ĨSOMO YA 7
Naaũ Ala Maatĩaa Ndĩni Ĩla ya Wʼo?
1. No nginya twĩke ata nĩ kenda tũmwendeesye Ngai?
NĨ KENDA tũtanĩe mwĩkalĩle wĩ wendo na Ngai, no ngĩnya twĩthĩwe tumanĩtwe vyũ na ndĩni ya ũvũngũ. No nginya tũatĩĩe ndĩni ya wʼo. Yu tũĩ andũ milioni mbingĩ nĩmaminĩte kwĩka ũu.
2. Ngũsĩ sya Yeova itonya kwoneka va, na wĩa woo nĩ mwaũ?
2 Tondũ kwaminie kwathanwa nĩ Mbivilia, athaithi ala ma wʼo yu nĩ “kuma andũnĩ ma kĩla mũthemba na mbaĩ na ngo na ithyomo.” (Ũvuanʼyo 7:9) Nthĩnĩ wa nthĩ 235 milioni mbingĩ sya Ngũsĩ sya Yeova monekanaa ũtheinĩ maitetheesya andũ angĩ memanyĩsye nzĩa sya Yeova sya wendo na maũndũ ala we ũkwenda twĩke.
Ũndũ Ũtonya Ũmanya Athaithi Ala ma Wʼo
3. Ngũsĩ sya Yeova ithaithaa ũũ, na nĩ mĩthemba myaũ ya mothaithi mevathanaa nayo?
3 Ngũsĩ sya Yeova nĩsyĩtĩkĩlaa kana no Yeova e weka waĩlĩte ũthaithwa. Syo Ngũsĩ sya Yeova nileaa kũkumanĩa mĩvwʼanano kana mavisa ma kĩndĩni. (1 Yoana 5:21) Mo mainengae akwʼũ ũthaithi kwa kũlea ũkoma ũtukũ kana meko ma ũtaĩĩo ũla ũkũmasya mũĩkĩĩo wa ndĩni ya ũvũngũ na “momanyĩsyo ma ndaimoni.” (1 Timotheo 4:1) Kĩla mekaa nĩ kũkiakisya ala makwʼĩĩwe kwa kũmaelesya watho wa Ngai wa ũthayũũkyo wa akwʼũ mekale nthĩnĩ wa valatiso kũũ nthĩ.—Yoana 5:28, 29; Meko 24:15.
4. Woni wa andũ ma Ngai nĩ mwaũ kwelekela ũwe?
4 Ngũsĩ iitũmĩaa ũwe kana ũoi, nũndũ nĩsyĩsĩ syĩndũ isu syumanaa na Ndevili. Mo mayĩkwatasya ũwe nĩkana ũmasiĩĩe na mĩisyo nũndũ wĩkwatyo woo nĩ Yeova.—Nthimo 18:10.
5. Nĩ kwa nzĩa myaũ Ngũsĩ sya Yeova “ti ma nthĩ”?
5 Yesũ nĩwaisye kana amanyĩwʼa make mo “ti ma nthĩ.” (Yoana 17:16) Yesũ mwene nĩwaleile kwĩlikya motetinĩ yĩla waĩ kũũ nthĩ. (Yoana 6:15) No ta wʼo Ngũsĩ sya Yeova iyĩlikasya motetinĩ, ũtetei wa mbaĩ kana ithokoo sya kwenda kwosa monene ma nthĩ ĩno. Ĩndĩ syo niĩvaa koti na kwĩwʼa mĩao ya nthĩ ĩla mekalaa.—Yoana 15:19; Alomi 13:1, 7.
6. Athũkũmi ma Ngai maatĩaa mĩao yĩva kwelekela mũtwaano na mũleano?
6 Na kwondũ wa wĩwʼi woo kwa mwolooto wa silikalĩ, Ngũsĩ niandĩkĩthasya mĩtwaano yoo kwĩanana na mĩao. (Tito 3:1) Nĩsyĩwʼaa mwĩao wa Ngai, na kwoou iitwaaa iveti mbingĩ. (1 Timotheo 3:2) Na ĩngĩ, nĩkwĩthĩwa nĩ mbĩwi kwa mĩao ya Mbivilia mĩkalĩlenĩ yoo, ti ũvũthũ kwona mĩtwaano ya athũkũmi aa ma Ngai ĩiminwa nĩ mũleano.
