Mbivilia Nĩalyũlaa Andũ

NĨ KYAŨ kyatumie mũndũ ũmwe wathaũkaa kalata na waĩ kĩng’ei aekana na kĩmanyĩo kĩu na avĩndũa mwĩkalĩle wake? Soma wone kĩla waĩtye.

“Nĩnendete Mũno Mbalasi Sya Mathaũ.”​—RICHARD STEWART

ASYAIWE MWAKA WA: 1965

NTHĨ ĨLA WUMĨTE: JAMAICA

ĨVINDA ĨVĨTU: AĨ MŨTHI WA KALATA NA KĨNG’EI

KWĨANA KWAKWA: Neanĩie kĩsio kĩ na andũ aingĩ ngya kya Kingston, kĩla nĩkyo taoni ĩla nene ya Jamaica. Andũ aingĩ mayeethĩawa na wĩa na ũng’ei weethĩawa wĩ mwingĩ. Nĩkweethĩawa na ikundi sya ing’ei na syatumaa andũ mekala na wia. Vakuvĩ kĩla mũthenya nĩneew’aa wasya wa mavuti.

Inyia-akwa nĩweekĩa kĩthito kingĩ nĩ kana atũsũvĩe nĩ na mwanake mũinawa o vamwe na mwĩĩtu wa mwaitũ. Nĩwaĩkĩĩthisye kana nĩtwakwata kĩsomo kĩseo. Ndyendete sukulu, ĩndĩ nĩnendete mũno mbalasi sya mathaũ. Mavinda amwe nĩnatĩaa sukulu na ndithi ngeloele iisindana. O na nĩnatwaaa mbalasi.

Ĩtina wa kavinda, nĩnambĩĩe kũtũmĩa ĩvinda yingĩ ndyũtha kalata kakonetye mbalasi sya mathaũ. Nĩnambĩĩie kwĩthĩwa na mwĩkalĩle mũthũku, o na nĩnakomaa na aka aingĩ. Nĩnanyusaa vangi na kũyĩa andũ nĩ kana nĩkwate mbesa sya kũendeesya mwĩkalĩle wakwa. Nĩneethĩawa na mavuti maingĩ, ĩndĩ nĩnĩw’aa mũyo nũndũ vai mũndũ naaũaa yĩla twooyaa.

Mũthya, nĩnesie kũkwatwa nĩ volisi na noovwa yela nũndũ wa maũndũ ala neekaa. Namina kũthaw’a, nĩnaendeeie na ũng’ei ũla watumĩte novwa. O na eka ũu, neekie kũthũkĩĩa. O na kau mũndũ anzisya oonaa nĩ mũuu, naĩ mũndũ ũtethukĩĩasya andũ angĩ, ũthataa mĩtũkĩ, na mũng’endu. Ndyathĩnĩkĩaa andũ ala angĩ.

ŨNDŨ MBIVILIA YAALYŨLILE MWĨKALĨLE WAKWA: Ĩvindanĩ yĩu yonthe naendeee na maũndũ asu, inyia-akwa nĩweemanyĩisye Mbivilia na atw’ĩka Ngũsĩ ya Yeova. Nĩnoonie moalyũku maseo ala weekĩte na nendeew’a nĩ ũndũ ũsu. Nĩnendie kũmanya kĩla kyatumie aalyũka, na kwoou nambĩĩa kwĩmanyĩsya Mbivilia na Ngũsĩ.

Nĩneethĩie kana momanyĩsyo ma Ngũsĩ sya Yeova me kĩvathũkany’o na ma ndĩni ila ingĩ, na kana maũndũ onthe ala mamanyĩasya nĩmosanĩte na Mbivilia. Noyo ndĩni ĩla neesĩ ĩtavanasya nyũmba kwa nyũmba, o tondũ Aklĩsto ma tene meekaa. (Mathayo 28:19; Meko ma Atũmwa 20:20) Ndyaaĩthĩwa na nzika kana nĩnakwatĩte ndĩni ĩla ya w’o yĩla noonie ũndũ mendanĩte mo ene kuma ngoonĩ.—Yoana 13:35.

