WE NĨWĨSĨ mũndũ mũka ũũ wĩ vaa visanĩ? Syĩtwa yake nĩ Leveka. Na mũndũũme ũũ wũkĩte makomane nĩ Isaka. O mĩtũkĩ nũkũtw’ĩka mũka wake. Ũndũ ũsu weekĩkie ata?

Avalaamu ĩthe wa Isaka nĩwendaa mwana wake ethĩwe na mũka mũseo. We ndendaa Isaka atwae ũmwe wa aka ma Kanaani, nũndũ andũ asu mathaithaa ngai sya ũvũngũ. Nĩvo ĩndĩ Avalaamu wamwĩtie mũthũkũmi wake na amwĩa: ‘Nĩenda ũsyoke kwa andũ ma ũko wakwa ala matũaa Aalani na ũitwaĩa mwana wakwa Isaka mũka kuma kw’o.’

Vate kweteela mũthũkũmi wa Avalaamu nĩwoosie ngamĩle ĩkũmi na athi kyalo kĩu kĩasa. Yĩla wavikie vakuvĩ na vala andũ ma ũko wa Avalaamu matwĩe, nĩwaũngamie vakuvĩ na kĩthima. Kwaĩ mawĩoo ĩvinda yĩla aka ma ndũa mookaa kũuta kĩw’ũ kĩthimanĩ kyu. Kwoou mũthũkumi wa Avalaamu amũvoya Yeova ayasya: ‘Nĩkwĩthĩwe mwĩĩtu ũla ũkũnenga kĩw’ũ nĩnyw’e, na aisyoka ainenge ngamĩle nĩwe ũla ũnyuvĩte atw’ĩke mũka wa Isaka.’

O mĩtũkĩ Leveka nĩwookie kũuta kĩw’ũ. Yĩla mũthũkũmi ũsu wamwĩtisye kĩw’ũ anyw’e, nĩwamũnengie. Na ĩndĩ nĩwaendie na aete kĩw’ũ kĩtoetye kũnyuwa nĩ ngamĩle isu syaĩ na waũni. Ũsu waĩ wĩa wĩ vinya nũndũ ngamĩle inyusaa kĩw’ũ kingĩ mũno.

Yĩla Leveka waminie kwĩka ũu, mũthũkũmi wa Avalaamu nĩwamũkũlilye syĩtwa ya ĩthe wake. Ĩngĩ nĩwamũkũlilye kana nũtonya kũkomela kwoo ũtukũ ũsu. Nake asũngĩa: ‘Syĩtwa ya ĩthe wakwa nĩ Mbethũeli, na twĩna ũthei waku wa kwĩkala vamwe naitũ.’ Mũthũkũmi wa Avalaamu nĩweesĩ kana Mbethũeli aĩ mwana wa Naoli, mwana-a-inyia wa Avalaamu. Kwoou atulya ndu na kũmũtũngĩa Yeova mũvea kwa kũmũtongoesya kũvika kwa andũ ma ũko wa Avalaamu.

Ũtukũ o ũsu mũthũkũmi wa Avalaamu nĩwamũtavisye Mbethũeli na Lavani, mwana-a-inyia wa Leveka, kĩtumi kya kũka kwoo. Elĩ nĩmeetĩkĩlanile kana Leveka no athi nake na kũtwawa nĩ Isaka. Leveka aisye ata ĩla wakũlilw’e? We nĩweetĩkĩlile kũthi. Kwoou o ũnĩ ũsu nĩmatũlile ngamĩle na mambĩĩa kyalo kĩasa kya kũsyoka Kanaani.

Mavikie mawĩoo na Leveka oona mũndũũme aitembea kĩsesinĩ. Mũndũũme ũsu aĩ Isaka. Nake nĩwatanie mũno kũmwona Leveka. Sala inyia wa Isaka aĩ anakw’a myaka ĩtatũ yaĩ mĩthelu, na Isaka aĩ na kyeva nũndũ wa ũndũ ũsu. Ĩndĩ nĩwamwendie Leveka mũno, na eethĩwa na ũtanu ĩngĩ.

Mwambĩlĩlyo 24:1-67.