Mbivilia yathanie kana ĩtina wa kĩkw’ũ kya Klĩsto, amanyĩsya ma ũvũngũ makookĩla kuma katĩ wa Aklĩsto ala ma mbee na kũalyũla ũw’o wa Mbivilia. (Meko ma Atũmwa 20:29, 30) Ĩtina wa ĩvinda, ũu nĩw’o kweekĩkie. Mavulanilye momanyĩsyo ma Yesũ na mawoni ma ndĩni ya andũ matamwĩsĩ Ngai, na ĩndĩ ũthaithi wa Kĩklĩsto wa ũvũngũ wambĩĩa. (2 Timotheo 4:3, 4) Tũtonya kũmanya nesa ata kana ũmũnthĩ twĩ na ũmanyi wa w’o ĩũlũ wa kĩla Mbivilia yo ĩmanyĩasya?

Ĩvinda ya Yeova ya kũvuany’a ũla w’o nĩyavikie. Yeova nĩwathanie kana ‘ĩvindanĩ ya mũminũkĩlyo, ũmanyi ũkongeleka.’ (Ndanieli 12:4) Mwakanĩ wa 1870, kĩkundi kĩnini kya andũ mamanthaa ũw’o nĩkyamanyie kana momanyĩsyo maingĩ ma makanisa mayumĩte Maandĩkonĩ. Kwoou, mambĩĩa kũmantha ũmanyi ĩũlũ wa momanyĩsyo ala ma w’o ma Mbivilia, na Yeova amatetheesya kũelewa maandĩko.

Aũme me na ngoo nzeo nĩmeemanyĩisye Mbivilia nesa. Amanyĩw’a asu ma Mbivilia maĩ mbee witũ maĩ na kĩthito, na maatĩĩie nzĩa ya kwĩmanyĩsya ĩla tũtũmĩaa ũmũnthĩ. Memanyĩasya ĩsomo yĩmwe ya Mbivilia ĩtina wa yĩngĩ. Ĩla masoma kĩlungu kya Mbivilia kĩ vinya kũeleeka, mamanthaa mĩsoa ĩngĩ ĩla ĩtonya kũkĩelesya. Ĩtina wa ũu, maiandĩka ũtwi ũla mavikĩĩa wa kĩlungu kĩu ethĩwa nĩwosanĩte na Maandĩko ala angĩ. Kwoou, nũndũ wa kũeka Mbivilia yĩyĩelesye, nĩmamanyie ĩngĩ ũla w’o ĩũlũ wa syĩtwa ya Ngai na Ũsumbĩ wake, kĩeleelo kyake kwa andũ na nthĩ, ũndũ akw’ũ mailyĩ, na wĩkwatyo wa ũthayũũkyo. Kũmantha kũu nĩkwamathaisye maeka kũatĩĩa mĩĩkĩĩo na imanyĩo mbingĩ sya ũvũngũ.​—Yoana 8:31, 32.

Kũvikĩĩa mwaka wa 1879, Amanyĩw’a asu ma Mbivilia nĩmamanyie kana ĩvinda yaĩ ĩviku ya kũmanyĩthya ũla w’o kĩla vandũ. Kwoou, mwakanĩ ũsu nĩmambĩĩie kũkyavĩthya ĩkaseti ya Mũsyaĩĩsya Yĩtavanasya Ũsumbĩ wa Yeova, yĩla yĩkyavĩthaw’a o na ũmũnthĩ. Ũmũnthĩ nĩtũtavasya andũ ĩũlũ wa ũw’o wa Mbivilia nthĩnĩ wa nthĩ 240 na ithyomo mbee wa 750. Vaiĩ ĩvinda yĩngĩ nongi ũmanyi wa w’o waaĩthwa wĩ mwingĩ ũu!

• Kweethĩiwe ata kwa ũw’o wa Mbivilia ĩtina wa Klĩsto kũkw’a?

• Nĩ kyaũ kĩtumĩte tũmanya ĩngĩ ũw’o ũla wĩ Ndetonĩ ya Ngai?