ŨVOO WA KWONGELEELA
Kũsinda Kĩmanyĩo kya Kwĩkwatanga Mamutha ma Ũsyai
Kwĩkwatanga mamutha ma ũsyai nĩ kana wĩanĩsye wendi wa kũkoma na mũndũ, nĩ kĩmanyĩo kĩtamwendeeasya Ngai, kĩla kĩtonya kũtuma kĩlĩko kya mũndũ kĩvuka, kana kĩkatuma ethĩwa ayĩsũanĩĩa o we mwene mavinda onthe. Mũndũ ũla wĩ na kĩmanyĩo kĩu no ambĩĩe kwona andũ ala angĩ o ta syĩndũ ũtonya kũtũmĩa eanĩsye wendi wa kũkoma na mũndũ ũngĩ. Mũndũ ũsu no ambĩĩe kwona kũmanyana kĩ-mwĩĩ ta nzĩa o ya kwĩtanĩthya na ya kwĩanĩsya wendi wa kĩ-mwĩĩ, vandũ va kwona ũndũ ũsu ta nzĩa ya kwonany’a wendo katĩ wa andũ elĩ matwaanĩte. Ĩndĩ kwĩanĩsya wendi ũsu kũimũtethya. Vandũ va ũu, kĩmanyĩo kyu kĩkaa kwongeleela wendi wa mũndũ wa kũtũmĩa mamutha ma mwĩĩ, vandũ va kũmoaa nĩ kana evathane na “ũlaalai, na ũvuku, na mĩmeo mĩthũku.”—Akolosai 3:5.
Mũtũmwa Vaulo aandĩkie ũũ: “Endwa, twĩthesye ene ũvuku w’onthe wa mwĩĩ na wa ngoo, tũkĩanĩsya ũtheu nthĩnĩ wa kũmũkĩa Ngai.” (2 Akolintho 7:1) Ethĩwa nĩ ũndũ wĩ vinya mũno kwaku kũatĩĩa ndeto isu, ndũkakw’e ngoo. Mavinda onthe Yeova ethĩawa ‘eyũmbanĩtye kũekea’ na kũtetheesya andũ. (Savuli 86:5; Luka 11:9-13) Vate nzika, ethĩwa nũkwĩw’a ngoo yaku ĩikũsilĩla, na nĩwĩyumĩtye vyũ kũekana na kĩmanyĩo kĩu, o na kau mavinda kwa mavinda nũtonya kwĩthĩa ũkĩsyokeie, ũu wĩonany’a kana nũenda kwĩka kĩla kyaĩle. O na ĩngĩ, lilikana kana “Ngai nĩ mũnene kwĩ ngoo sitũ, na nĩwĩsĩ maũndũ onthe.” (1 Yoana 3:20) Ĩla Ngai watũsisya ndonaa o naĩ sitũ syoka; ĩndĩ nũeleawa nĩ maũndũ onthe ala matũkonetye. Kwĩthĩwa na ũmanyi ũsu nĩkũtumaa atwĩthukĩĩsya e na ĩnee ĩla twamwĩsũva atwĩw’ĩe tei. Kwoou, o tondũ kana kaendaa kwĩ ĩthe ĩla ke thĩnanĩ, ndũkanoe nongi nĩ kũmũvoya Ngai kwa wĩnyivyo na kĩthing’ĩĩsyo, nake akaũnenga wasya mũtheu wa ngoo. (Savuli 51:1-12, 17; Isaia 1:18) Ĩndĩ nĩwaĩle kwosa matambya mana kwosana na mboya syaku. Kwa ngelekany’o, no nginya wĩkĩe kĩthito kya kwĩvathana na itindo nthũku na kwĩloela kana kũsoma maũndũ o na meva mavuku makonetye ũlaalai. *
Ethĩwa wĩĩw’a ũyĩemwa nĩ kũekana na kĩmanyĩo kĩu, tata mũno ũneene na mũsyai waku Mũklĩsto, kana mũnyanyau mũimu kĩ-veva na ũkũthĩnĩkĩaa. *—Nthimo 1:8, 9; 1 Athesalonika 5:14; Tito 2:3-5.
^ kal. 2 Nthĩnĩ wa mĩsyĩ mingĩ, kombiũta yiawa vala mũndũ ũtonya kwĩthĩwa enekee ĩla ũkũmĩtũmĩa, nĩ kana ndĩkese kũtũmĩwa naĩ. O na ĩngĩ, mĩsyĩ ĩmwe nĩthooaa vulongulamu ya kombiũta ĩla ĩtonya kũsiĩĩa maũvoo mataĩle. Ĩndĩ vai vulongulamu ĩtonya kwĩkwatw’a vyũ.
^ kal. 1 Nĩ kana ũkwate ũvoo mwingangĩ ĩũlũ wa ũndũ ũtonya kũkĩlya vinya kĩmanyĩo kĩu, sisya ũvoo wĩ na kyongo, “Vijana Huuliza . . . Ninaweza kushindaje zoea hili?” ĩkasetinĩ ya Amkeni! ya Mwei wa 11, 2006, na Maswali Ambayo Vijana Huuliza—Majibu Yafanyayo Kazi, Ĩvuku ya 1, ĩthangũnĩ ya 178-182.
