kĩsũngũ na kya Spanish. Kĩeleelo kya kumya mbulosua ĩno nĩ kwony’a andũ nzĩa syĩ kĩvathũkany’o ila matonya kumya mĩthĩnzĩo kana makonany’a ũndũ syĩndũ syoo syĩtũmĩwa makw’a. Ũvoo ũla wĩ nthĩnĩ wa mbulosua ĩno no wĩthĩwe ũtatonya kũtũmĩwa vyũ nthĩ yenyu nũndũ kĩla nthĩ yĩthĩawa na mĩao yayo ya kumya koti kana mĩao ĩngĩ. Kwoou, ĩtina wa kũsoma mbulosua ĩno waĩlĩte kũneena na ala mesene na mĩao kana maũndũ ma kũĩva koti. Andũ aingĩ nĩmatũmĩĩte nzĩa ila syonanĩtw’e mbulosuanĩ ĩsu kũtetheesya ũthaithi witũ, wĩa wa kũtavany’a, na wa kumya ũtethyo ĩla kweethĩwa na mĩisyo, na ũu nũtumaa maolangwa koti. Ethĩwa nthĩ yenyu yĩ na mbulosua ĩsu na nũkwenda kũmĩsoma, kũlya mũandĩki wa kĩkundi kyenyu aũnenge.

Nĩ kana ũkwate ũvoo mwingangĩ, no ũneene na ovisi wa ũvonge ũla ũũngamĩe nthĩ yenyu.

No Wendeewʼe Nĩ Ii

Ũndũ Ũtonya Kũtũmĩa Kĩsese Kitũ Kumya Mĩvothi

Sisya wone nzĩa syĩ kĩvathũkany’o kĩsesenĩ ila ũtonya kũtũmĩa kumya mĩvothi.

MŨSYAĨĨSYA (ĨKASETI YA KWĨMANYĨSYA)