Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Ĩla mũminũkĩlyo wĩvika, nĩ kyaũ kĩkathela?

Syĩndũ imwe ikathela nĩ silikalĩ sya andũ, kaũ na ũsili ũte wa katĩ, ndĩni ila imũvĩtĩsye Ngai na ikasya andũ, na andũ ala makwataa mbau maũndũ ma nthĩ ĩno.—1/5, ĩth. 3-5.

Ngoki wa Makoki ũla ũwetetwe ĩvukunĩ ya Esekieli nũũ?

Ngoki wa Makoki ti Satani, ĩndĩ nũtonya kwĩthĩwa ne mbaĩ ikethĩwa syĩ ngwatanĩo, ila ikatata kũmina andũ ma Ngai ĩtina wa ũla thĩna mũnene kwambĩĩa.—15/5, ĩth. 29-30.

Nĩ maũndũ meva thanthatũ matonya kũtetheesya mũndũ akũe e o mũtanu?

Mbivilia ĩtwĩkĩĩte vinya twĩthĩwe na (1) wĩnyivyo, (2) mĩvaka ĩla tũkwĩka maũndũ, (3) woni mũseo, (4) ũlau, na (5) tũituma ndũũ na andũ, na (6) tũitũngaa mũvea. Kũatĩĩa maũndũ asu no kũtũtetheesye tũkũe twĩ atanu.—1/6, ĩth. 8-10.

Syama sya Yesũ syoonanisye ata kana nĩ mũlau?

Ĩvinda yĩla waĩ alũsinĩ Kena, nĩwavĩndũie lita ta 380 sya kĩw’ũ syatw’ĩka mbinyu. Ĩvinda yĩngĩ nĩwaĩthisye andũ mbee wa 5,000. (Mt. 14:14-21; Yoa. 2:6-11) Mavinda asu elĩ oonanisye kana aĩ mũlau ta Ĩthe.—15/6, ĩth. 4-5.

O na kau twĩ andũ me na naĩ, twĩsĩ ata kana nĩ ũndũ ũtonyeka tũkamwendeesya Ngai?

Aũme ta Yovu, Loto, na Ndaviti nĩmavĩtisye. Ĩndĩ nĩmeeyumĩtye kũmũthũkũma Ngai, nĩmeetĩkĩlile mavĩtyo moo, na meeka moalyũku. Nũndũ wa ũu, Ngai nĩwendeeiw’e nĩmo. O naitũ no tũmwendeesye.—1/7, ĩth. 12-13.

Andũ onthe ala mekwatanĩtye na ndĩni sya ũvũngũ makooawa ĩla Mbaviloni Ĩla Nene ĩkethĩwa ĩyanangwa?

Ti ta vakethĩwa vailyĩ ũu. Kwosana na ĩandĩko ya Nzekalia 13:4-6, no kwĩthĩwa atongoi amwe ma ndĩni sya ũvũngũ makaikola na maikaĩa vyũ kana maaĩsa kwĩkwatany’a nasyo.—15/7, ĩth. 15-16.

Nĩkĩ Mbalaka waisye ethi kũkita ethĩwa Ndevola nũkũthi nake?

Mbalaka aĩ na mũĩkĩĩo. Vandũ va kũvoya Ngai amwongele mĩio ya kaũ, endaa ethĩwe na mũthũkũmi wa Ngai, ũla weetawa Ndevola, nĩ kana amwĩkĩe vinya vamwe na aũme make ma kaũ. (Asi. 4:6-8; 5:7)—1/8, ĩth. 13.

Nĩ maũndũ amwe meva Mũklĩsto ũtonya kũvindĩĩsya?

Mũklĩsto no avindĩĩsye syĩndũ ila Yeova woombie, Ndeto yake mbeveee, mũthĩnzĩo wa mboya, na wovosyo.—15/8, ĩth. 10-13.

Kwĩsũvĩana na itindo nthũku kũkonanĩtye ata na kwĩvaany’a?

O na kau nĩtũkuaa nesa andũ ala mataatĩĩaa mĩao ya Ngai, Ndeto ya Ngai nĩtũvatĩte kwĩvaany’a na mũndũ ũteyumĩtye amũthũkũme Ngai na ũte mũĩkĩĩku kwake, kana ũtaatĩĩaa myolooto yake. (1 Ako. 15:33)—15/8, ĩth. 25.

Mũĩkĩĩo wa Vetelo wambie kwonza ata, na eekie ata aũlũlũmĩlya ĩngĩ?

Mũtũmwa Vetelo aĩ na mũĩkĩĩo na nĩkyo kĩtumi waendie vala ve Yesũ akinyĩle kĩw’ũnĩ. (Mt. 14:24-32) Ĩndĩ ĩla woonie kĩseve nĩwakwatiwe nĩ wia. Na ĩndĩ atũnga kĩlĩko kyake vala ve Yesũ na eetĩkĩla amũtethye.—15/9, ĩth. 16-17.

Ĩandĩko ya Meko ma Atũmwa 28:4 yaĩtye kana andũ ma Melita moonaa mũtũmwa Vaulo ta mũaani. Nĩkĩ moonaa ũu?

No methĩwe masũanĩaa kana Vaulo aũmiwe nĩ nzoka nũndũ ĩla ngai nga yeetawa Dike ya ũsili wa katĩ yakwete kũĩvanĩsya.—1/10, ĩth. 9.

Twĩĩmanyĩsya kyaũ ĩla ngewanĩ ĩeleetye ũndũ Matha wavĩngĩĩsiwe nĩ maũndũ maingĩ?

Mũthenya ũmwe Matha akwatanie mũno ayĩua lĩu mũseo. Yesũ nĩwoonanisye kana mwĩĩtu-a-inyia nĩwanyuvie kĩlungu kĩla kĩseo kwa kũmwĩthukĩĩsya. O naitũ twaĩle kwĩsũvĩa tũiketĩkĩlye maũndũ mate vata matũvĩngĩĩse ĩla tũkwĩka maũndũ ma kĩ-veva.—15/10, ĩth. 18-20.