7. Nĩ kwa nzĩa yĩva Ngũsĩ syonanasya wendo?
7 Ngũsĩ sya Yeova nĩsyendene. Wendo ũsu o vamwe na wendo woo kwa Ngai, ũmakwatanasya makethĩwa ana-a-asa ma wʼo, ona kau mo nĩ ma mbaĩ na ngo mbingĩ. Yĩla kwaumĩla mbanga kana mavinda ma ũnyamao, Ngũsĩ ila ingĩ nĩsyũkaa o mĩtũkĩ kwĩtaana ila ingĩ. Ngũsĩ syonanasya wendo mĩtũĩlenĩ yoo.—Yoana 13:35.
Ngũsĩ sya Yeova syĩ ngwatanĩo nthĩ yonthe
8. Nĩ mĩkĩle myaũ mĩthũku andũ ma Ngai mevathanaa nayo?
8 Andũ ma Yeova nĩmethingʼĩĩasya mũno mekale me aĩkĩĩku, na me alũngalu. Nĩmevathanaa na ũngʼei, kana kũkengana, kũlaalaa, ũnywi, kana kũtwaĩĩsya viasala kwa nzĩa ĩte ndũngalu. Aũme maikũnaa iveti syoo. Andũ amwe mbee wa kũtwĩka Ngũsĩ sya Yeova, nĩmeekaa maũndũ o ta asu, ĩndĩ Yeova nĩwamatetheeisye maekana na mo. Kwa nzĩa ĩsu ‘nĩmathambiwʼe mathea’ methonĩ ma Ngai.—1 Akolintho 6:9-11.
Eki Ma Kwenda kwa Ngai
9. Ĩvuku yĩmwe yaisye ata ĩũlĩ wa makanisa ma veva kũũ Avĩlĩka?
9 Kwa wʼo nĩ ndĩni mbingi syaasya syĩna ũla wʼo. Nĩsyonanasya mawĩa manene maũkathwa nĩ kana maĩkĩĩthye kana ũu nĩ wʼo. Kwa ngelekanyʼo, ĩvuku yĩmwe yĩtawa West African Traditional Religion yaasya ũũ ĩũlũ wa makanisa ala metawa ma kĩĩveva kũũ Avĩlĩka: “Wĩa ũla mwingĩ wa ũwe nĩwosetwe nĩ [ikundi imwe nzaũ sya Ũklĩsto]. . . . Mo maasya nĩmatonya kwathĩĩasya na makeka syama. Nthĩnĩ woo kwĩ athanĩ ala monaa mawono na makaalyũla ndoto. Mena kĩwʼũ metaa kĩtheu, mauta matheu, mĩu, mĩsumaa na ũvani wa ũtoeesya andũ mavowʼe na kũsiĩĩa mowau.”
10, 11. Nĩkĩ ila syĩtawa syama ũmũnthĩ iyonanasya kana ndĩni nĩ mbĩtĩkĩle nĩ Ngai?
10 Andũ ma ndĩni isu maasya kana syama ila mekaa nĩ ũkũsĩ kana ndĩni syoo nĩ ngathime nĩ Ngai. Ĩndĩ isu metaa syama iyĩĩkĩthasya kana ndĩni ta isu nĩsyĩtĩkĩlawa nĩ Yeova. Satani nũmekĩaa vinya athaithi amwe ma ũvũngũ nĩ kana meke ‘mawĩa na mavinya manene.’ (2 Athesalonika 2:9) Kwongeleela, Mbivilia yathanie mbee kana inengo sya syama kuma kwa Ngai, ta wathani, kũneena na ithyomo, na ũmanyi wa mwanya syaĩ syũke ‘ũvetwa.’—1 Akolintho 13:8.