Kwosana na maũndũ ala neemanyĩasya Mbivilianĩ, nĩnamanyie kana nĩnaĩlĩte kwĩka moalyũku manene thayũnĩ wakwa. Nĩneemanyĩisye kana Yeova Ngai nũmenete ũlaalai, na ethĩwa nĩngwenda kũmwendeesya, yaĩ no nginya nĩekane na imanyĩo ila syavukasya mwĩĩ wakwa. (2 Akolintho 7:1; Aevelania 13:4) Nĩnakiitiwe ngoo mũno yĩla neemanyĩisye kana meko makwa no mamũthatye Yeova kana makamũtanĩthya. (Nthimo 27:11) Kwoou nĩnatwie kũeka kũnyw’a vangi, naeka kũtũmĩa mavuti, na natata ũndũ ndonya nĩthĩwe na nguma nzeo. Ĩndĩ ũalyũku ũla waĩ vinya mũno kwakwa kwĩka, nĩ kũekana na mwĩkalĩle mũthũku na kũtha kalata.

Mbeenĩ, ndyendaa anyanyawa maimanya kana nĩneemanyĩasya Mbivilia na Ngũsĩ sya Yeova. Ĩndĩ woni wakwa nĩwaalyũkile vyũ yĩla nasomie Mathayo 10:33, vala Yesũ waĩtye atĩĩ: “Mũndũ o na wĩva ũla ũngaĩaa mbee wa andũ, o nakwa ngamũkaĩa mbee wa Asa wakwa ũla wĩ ĩtunĩ.” Ndeto isu nĩsyanzukumie natavya anyanyawa kana nĩneemanyĩasya Mbivilia na Ngũsĩ. Ũndũ ũsu nĩwamaseng’isye mũno. Mayaĩkĩĩaa kana mũndũ takwa no ethĩwe ayenda kũtw’ĩka Mũklĩsto. Ĩndĩ nĩnamatavisye kana ndyendaa o na vanini kũendeea na mwĩkalĩle wakwa wa tene.

MOATHIMO ALA NĨKWATĨTE: Inyia wakwa nĩwatanie mũno yĩla woonie nambĩĩa kwĩkala kwosana na myolooto ya Mbivilia. Yu ndathĩnĩkaa mũno ayona ta ngwĩka maũndũ mathũku. Nĩtũneeneaa ũndũ ũla wa vata vyũ ũtũkwatanĩtye, naw’o nĩ ngwatanĩo yitũ na Yeova. Mavinda amwe, nasũanĩa maũndũ ala neekaa navu tene, wĩthĩaa o na ndikũĩkĩĩa moalyũku ala Yeova ũndetheesye ngeanĩsya. Yu ndyĩthĩawa na mea ma kũsyokea mwĩkalĩle mũthũku kana wendi ũla naĩ naw’o wa kũtw’ĩka mũthwii.

Kethĩwa ndyaaĩtĩkĩla kwĩmanyĩsya Mbivilia, oyu nĩthĩwa nĩ mũkw’ũ kana nĩ yela. Ĩndĩ yu nĩ na mũsyĩ mũseo na wĩ na ũtanu. Nĩndanĩaa mũno kũmũthũkũma Yeova Ngai vamwe na kĩveti kyakwa, kĩla kĩngwataa mbau mũno, na mwĩĩtu witũ, ũla wĩthĩawa e mwĩwi mũno. Nĩmũtũngĩaa Yeova mũvea nũndũ wa kũmbĩtĩkĩlya nĩthĩwe katĩ wa ana-a-asa na eĩtu-a-asa Aklĩsto ala mendanĩte mũno. O na nĩnĩtũngaa mũvea mũno nũndũ ve mũndũ weekĩĩie kĩthito amanyĩsye ũw’o ũla wĩ Mbivilianĩ. O nakwa nĩnendeeaw’a nĩ kũtũmĩa myanya ĩla nĩ nayo kũtetheesya angĩ mamanye kĩla Mbivilia ĩmanyĩasya. Na mũno mũno nĩndũngĩaa Yeova Ngai mũvea nũndũ wa ũseo wake wĩ wendo ũla watumie angusya kwake.

 [Visa ĩthangũnĩ ya 11]

“Neemanyĩisye kana meko makwa no mamũthatye Yeova kana makamũtanĩthya”

[Visa ĩthangũnĩ ya11]

Nĩ na kĩveti kyakwa na mwĩĩtu witũ

[Visa ĩthangũnĩ ya 11]

Nĩnoonie moalyũku maseo ala inyia-akwa weekĩte