Wathani wa 4. Andũ Matendete Andũ Moo ma Mũsyĩ

“Andũ makeethĩwa . . . mate na wendo.”—2 TIMOTHEO 3:1-3.

● Chris athũkũmanaa na kĩkundi kĩmwe kĩ North Wales, kĩla kĩtetheeasya andũ ala meekwa syĩko sya ũng’endu nĩ andũ moo ma mũsyĩ. Aĩtye atĩĩ: “Nĩngũlilikana mũndũ mũka ũmwe wookie avũĩtwe akaũmĩw’a mũno ũkethĩa o na ndimũmanya. Aka angĩ namo methĩawa maũmĩĩtw’e mũno ngoonĩ ũkethĩa o na mayenda kũkĩlya metho maũsisye.”

MAŨNDŨ ALA MEKĨKĨTE MEONANY’A ATA? Nthĩnĩ wa nthĩ ĩmwe ya Africa, vakuvĩ mũndũ mũka 1 katĩ wa 3 nĩwatũmĩiwe naĩ maũndũnĩ mekonetye kũmanyana kĩ-mwĩĩ e mũnini. Ũkunĩkĩli ũngĩ ũla weekiwe nthĩ ĩsu woonanisye kana mũndũũme 1 katĩ wa 3 onaa vate ũthũku aũme kũvũa iveti syoo. Ĩndĩ ũu ti kwasya kana no aka me oka mekawa syĩko sya ũng’endu mĩsyĩnĩ. Kwa ngelekany’o, nthĩ ya Canada, vakuvĩ aũme 3 katĩ wa 10 nĩmakũnĩtwe kana makekwa maũndũ angĩ mathũku nĩ iveti syoo.

ALA MAVĨNGAA MAKOTHAA KWASYA ATA? Kuma tene, andũ methĩĩtwe mayĩkwa syĩko sya ũng’endu mĩsyĩnĩ. Kĩla kĩ vo nĩ kana ĩvindanĩ yĩĩ syĩko isu syonekaa ta mbingĩ nũndũ nineeneawa mũno kwĩ tene.

WONI ŨSU NĨ WA W’O? Myakanĩ ya mĩtũkĩ, andũ nĩmethĩĩtwe maimanyĩthw’a yĩla kwaumĩla syĩko sya ũng’endu mĩsyĩnĩ. Ĩndĩ kũmanyĩthw’a syĩko isu syaumĩla nĩkũtumĩte ioleka? Eka vyũ! Vandũ va ũu, maũndũ mekĩte kũthũkĩĩa.

WE WĨONA ATA? Syo ndeto ila syĩ ĩandĩkonĩ ya 2 Timotheo 3:1-3 niendeee kwĩanĩa? Mo andũ aingĩ nĩmaekete kwony’a andũ moo ma mũsyĩ wendo wa w’o ũla maĩle kwĩthĩwa naw’o?

Wathani wa katano ũla tũendeee kwona ũianĩa ũkonetye nthĩ ĩno tũtwĩe. Kwaeka twone kĩla Mbivilia ĩwetete ĩũlũ wa ũndũ ũsu.

[Maelesyo Makuvĩ]

“Syĩko sya ũng’endu nthĩnĩ wa mũsyĩ nĩ ũmwe katĩ wa maũndũ mathũku mũno ma ũtũli wa mĩao, ala mekawa na andũ mailea kũkũna livoti. Ũkunĩkĩli wonanĩtye kana aka aingĩ no maũmĩw’e nĩ aũme moo mavinda 35 mayĩsa kũtw’ĩka nĩmakũna livoti volisi.”​—MŨNEENI WA MŨNDŨMŨKA WA WALES DOMESTIC ABUSE HELPLINE.