Ngewa ya 18: Yakovo Nĩwaendie Aalan
WE NĨWĨSĨ andũ aa Yakovo ũnũũneena namo naaũ? Ĩtina wa kũthi kyalo mĩthenya mingĩ Yakovo nĩwamethĩie ũtee wa kĩthima. Mo maĩthasya malondu moo. Na Yakovo amakũlya: ‘Inyw’ĩ mwĩ ma va?’
Namo masya, ‘Twĩ ma Aalani.’
Nake amakũlya. ‘Nĩmũmwĩsĩ Lavani?’
Namo mamũsũngĩa, ‘Ĩĩ, sisya mwĩĩtu wake Lakeli nũũya wũkĩte na ndĩthya yake ya malondu.’ We nũmwene Lakeli vaaya okĩte?
Yĩla Yakovo woonie Lakeli okĩte na malondu ma Lavani ũla wasyaanĩwe na Leveka inyia wake, nĩwaendie avingilitya ĩvia yume mũomonĩ wa kĩthima nĩ kana malondu manyw’e. Na ĩndĩ Yakovo amumunya Lakeli na amũtavya we nĩwe ũũ. Lakeli nĩweewie mũyo mwingĩ mũno, na asemba mũsyĩ na atavya ĩthe wake Lavani.
Lavani nĩwatanie mũno nũndũ wa Yakovo kũka kwĩkala nake. Na yĩla Yakovo wakũlilye atwae Lakeli, Lavani nĩwatanie mũno. Ĩndĩ o na kũilyĩ ũu, nĩwakũlily’e Yakovo athũkũme mũũndanĩ kwake myaka mũonza kwondũ wa Lakeli. Na nũndũ nĩwamwendete Lakeli mũno Yakovo nĩweekie ũu. Ĩndĩ yĩla ĩvinda ya mũtwaano yavikie, we nĩwĩsĩ ũndũ kweekĩkie?
Lavani anengie Yakovo mwĩĩtu wake ũla mũkũũ Lea vandũ va Lakeli. Na yĩla Yakovo weetĩkĩlile kũthũkũma kwa Lavani myaka ĩngĩ mũonza, Lavani amũnenga Lakeli o nake atw’ĩke mũka. Ĩvindanĩ yĩu Ngai nĩweetĩkĩlĩtye aũme matwaae iveti mbingĩ. Ĩndĩ yu, o tondũ Mbivilia yonanĩtye, mũndũũme aĩlĩte kwĩthĩwa na kĩveti o kĩmwe tũ.
Mwambĩlĩlyo 29:1-30.
Makũlyo
- Mũndũ mũka ũũ wa mũika wĩ visanĩ nũũ, na Yakovo amwĩkie ata?
- Yakovo eetĩkĩlile kwĩka ata nĩ kana amũtwae Lakeli?
- Lavani eekie ata yĩla ĩvinda ya Yakovo kũmũtwaa Lakeli yavikie?
- Yakovo eetĩkĩlile kwĩka ata nĩ kana Lakeli atw’ĩke mũka?
Makũlyo ma kwongeleela
- Soma Mwambĩlĩlyo 29:1-30.
O na Yakovo akengwa nĩ Lavani, oonanisye ata kana we nĩ mũndũ wa ndaĩa, na ithyĩ tũtonya kwĩmanyĩsya kyaũ ũndũnĩ ũsu? (Mwa. 25:27; 29:26-28; Mt. 5: 37)
Ngelekany’o ya Yakovo yĩonany’a ata kĩvathũkany’o katĩ wa wendo waw’o na wendo wa kũthũlũmũkĩla? (Mwa. 29:18, 20, 30; Wa. 8:6)
Nĩ aka meva ana matw’ĩkie ma nyũmba ya Yakovo na ĩtina mamũsyaĩa syana? (Mwa. 29:23, 24, 28, 29)
