JONATHAN, ũla ũsyaĩwe Amelika nĩ asyai maumĩte Korea, nĩwamenawa * nũndũ wa mbaĩ yake ĩla waĩ mũnini. Aendee kwĩana, nĩwamanthaa vala ũtonya kwĩkala ateũmenwa nũndũ wa wũmbo wake na mbaĩ yake. Nĩwatw’ĩkie ndakĩtalĩ mũsyĩnĩ ũmwe wĩ ngalĩko ya ĩũlũ ya Alaska, Amelika, vala awau aingĩ ala waiitaa meethĩawa mavw’anene nake. Eesilasya kana o na kau kũndũ kũu kwĩ iuutani syĩ mbevo mbingĩ, syĩ kavaa kwĩ kũmenwa.

Woni wake nĩwalyũkile ĩvinda yĩmwe ĩla waiitaa mũndũ mũka ũmwe waĩ na myaka 25. Ĩla mũwau ũsu wambĩĩie kũvuũka, nĩwamũsyaisye Jonathan na amũtavya kyuo kĩthũku kĩla kyoonanisye ũndũ wamenete andũ ma Korea. Ũndũ ũsu wamũlilikanilye Jonathan kana kũthama na kũvulana na andũ ala mavw’anene nake kũyaĩ kũtuma esiĩanĩa na kĩmena.

Maũndũ asũ mamũkwatie Jonathan monanĩtye vyũ ũndũ nthĩ yĩilyĩ. Kĩmena kĩ kĩla vandũ ĩũlũ wa nthĩ.  No ũndũ ũmwe na kwasya kana vala ve andũ ve kĩmena.

Andũ aingĩ mayendete kĩmena, ĩndĩ kĩendee kwongeleka. Ũsu nĩ ũndũ ũsaanĩtye. Vatonyeka ata kĩndũ kĩkethĩwa kĩmenetwe mũno wĩana ũu na kĩyĩthĩwa o kĩendee kwongeleka? Vate nzika, andũ aingĩ ala matendete kĩmena maimanyaa kana mekyo. We nũtonya kwĩthĩwa ũilyĩ ũu?

Twĩthĩwe nĩtwĩsĩ kana tũyĩsĩ, ti ũndũ wĩ laisi kũmanya ethĩwa twĩ na kĩmena ngoonĩ. Mbivilia yaĩtye ũũ ĩyĩĩkĩĩthya ndeto isu: “Ngoo nĩ ngengani kũvĩtũka syĩndũ syonthe.” (Yelemia 17:9) Kwoou no twĩkenge na kwasya nĩtwendete andũ onthe. Kana no twambĩĩe kwĩtetea tũyasya twĩ na kĩtumi kĩseo kya kũvũthya andũ ma mbaĩ imwe.

Kũsũanĩa ngelekany’o ĩno nĩkũtonya kũtũtetheesya tũmanye ethĩwa nĩtwĩthĩawa na kĩmena: Twasye wĩsĩlĩte vandũ ve kĩvindu kingĩ ũtukũ. Na ĩndĩ ũyona anake elĩ ũtamesĩ mokĩte kũkomana naku. Meoneka me na vinya na ũmwe woo nĩtaũkwete kĩndũ.

No ũsũanĩe anake asũ nĩmatonya kũkwĩka naĩ? Ethĩwa ve ũndũ mũthũku waaũkwata, nĩvatonyeka ũkona ve vata wa kwĩkala wĩ metho. Ĩndĩ w’o ũndũ ũsu waũkwatie nĩwaĩle kũtuma wĩsilya anake asu elĩ ta matonya kũkwĩka naĩ? Ĩkũlyo yĩngĩ ya vata nĩ yĩĩ: Ũtonya kũsũanĩa anake asu nĩ ma mbaĩ yĩva? Ũndũ wasũngĩa ĩkũlyo yĩu no kwonany’e ethĩwa wĩ na kĩmena kĩana ũndũ mũna.

Tũkaneena tũteũvitha kĩndũ, ithyonthe no twasye nĩtwĩthĩawa na kĩmena kĩana ũndũ mũna ngoonĩ sitũ. O na Mbivilia nĩwetete kĩmena kĩna kĩthĩawa na andũ onthe. Yaĩtye ũũ: “Andũ masiasya wũmbo.” (1 Samueli 16:7, The Holy Bible in Current Kikamba Language) Nũndũ ithyonthe twĩ mũtuo wa kũsilĩla andũ kwosana na wũmbo woo, na mavinda maingĩ ũndũ ũsu ũituma twĩka maũndũ mathũku vyũ, no twĩkũlye-ĩ, tũtonya kwĩka ata tũkavetanga kĩmena ngoonĩ sitũ? Na nĩvatonyeka tũkesa kwĩkala nthĩ ĩte kĩmena?