Nĩ Andũ Onthe Ala Meyĩtaa “Aklĩsto” Methĩawa Me Aklĩsto ma W’o

ŨMŨNTHĨ kwĩ Aklĩsto meana ata? Ĩvuku yĩmwe yĩtawa Atlas of Global Christianity, yoonanisye kana mwaka wa 2010 kwaĩ na Aklĩsto vakuvĩ mbilioni 2.3 ĩũlũ wa nthĩ yonthe. O na ĩngĩ yasyokie yoonany’a kana Aklĩsto asu onthe maendaa makanisanĩ me kĩvathũkany’o mbee wa 41,000, na kĩla yĩmwe yĩmanyĩasya kĩvathũkany’o na yĩla yĩngĩ, na maatĩĩaa mĩao yĩ kĩvathũkany’o ya mwĩkalĩle. Ivathũkany’o isu syonthe sya ndĩni sya “Kĩklĩsto” nitumĩte amwe molanĩlw’a o kana makatũlĩka ngoo. Nĩmatonya kwĩkũlya, ‘Yo onthe ala meyĩtaa Aklĩsto nĩ Aklĩsto ma w’o?’

Kwaekai tũkunĩkĩle ũndũ ũũ kwa nzĩa yĩ kĩvathũkany’o. Mũndũ wĩ kyalonĩ nĩwendekaa avika mũvakanĩ aĩkĩĩthye kana we nĩ mwĩkali wa nthĩ ĩla wumĩte. O na ĩngĩ, nĩwendekaa onany’e syĩndũ itonya kwonany’a we nũũ. Syĩndũ isu nĩ ta kĩvandĩ, kana passport. O ta ũu, Mũklĩsto wa w’o nĩwaĩle kwĩka maũndũ maingangĩ ala mekũĩkĩĩthya kana we nĩ Mũklĩsto wa w’o, eka o kwasya we nũmũĩkĩĩaa Yesũ. Ve kĩndũ kĩngĩ kyendekaa kya kĩkũĩkĩĩthya ũndũ ũsu. Kĩndũ kĩu nĩ kyaũ?

Ndeto “Mũklĩsto” yambĩĩie kũtũmĩka ĩvinda ĩkuvĩ ĩtina wa mwaka wa 44 ĩtina wa Klĩsto. Mũandĩki wa Mbivilia Luka aisye atĩĩ: “Kũu Andiokia nĩkw’o amanyĩw’a, matongoew’e nĩ Ngai, mambĩĩie kwĩtwa Aklĩsto.” (Meko ma Atũmwa 11:26) Kwoou ala meetawa Aklĩsto maĩ amanyĩw’a ma Klĩsto. Nĩ kyaũ kĩtumaa mũndũ ethĩwa e mũmanyĩw’a wa Yesũ Klĩsto? Ĩvuku The New International Dictionary of New Testament Theology yaĩtye atĩĩ: “Mũndũ enda kwĩthĩwa mũmanyĩw’a wa Yesũ aĩle kwĩyumya vyũ na ngoo yonthe . . . thayũnĩ wake w’onthe.” Kwoou, Mũklĩsto wa w’o nĩ ũla ũatĩĩaa momanyĩsyo na mĩao ya Yesũ o na kwekala ata, nũndũ nĩwe wambĩĩisye Ũklĩsto.

Nĩ ũndũ ũtonyeka kwona andũ ta asu katĩ wa andũ aingĩ ala meyĩtaa Aklĩsto ũmũnthĩ? Yesũ aisye nĩ kyaũ kĩkatuma andũ mamanya aatĩĩi make ma w’o? Nĩtũũkũthokya wone ũndũ Mbivilia ĩsũngĩĩte makũlyo asu. Ilungunĩ ila iatĩĩe, nĩtũkwĩmanyĩsya maũndũ atano Yesũ wawetie ala maĩ matetheesye andũ kũmanya aatĩĩi make ma w’o. Nĩtũkwona ũndũ Aklĩsto ma ĩvinda ya atũmwa moonanisye maũndũ asu. Na tũisyoka twone naaũ ũmũnthĩ meanĩĩtye maũndũ asu, katĩ wa andũ aingĩ ala maasyaa kana mo nĩ Aklĩsto.