11 Yesũ atavisye andũ mesũvĩe nũndũ: “Ti kĩla mũndũ ũmbĩtaa, Mwĩaĩi, Mwĩaĩi, ũkavota ũsumbĩnĩ wa ĩtu, ĩndĩ nĩ ũla wĩkaa wende wa Asa wakwa ũla wĩ ĩtuni. Mũthenya usu nĩ aingĩ makambĩa, Mwĩaĩi, Mwiaĩi, tũiaathana na syĩtwa yaku, na kumya ndaimoni na syĩtwa yaku, na kwĩka mavinya maingĩ na syĩtwa yaku? Nĩvo ĩndĩ ngamatavya vyũ, Ndyaamũmanya o na ĩndĩĩ: umai vala nĩĩ, inywʼĩ mwĩkaa mothũku.”—Mathayo 7:21-23.
12. Naaũ makalika Ũsumbĩnĩ wa ĩtu?
12 Nũũ, ĩndĩ, ũkalika ũsumbĩnĩ wa ĩtu? Nĩ ala mekaa kwenda kwa Yeova.
Atavanyʼa ma Ũsumbĩ wa Ngai
13. We Ngai eeie andũ make matethye wĩa mwaũ ũmũnthĩ?
13 We Ngai eenda andũ make meke ata ũmũnthĩ? Yesũ awetie ũũ: “Na ũvoo ũũ mũseo wa ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.” (Mathayo 24:14) Ũsu nĩwʼo wĩa ũtethawʼa nĩ Ngũsĩ sya Yeova na mea maingĩ.
14. Ũsumbĩ wa Ngai nĩ mwaũ, na naaũ makasumbĩka nthĩnĩ wawʼo?
14 Kĩla vandũ kũthyũlũlũka “nthĩ yonthe,” Ngũsĩ sya Yeova itavanasya kana usumbĩ wa ĩtunĩ wa Ngai nĩ wʼo ũkasumbĩka nthĩ yonthe na ũlũngalu. Ngũsĩ imanyĩasya kana Yeova amũnyuvĩte Yesũ Klĩsto ethĩwe Mũsumbĩ wa Ũsũmbĩ ũsu, o vamwe na andũ 144,000 ala manyuvĩtwe kuma andũnĩ.—Ndanieli 7:14, 18: Ũvuanʼyo 14:1, 4.
15. Ũsumbĩ ũsu ũkaananga kyaũ?
15 Ngũsĩ sya Yeova syonasya andũ kuma Mbivilianĩ kana Ũsumbĩ wa Ngai ũkaananga walanyʼo wʼonthe wa Satani. Ndĩni ya ũvũngũ ĩndĩ ĩkaminwa o vamwe na momanyĩsyo mayo asu mamũtaĩĩthasya Ndevili vandũ va ũmũtaĩĩthya Ngai! (Ũvuanʼyo 18:8) Nasyo silikalĩ syonthe sya kĩĩmũndũ, nũndũ imũsiĩĩaa Ngai, ikaathũkwʼa vyũ!—Ndanieli 2:44.
16. Naaũ makasumbĩkwa nĩ Yesũ Klĩsto, namo makatũaa va?
16 Ĩngĩ, Ngũsĩ sya Yeova imanyĩasya kana Yesũ Klĩsto, Mũsumbĩ wa ĩtunĩ, akaete moseo maingĩ vyũ kwa onthe ala mekaa ũndũ Ngai wendaa. Mo makeethĩwa laiaa make o vaa ĩũlũ wa nthĩ. Mbivilia yathanĩte: “Akavonokasya mũthĩni yĩla wĩkayaa. Na ngya, ila ite mũtethya. Akeewʼĩa tei ngya na athĩni. Na mathayũ ma athĩni akamatangĩĩaa.”—Savuli 72:12, 13.
17. Naaũ me oka ala matavanasya ĩũlũ wa Ũsumbĩ wa Ngai?
17 Vaiĩ ikundi ingĩ sya andũ syĩkaa kwenda kwa Ngai kwa kũtavanyʼa ũvoo mũseo wa Ũsumbĩ ũsu. No Ngũsĩ sya Yeova syĩ syoka imanyĩasya andũ ĩũlũ wa Ũsũmbĩ wa Ngai nthĩ yonthe.