Ngewa ya 14: Ngai Aitata Mũĩkĩĩo wa Avalaamu
WE NŨKWONA ũndũ Avalaamu ũendee na kwĩka vaa? Ena kavyũ, na eonekana tokwenda kũmũaa mwana wake. Nĩkĩ ũnũkwenda kwĩka ũu? Mbee ekai twambe twone ũndũ Avalaamu na Sala makwatie mwana.
Lilikana, Ngai nĩwamathĩte kana makeethĩwa na mwana. Na ũndũ ũsu woonekaa ũtatonyeka, nũndũ Avalaamu na Sala maĩ akũũ mũno. Ĩndĩ Avalaamu nĩwaĩkĩĩe kana Ngai no atonye kwĩka kĩla kĩtatonyeka. Kwoou ĩndĩ kweekĩkie ata?
Ĩtina wa Ngai kwathana ũu, nĩvathelile mwaka mũima. Na ĩndĩ yĩla Avalaamu waĩ na ũkũũ wa myaka 100 nake Sala myaka 90, mo nĩmakwatie kana ka kavĩsĩ keetawa Isaka. Ngai nĩweanĩisye watho wake!
Ĩndĩ Isaka amina kwĩana, Yeova nĩwatatie mũĩkĩĩo wa Avalaamu. We amwĩtie: ‘Avalaamu!’ Nake Avalaamu eetĩka: ‘Ninyioo!’ Na ĩndĩ Ngai amwĩa: ‘Osa yu mwana waku, mwana waku e ũmwe, ũla wendete, o Isaka, ũende kĩĩmanĩ kĩla ngũkwony’a. Vau kĩĩmanĩ, mũae mwana waku na ũimumya ta nthembo.’
Ndeto isu syamwĩkĩie Avalaamu kĩũũyũ ta kĩ nũndũ nĩwamwendete mwana wake mũno. Na lilikana, Ngai nĩwathanĩte kana syana sya Avalaamu ikatũa nthĩ ya Kanaani. Ũndũ ũsu waĩ ũtonyeka ata Isaka e mũkw’ũ? Avalaamu ndaamanya kĩtumi kya ũndũ ũsu, ĩndĩ o na ũu wĩ o vo, nĩwamwĩwie Ngai.
Yĩla wavikie kĩĩmanĩ, Avalaamu nĩwamwovie Isaka na amwia ĩũlũ wa ngũ kĩthembeonĩ kĩla waakie. Na Avalaamu aumya kavyũ oae mwana wake. Na kavinda o kau mũlaĩka wa Ngai amwĩta: ‘Avalaamu, Avalaamu!’ Nake asũngĩa, ‘Ninyioo!’
Na Ngai amwĩa, ‘Ndũkamũũmĩsye mwanake ũsu, kana ũmwĩke ũndũ. Yu nĩnĩsĩ kana nũndĩkĩĩe, nũndũ ndũnambata mwana waku, o ũla ũmwe.’
Avalaamu aĩ na mũĩkĩĩo mũnene ta kĩ! Nĩwaĩkĩĩte kana vayaĩ ũndũ Yeova ũtatonya kwĩka, na kana Yeova nĩwaĩ atonya kũmũthayũũkya Isaka. Ĩndĩ kũyaĩ kwenda kwa Ngai Avalaamu oae Isaka. Na ĩndĩ Ngai atuma ĩlondu yĩkwatwa ikuthunĩ syaĩ vakuvĩ, na eea Avalaamu ayĩthembe yo, vandũ va mwana wake.
Mwambĩlĩlyo 21:1-7; 22:1-18.
Makũlyo
- Ngai athie Avalaamu kyaũ, na eanĩisye watho wake ata?
- Tondũ vonanĩtw’e visanĩ, Ngai atatie mũĩkĩĩo wa Avalaamu ata?
- Avalaamu eekie ata, o na kau ndaamanya kĩtumi kya mwĩao wa Ngai?
- Kweekĩkie ata yĩla Avalaamu woosie kavyũ oae mwana wake?
- Mũĩkĩĩo wa Avalaamu kwa Ngai waĩ mũlũmu ata?
- Ngai amũnengie Avalaamu kyaũ athembe, na eekie ũu ata?
Makũlyo ma kwongeleela
- Soma Mwambĩlĩlyo 21:1-7.
Nĩkĩ Avalaamu waĩkie mwana wake mũthenya wa nyaanya? (Mwa. 17:10-12; 21:4)
- Soma Mwambĩlĩlyo 22:1-18.
Isaka oonanisye ata wĩnyivyo kwa Avalaamu ĩthe wake, na yĩko yĩu yoonanisye ũndũ mwaũ wa vata mũno ũla waĩ wĩthĩwe ĩvinda yũkĩte? (Mwa. 22:7-9; 1 Ako. 5:7; Avi. 2:8, 9)
No Wendeewʼe Nĩ Ii
ĨTHĨWA NA MŨĨKĨĨO TA WOO
Avalamu—“Ĩthe wa Onthe Ala me na Mũĩkĩĩo”
Avalamu oonanisye ata kana aĩ na mũĩkĩĩo? We wenda kwonany’a mũĩkĩĩo ta wa Avalamu kwa nzĩa syĩva?
