ĨSOMO YA 9
Ndĩni Yawʼo Ĩkakũuna Tene na Tene!
1. Kũkeethĩwa ata kwitũ ethĩwa ‘tũkamũthengeea Ngai’?
YEOVA nũmendete ala mamũthũkũmaa. Ethĩwa we ũkamũthaitha Yeova, akakũathima ĩvindanĩ yĩĩ tũĩ na yĩla yũkĩte. Mbivilia yaasya ũũ: “Mũthengeei Ngai, nake akamũthengeea inywʼĩ.”—Yakovo 4:8.
2. Tũkamũthengeea Ngai ata, nawʼo ũndũ ũsu ũkavũũsya mboya sitũ ata?
2 Nĩ kenda ũmũthengee Ngai no nginya wĩmanyĩasye na kwĩkaa kwosana na Ndeto yake. Ĩvinda yĩla ũũvoya kwosana na kwenda kwake, Yeova akeethukĩĩsya mboya syaku na kũũsũngĩa. Yoana, mũtũmwa Mũklĩsto aandĩkie ũũ: “Na ũũ nĩwʼo ũnyiau ũla twĩ na wʼo vala ũĩ [Ngai], ethĩwa tũkavoya undũ kwĩanana na kwenda kwake, nũtwĩwʼaa: na ethĩwa nĩtwĩsĩ kana nũtwĩwʼaa o ũndũ tũũvoya, nĩtwĩsĩ kana maũndũ ala twavoya twĩ namo.”—1 Yoana 5:14, 15.
3-7. Tũtonya kwĩkwatĩa ũĩ wa Ngai ata, nawʼo ũtonya kũtũtethya ata?
3 Na ĩngĩ, waendeea kũmũthengeea Ngai, we akaũnenga ũĩ wa kũsinda maũndũnĩ ma kĩla mũthenya ma ĩvinda yĩĩ. Mbivilia yaasya: “Ĩndĩ ethĩwa ũmwe wenyu nũtielye ũĩ, namũvoye Ngai.”—Yakovo 1:5.
4 Uĩ ũsu wumaa kwa Ngai ũtonya ata kũũtethya? Ũndũ wa mbee, ũkaũtetheesya ũmanye maũndũ ala mathatasya Yeova. O ta ũu nũtonya ũmanya kĩtumi kya maũndũ asu methĩwe me mathũku na ũndũ ũtonya kwĩka nĩkana wathũkane namo. Ũmanyi ta ũsu nũtonya kũũsiĩana na mathĩna ala makwataa andũ kwa wingĩ. Kwa ngelekanyʼo, wĩwʼi kwa ũtao wa Ngai wa kwĩthĩwa twĩ atheu mĩendelenĩ nũsũvĩaa andũ ma Ngai maikese ũkua ĩvu yĩteendeka, mowau ala makwatanawʼa nĩ aũme na aka, mĩtwaano ĩte na ũtanu kana mĩleano ya mũtwaano.
5 Nĩ ũndũnĩ ũngĩ wĩva ũĩ kuma kwa Ngai ũtonya ũkwĩka? Nũtonya kũtuma ũunĩka nthĩnĩ wa maũndũ maku. Nũtonya kũũtetheesya wĩthĩawe na ũtwʼi mũseo maũndũnĩ mana, ta ũũngamĩinĩ wa mbesa syaku. Ũkeethĩwa ũtonya kwĩkaa maũndũ ala matonya ũkũuna na ũileana na ala mate ũuno.
6 Ũĩ kuma kwa Ngai ota ũu nũtonya ũkũtetheesya kwĩkalanasya na andũ ala angĩ nesa. Nũtonya kwongeleela ũtanu mũsyĩ kwaku. Ũĩ ũsu noutume wĩkwatĩa anyanya ma wʼo ki, ona kunengwa ndaĩa nĩ ala matathũkũmaa Ngai.
7 Ĩngĩ, ũĩ kuma kwa Ngai ũkatuma wĩthĩwa na mawoni maseango ĩũlũ wa thayũ. Ũkatuma ũtonya kũmĩĩsya mathĩna ala mekwʼo na maũndũ angĩ ma ũkũtũla ngoo. Na ĩngĩ ũkeethĩwa na mawoni maseo ĩũlũ wa ĩvinda yĩla yũkĩte. Kwĩthĩwa na mawoni asu ĩũlũ wa ĩvinda yũkĩte yĩ ĩseo, kũkeekĩa kĩlĩko na mwĩĩ waku vinya.—Nthimo 14:30; Isaia 48:17.
8. Ethĩwa ũkamũthũkũmaa Ngai, ukeethĩwa utatonya kũkĩa kyaũ?
8 Weethĩwa wĩ mũthũkũmi wa Ngai wawʼo, ũkathawʼa kuma nthĩnĩ wa wʼia ũla ũkwataa andũ ala matamũthũkũmaa Ngai. Tondũ nĩwĩsĩ ala akwʼũ mai thayũ vau mbũanĩ, ndũkethĩwa ũimakĩa akwʼũ. Kwa kwĩthĩwa wĩna wĩkwatyo mũlũmu nthĩnĩ wa watho wa Ngai wa kũthayũũkya akwʼũ ndũkethĩawa ũikĩa kũkwʼa. Na nũndũ nĩwĩsĩ kana Ngai e vinya wʼonthe ndũkakĩa ũoi kana kwĩkĩwʼa syĩndũ sya ũwe.—Yoana 8:32.
