Ngewa ya 20: Ndina Kũlika Thĩnanĩ
WE NŨKWONA andũ ala Ndina ũendete kũkethya? Aendete kũkethya amwe ma eĩtu ala mekalaa nthĩ ya Kanaani. Ĩthe wake Yakovo nũkũtanw’a nĩ ũndũ ũsu? Nĩ kenda tũtetheew’e kũkwata ũsũngĩo, kwatata kũlilikana ũndũ Avalaamu na Isaka meesilasya ĩũlũ wa aka ma nthĩ ya Kanaani.
Avalaamu nĩwendaa mwana wake Isaka atwae mwĩĩtu kuma Kanaani? Aiee, ndendaa. Isaka na Leveka nĩmendaa mwana woo Yakovo atwae mwĩĩtu Mũkanaani? Aiee. We nĩwĩsĩ kĩtumi?
Kĩtumi nũndũ andũ aa ma Kanaani mathaithaa ngai sya ũvũngũ. Mayaĩ andũ aseo ma kũtwaana namo kana kũtuma ndũũ namo. Kwoou vate nzika Yakovo ndaĩ atonya kwendeew’a nĩ mwĩĩtu wake aituma ndũũ na eĩtu asu Akanaan.i
Vate nzika, Ndina nĩwalikile thĩnanĩ. We nũmwene mũndũũme ũya Mũkanaani wĩ visanĩ ũmũketee Ndina? Syĩtwa yake nĩ Sekemu. Mũthenya ũmwe Ndina aendete kũkethany’a, Sekemu nĩwamũkwatie na akoma nake kwa vinya. Yĩu yaĩ ĩvĩtyo, kĩtumi nũndũ no aũme na aka ala matwaanĩte tũ maĩle ũkoma ĩmwe. Ũndũ ũsu mũthũku Sekemu wamwĩkie Ndina waetie thĩna ũngĩ mũnene.
Yĩla ana-a-ĩthe ma Ndina meewie ũndũ kwĩkĩkie, nĩmathilĩkile mũno. Elĩ katĩ woo, Simeoni na Livai, nĩmathilĩkile mũno nginya moosa mbyũ na mathi ndũanĩ ĩsu na mathũlũmũkĩla aũme mayo. Mo na ana-a-ĩthe nĩmowaie Sekemu na aũme ala angĩ onthe. Yakovo nĩwathatie nũndũ ana make nĩmeekie ũndũ ũsu mũthũku.
Kĩthokoo kĩĩ kyonthe kyambĩĩie ata? Kyambĩĩie nũndũ Ndina nĩwatumie ndũũ na andũ matew’aa mĩao ya Ngai. Tũikaaende o na ĩndĩĩ kũtuma ndũũ na andũ ta ũsu, kana no twende?
Mwambĩlĩlyo 34:1-31.
Makũlyo
- Nĩkĩ Avalaamu na Isaka matendaa syana syoo iitwaana kuma nthĩ ya Kanaani?
- Yakovo nĩweetĩkĩlile mwĩĩtu wake atume ndũũ na eĩtu ma Kanaani?
- Mũndũũme ũũ ũketee Ndina vaa visanĩ nũũ, na nũndũ mwaũ mũthũku weekie?
- Simeoni na Livai, ana-a-inyia ma Ndina, meekie ata yĩla meewie ũndũ kweekĩkie?
- Yakovo nĩweetĩkĩlanile na ũndũ Simeoni na Livai meekie?
- Kĩthokoo kĩu kyonthe kya mũsyĩ kyambĩĩie ata?
Makũlyo ma kwongeleela
- Soma Mwambĩlĩlyo 34:1-31.
Kũtindany’a kwa Ndina na eĩtu ma nthĩ ya Kanaani waĩ ũndũ wa mũthenya o ũmwe? Elesya. (Mwa. 34:1, NW: Na Ndina mwĩĩtu wa Lea, ũla wamũsyaĩe Yakovo, nĩwaendaa kũmona eĩtu ma nthĩ ĩsu.)
Nĩkĩ tũtonya kwasya Ndina o nake aĩ na mavĩtyo nthĩnĩ wa kwasya wĩĩtu wake? (Aka. 6:7)
Andũ ma mũika matonya kwonany’a ata kana nĩmekwosa kwa ũito ngelekany’o ya ũkany’o ya Ndina? (Nth. 13:20; 1 Ako. 15:33; 1 Yoa. 5: 19)
