ĨSOMO YA 1
Syo Ndĩni Syonthe Imanyĩasya Ũla Wʼo?
1. Nĩ ndĩni syĩva ila iatĩĩawa Avĩlĩka?
ANDŨ onthe nthĩ ya Avĩlĩka, nĩmetĩkĩlanaa kana ve vata wa ũthaitha Ngai. Ĩndĩ mo mayĩwʼanaa ĩũlũ wa nzĩa sya ũmũthaitha. Amwe maendaa ũthaithĩa mĩsikitinĩ, angĩ maendaa mathembonĩ, na angĩ makanisanĩ. Ĩndĩ ndũtonya kwasya ndĩni no itatũ kũũ Avĩlĩka. Aisilamu mena mĩĩkĩĩo na mĩao ĩvathũkene. Ndĩni sya kĩthĩo onasyo iyĩwʼanaa. Namo ala meyĩtaa makanisa ma Kĩklisto nĩmo matewʼanaa ĩ-ya mũno. Kwaeka makanisa ala manenange, kwĩ makanisa maingĩ mũno ala meeyũmbĩte ũtee nangĩ nthĩ ya Avĩlĩka yonthe.
Mũvaka Ndĩni Yitũ Yĩthĩwe na Mũsingi wa Wʼo
2. (a) Mavinda maingĩ ndĩni ya mũndũ ĩtusawa nĩ kyaũ? (b) Nĩ maũndũ maũ makonetye ndĩni yitũ matatwʼa kana nĩyĩtĩkĩlawa nĩ Ngai?
2 Tene nĩkĩ andũ mathaithaa kĩvathũkanganyʼo? Andũ aingĩ metĩkĩlaa ndĩni ĩla meethĩie na asyai moo. Kwĩ maũndũ meekĩkie tene ala nĩmo matumaa andũ maatĩĩa ndĩni isu ũmũnthĩ. Ĩvuku yĩmwe yĩtawa The Africans— A Triple Heritage yaasya: “Uisilamu wanyaĩĩkie Avĩlika ya ĩũlũ kwa ũkĩlya kaũ nthĩ isu, . . . Ũklĩsto nawʼo wanyaĩĩka kĩlungunĩ kĩla kyatialĩte o kwa nzĩa ya kaũ. Ethĩwa Ũisilamu wanyaĩĩkie kwa kũaa andũ ala mauleaa, nawo Ũklĩsto wanyaĩĩkie o kwa kaũ kwa ala maũleaa.” Oou wĩovo aingĩ maitũ tũĩkĩĩa ndĩni yitũ nĩyendeeasya Ngai. Ĩndĩ ndĩni ndĩtwʼĩkaa ya wʼo atĩ nũndũ asyai maitũ nĩmamĩatĩaa kana nũndũ meetĩkĩlĩthiwʼe ndĩni ĩsu kwa vinya nĩ silikali sya andũ kuma nthĩ ingĩ.
3-5. Nĩ ngelekanyʼo myaũ itũtetheeasya kwona kana ti ndĩni syonthe imanyĩasya ũla wʼo?
3 Ona kau kĩla ĩmwe yaasya nĩtongoeasya andũ mamũthũkũme Ngai nesa, mesilya masyo nĩmavĩtũkene vyũ. Mamanyĩasya momanyĩsyo me kĩvathũkanyʼo ĩũlũ wa maũndũ ala Ngai wendaa twĩke. Kwavindĩĩsya ũũ: Twasye nũkwatĩte wĩa kambunĩnĩ ĩmwe nene. Mũthenyanĩ o ũwambee waenda ũkewa mũnene aendie lũũsa. Ĩndĩno ũikũlya athũkũmi angĩ atatũ ũndũ ũkwĩka. Ũmwe woo aikwĩa mũnene eenda ũtutae o kũu. Ũngĩ aikwĩa wiendeka ũvakae langi mwako ũsu, nake wa katatũ aikwĩa ũkatwaaa mavalũa.
4 Ĩtina wa ũu ũikũlĩĩlya athũkũmi asu ũndũ mũnene ũilyi. Wa mbee aikwĩa nĩ mũndũ mũasa wa mũika na ũngʼathasya mĩtũkĩ. Ũla ũngĩ nake aikwĩa nĩ mũtumĩa mũkuvĩ wĩ ĩnee; wa katatũ nake aikwĩa kana mũnene nĩ mũndũ mũka ti mũndũũme. Nivatonyeka ukesilya kana katĩ wa athũkũmi asu atatu vai ũmwe ũkũneena wʼo. Nĩ kana ũendee na kũthũkũma vau veonekana wĩenda kwĩnzĩanga ũmanye nesa mũnene we nũũ na eenda wĩke ata.
5 Nowʼo vailyĩ ũvoonĩ wa ndĩni. Nũndũ kwĩ mawoni maingĩ me kĩvathũkanyʼo ĩũlũ wa Ngai we nũũ, na ĩũlũ wa maũndũ ala we wendaa twĩke, nĩtwaĩlwe nĩ kũmanya vyũ kana ũthaithi witũ nĩwosanite na ũla wʼo. Ĩndĩ-ĩ, tũtonya ũmanya ata ũwʼo ĩũlũ wa Ngai?
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Ndĩni Syonthe Nivwʼanene? Nĩ Syonthe Itumaa Andũ Mamũthengeea Ngai?
Ve maũndũ elĩ mawetetwe Mbivilianĩ masũngĩĩte makũlyo asu.
