“Ũvoo Ũũ Mũseo wa Ũsumbĩ Ũkatavanw’a”

“Na ũvoo ũũ mũseo wa Ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya ũivika.”—MATHAYO 24:14.

Kĩla kyonanaw’a Nĩ Ndeto sya Yesũ: Luka, ũla nĩ ũmwe wa aandĩki ma Mavuku ma Ũvoo Mũseo, aisye kana Yesũ “nĩwalikile ndũanĩ na motũinĩ aitavany’a na kũnyaĩĩkya ũvoo mũseo wa Ũsumbĩ wa Ngai.” (Luka 8:1) O nake Yesũ mwene aisye: “No nginya nĩtavany’e ũvoo mũseo wa Ũsumbĩ wa Ngai ndũanĩ ila ingĩ o nasyo, nũndũ natũmiwe kwondũ wa ũu.” (Luka 4:43) Atũmie amanyĩw’a make makatavany’e ũvoo mũseo taoninĩ na ndũanĩ, na ĩtina esa kũmeaĩa atĩĩ: “Mũkeethĩwa mwĩ ngũsĩ syakwa . . . kũvika itulu sya nthĩ.”—Meko ma Atũmwa 1:8; Luka 10:1.

Ũndũ Aklĩsto ma Mbee Meanĩisye Kĩu: Amanyĩw’a ma Yesũ nĩmeekie ũndũ wameaĩe na mĩtũkĩ mate kwananga ĩvinda. Mbivilia yaĩtye atĩĩ: “Kĩla mũthenya ĩkalũnĩ na nyũmba kwa nyũmba maendeea kũmanyĩsya mate kũeka, na kũnyaĩĩkya ũvoo mũseo ĩũlũ wa Klĩsto.” (Meko ma Atũmwa 5:42) Wĩa wa kũtavany’a watethaw’a nĩ onthe kĩkundinĩ, ĩndĩ ti o kĩkundi kĩna kya andũ. Mũsomi ũmwe wa maũndũ ma isitoli wĩtawa Neander aisye atĩĩ: “Celsus, ũla waĩ mũndũ wa mbee kũandĩka avĩngĩte Ũklĩsto, ndaĩkĩĩaa kwona atumi ma ngũa, aseũvya ma ithuma, atumi ma iatũ, na andũ angĩ moonekaa mate asomu, maitavany’a ũvoo mũseo na kĩthito.” Nake mũsomi ũngĩ wĩtawa Jean Bernardi, ĩvukunĩ yake yĩtawa The Early Centuries of the Church, aandĩkie ũũ: “[Aklĩsto] maaĩle kumaala na maineena na andũ onthe kĩla vandũ. Yĩthĩwe nĩ nzĩanĩ, taoni, kũla kwĩthĩawa andũ aingĩ na mĩsyĩ. Na maaĩle kwĩka ũu methĩwe nĩmekũthokw’a, kana maikũthokw’a . . . . Nginya itulunĩ sya nthĩ.”

Naaũ Maatĩĩaa Kĩu Ũmũnthĩ? Mũthembi ũmwe wa ĩkanisa ya Anglican aĩtye atĩĩ: “Kwĩthĩwa ndĩni ite kwosa kwa ũito wĩa wa kũtavany’a na kũmanyĩsya nĩkw’o kũtumĩte andũ maendeea naĩ kĩ-veva ũmũnthĩ.” Nake José Luis Pérez Guadalupe nĩwaandĩkie ĩũlũ wa mawĩa ma makanisa ma Evangelical na Adventist, ĩvukunĩ yake yĩla yĩtawa Why Are the Catholics Leaving? Aisye kana “maitavanasya nyũmba kwa nyũmba.” Ĩndĩ asyokie asya kana Ngũsĩ sya Yeova “nĩmethĩawa na mũvango mũseo wa kũtavany’a nyũmba kwa nyũmba.”

Mũsomi wĩtawa Jonathan Turley nĩwawetie ũndũ ũngĩ mũseo ĩvukunĩ yĩtawa Cato Supreme Court Review, ya 2001-2002. Aisye atĩĩ: “Yĩla waweta ĩsyĩtwa Ngũsĩ sya Yeova, kĩla kyũkaa kĩlĩkonĩ kya andũ aingĩ saa o isu nĩ atavany’a mathokeaa andũ mĩsyĩ kwoo masaa o na ethĩwa nĩ meva. Ngũsĩ sya Yeova iyonaa kũtavany’a nyũmba kwa nyũmba o ta wĩa wa kũtavya andũ angĩ ĩũlũ wa mũĩkĩĩo woo, ĩndĩ nĩ wa vata mũno nthĩnĩ wa kwaka mũĩkĩĩo woo ene.”

[Ĩsandũkũ]

We Nĩwamanya Naaũ Me na Ũvano wa Aklĩsto ma W’o?

Kwosana na Maandĩko ala maneenewa ilungunĩ ii, we wĩona naaũ me na ũvano wa Ũklĩsto wa w’o? O na kau ũmũnthĩ kwĩ ndĩni na ikundi sya andũ ngili mbingĩ, ila syĩyĩtaa sya Kĩklĩsto, ndũkolwe nĩ kĩla Yesũ watavisye aatĩĩi make. Ameie atĩĩ: “Ti kĩla mũndũ ũmbĩtaa, ‘Mwĩaĩi, Mwĩaĩi,’ ũkalika Ũsumbĩnĩ wa ĩtu, ĩndĩ no ũla wĩkaa kwenda kwa Asa wakwa ũla wĩ ĩtunĩ.” (Mathayo 7:21) Kũmanya ala mekaa kwenda kwa Asa ũmũnthĩ, kana kwa ndeto ingĩ ala me na ũvano wa kwĩthĩwa Aklĩsto ma w’o, na ĩndĩ ũitw’a kũthaithaa namo, no kũtume wĩsa kũkwata moathimo ma tene na tene ungu wa Ũsumbĩ wa Ngai. Twĩũthangaasya ũkũlye Ngũsĩ sya Yeova ila inakũnengie ĩkaseti yĩĩ, iũmanyĩsye maũndũ maingangĩ ĩũlũ wa Ũsumbĩ ũsu wa Ngai na moathimo ala ũkaete.—Luka 4:43.