No andũ nyaanya tũ ala mavonokie kĩla Kĩw’ũ Kingĩ, ĩndĩ o ĩvinda yĩendee nĩmongelekile mavika ngili mbingĩ. Na ĩndĩ myaka 352 ĩtina wa kĩw’ũ kĩu kingĩ, Avalaamu asyawa. Twĩĩmanyĩsya ũndũ Ngai weanĩisye watho wake kwa kũmũnenge Avalaamu mwana weetawa Isaka. Na katĩ wa syana ilĩ sya Isaka, Yakovo nĩwanyuviwe nĩ Ngai.

Yakovo aĩ na Mũsyĩ mũnene waĩ na ana 12 na eĩtu. Ana 10 ma Yakovo nĩmamenete mũinae woo Yosevu na nĩmamũthooisye akatw’ĩke ngombo Misili. Ĩtina wa kũthoow’a Yosevu nĩwatw’ĩkie mũndũ mũnene ũsumbĩnĩ wa Misili. Yĩla nzaa nene yookie, Yosevu nĩwatatie ana-a-ĩthe one kana maĩ aalyũku ngoo. Ĩtina mũsyĩ w’onthe wa Yakovo, nĩmo Aisilaeli, nĩmathamĩĩie Misili. Maũndũ asu meekĩkie myaka 290 ĩtina wa kũsyawa kwa Avalaamu.

Myaka 215 ĩla yaatĩĩe Aisilaeli matũaa Misili. Ĩtina wa kũkw’a kwa Yosevu, mo nĩmatw’ĩkie ngombo kũu Misili. O maendee na kwĩkala kũu, Mose nĩwasyaiwe, na Ngai nĩwamũtũmĩie kwovosya Aisilaeli kuma Misili. Myaka yonthe ya isitoli ĩla ĩeleetw’e nthĩnĩ wa Kĩlungu kĩĩ kya KELĨ nĩ 857.