Ala Alũngalu Makamesya Nthĩ
9-11. Naaũ makekala nthĩnĩ wa Valatiso, na naaũ namo matakamĩkala?
9 Ethĩwa ũkeethĩawa vakuvĩ na Ngai, ndũkethĩawa ũikĩa ĩvinda yĩla yũkĩte. Tondũ tũminĩte kwona Mbivilia nĩyathanie mathĩna maingĩ ala tũũmona ũmũnthĩ kũũ nthĩ. Yeova etũtavya kana maũndũ aa no ma kavinda; Ũsumbĩ wa Ngai o mĩtũkĩ ũkatwʼĩkĩthya nthĩ ĩno valatiso.—Luka 21:10, 11, 31; 23:43.
10 No ala mamũthengeaa Yeova na kũmũthũkũma makekala nthĩnĩ wa Valatiso. Mbivilia yaasya: “Vatiele ĩvinda ĩnini, na mũthũku ndakethĩwa: ĩĩ, ũkaketeea mũno vandũ vake, na ndakethĩwa. Ĩndĩ ala auu makatiĩwa nthĩ, na makeetanʼya mũuonĩ mwingĩ.”—Savuli 37:10, 11.
11 Ala maleaa na ngũlũ kwĩwʼa mĩao ya Ngai mĩlũngalu makaasya mathayũ moo tene na tene. (2 Athesalonika 1:8, 9) Mo maikasyoka kwĩthĩwa vo ĩngĩ. Makeethĩwa vamwe na Satani na ndaimoni syake kĩkwʼũnĩ kya tene na tene. (Ũvuanʼyo 20:10, 14) Ĩndĩ ala memanyĩasya ĩũlũ wa Yeova na kũmũthũkũma makeetanĩthya mũuonĩ mwingĩ vaa nthĩ ya Valatiso.
Ĩvinda Yukĩte Ĩseo Mũno!
12. Mbivilia yaasya ata ũndũ wa ĩvinda yĩla yũkĩte?
12 Yeova ena maũndũ maingĩ maseo mũno ala wiĩe ala mamwendete! Kwatata ũsisya ũndũ Ndeto yake yaasya ũndũ wa thayũ nthĩnĩ wa nthĩ ya Valatiso:
-
Lĩu mwingĩ wa ũĩsaa: “Kũ keethĩwa lĩu mwingĩ mũno wa mbaa ngetha nthĩ iĩmanĩ ĩũlũ; ũsyao wa vo ũkathingithĩkaa.”−Savuli 72:16.
-
Nyũmba nzeo: “Na makaaka nyũmba, na kũtũa nthĩnĩ wasyo.”−Isaia 65:21.
-
Wĩa wa ũtanyʼa: “Anyuve makwa makatanĩaa wĩa wa moko moo ĩvinda ĩasa. Matikathĩnĩa wĩa mana.”—Isaia 65:22, 23.
-
Kũyĩingwa ũwau: “Ũla ũtwĩe kwʼo ndakasya, Nyie nĩ mũwau.”−Isaia 33:24.
-
Kũyĩingwa iema: “Nĩvo metho ma ililinda mesalukwʼa, na matũ ma ala au matũ melindũka. Nĩvo mũndũ ũthuaa wĩtũlĩla ta ndaatai nũme, na ũĩmĩ wa ũla ũtaneenaa wĩina.”—Isaia 35:5, 6.
-
Vayĩingwa kyalya, kĩmako, kĩkwʼũ: “[Ngai] akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”—Ũvunʼyo 21:4.
-
Vayĩingwa kaũ: “[Ngai]nũtumaa makaũ mathela kũvika kĩtulu kya nthĩ.”—Savuli 46:9.
-
Thayũ ũtathela: “Ala alũngalu makatiĩwa nthĩ, na makatũa vo kũvika tene na tene.”—Savuli 37:29.
13. Nũũ weka ũtonya kũtwʼĩkĩthya nthĩ ĩno valatiso, na nĩkĩ nowe?
13 Andũ maitonya ona ĩndĩĩ kũete maũndũ ta asu, ĩndĩ Yeova ena ũtonyi wa kwĩka maũndũ onthe ala waĩtye akeeka. Vaiĩ kĩndũ kĩtonya ũmũsiĩĩa ndakeke ũndũ ũnũkwenda kwĩka. Mbivilia yaasya: “Nĩkwĩthĩwa kwa Ngai vai ũndũ ũtatonyeka.”—Luka 1:37.
14. Ũtonya ata kũlika nzĩanĩ ya thayũ ũtathela?
14 Kwĩsĩla kwa Ngũsĩ syake, Yeova emathokya andũ kĩla vandũ ‘mavote na mbingĩlo ĩla ntheke’ na makĩatĩĩa nzĩa ĩla ĩtongoasya kũvika thayũnĩ ũtathela. Wĩkũlwa wĩthĩwe ũmwe wa andũ atanu ala meĩtĩkĩla kũatĩĩa nzĩa ĩsu. Wĩkũlwʼa ũatĩĩe ndĩni ya wʼo na kũtanĩa moathimo ma Yeova tene na tene!—Mathayo 7:13, 14.