Ngewa ya 24: Yosevu Aitata Ana-a-Ĩthe Make
YOSEVU nĩweendaa kũmanya kana akũũe make 10 matũaa me o na ngoo nthũku na ite tei. Kwoou asya: ‘Inyw’ĩ mwĩ athiani. Mũkĩte kũsisya wonzu wa nthĩ yitũ.’
Namo masya, ‘Aiee ithyĩ tũi athiani. Ithyĩ twĩ andũ matonya kũĩkĩĩka. Ithyonthe nĩtũsyaanĩw’e. Twaĩ 12. No mwana-a-asa ũmwe tivo ũĩ, na ĩlumaita yĩ mũsyĩ na ĩthe witũ.’
Yosevu eetwie ndeũmaĩkĩĩa. Na amwĩkĩa kolokolonĩ mwana-a-ĩthe ũmwe wĩtawa Simeoni, na aeka ala angĩ makua lĩu na menũka. Ĩndĩ amea: ‘Yĩla mwĩsyoka no nginya mũkoka na ĩlumaita yenyu.’
Na masyoka kwoo Kanaani, ana-a-ĩthe make matavya ĩthe woo Yakovo maũndũ onthe ala meekĩkie. Yakovo nĩweewie kyeva kingĩ mũno. Na akaya ayasya, ‘Yosevu ndevo ĩngĩ na Simeoni ndevo ĩngĩ. Ndyĩsa kũmwĩtĩkĩlya mũthi na Mbenyamini mwana wakwa ũla mũnini.’ Ĩndĩ yĩla lĩu woo waendeeie na ũnyiva, yaĩ no nginya Yakovo amaeke mathi Misili na Mbenyamini nĩ kenda makaũe lĩu ũngĩ.
Yosevu nĩwoonie ana-a-ĩthe mokĩte. Na atana mũno kwona mũinae Mbenyamini. Kwa w’o, vaiĩ ũmwe woo weesĩ kana mũndũ ũsu mũnene ũu nĩ Yosevu. Yosevu nĩweekie ũndũ mũna nĩ kana atate ana-a-ĩthe make 10.
Eeĩaĩe athũkũmi make mausũsye makunia moo lĩu. Na ĩngĩ eeĩaa kĩkombe kyake kya mwanya kya vetha kĩkĩwe ĩkunianĩ ya Mbenyamini matesĩ. Na ĩtina wa onthe mathi, o na matanaendanga mũno, Yosevu atũma athũkũmi make mamaatĩĩe. Na athũkũmi asu mavika vala maĩ mamea: ‘Mwooya kĩkombe kya vetha kya mwĩaĩi witũ nĩkĩ?’
Namo ana-a-ĩthe onthe masya, ‘Ithyĩ tũinoya kĩkombe kyake. Ethĩwa ũmwe witũ nũkwoneka na kĩkombe kĩu, mũndũ ũsu nĩoawe.’
Kwoou athũkũmi mamantha makunianĩ onthe, na meethĩa kĩla kĩkombe ĩkunianĩ ya Mbenyamini, o tondũ ũkwona vaa. Na ĩndĩ athũkũmi asu masya: ‘Inyw’ĩ ala angĩ nĩmũtonya kũthi, ĩndĩ Mbenyamini no nginya tũsyoke nake.’ Ana-a-ĩthe make 10 meekie ata?
Onthe masyokie vamwe na Mbenyamini nyũmbanĩ kwa Yosevu. Nake Yosevu amea ana-a-ĩthe make: ‘Inyw’ĩ nĩmũtonya kũthi mũsyĩ, ĩndĩ Mbenyamini no nginya ekale vaa e ngombo yakwa.’
Nĩvo ĩndĩ Yuta waneenie na asya: ‘Ethĩwa nyie ngasyoka mũsyĩ kĩmwana kĩte vamwe nakwa, asa wakwa akakw’a nũndũ nũkyendete mũno. Kwoou nĩngũkwĩsũva, eka nyie nĩkale vaa ta ngombo yaku, ĩndĩ eka kĩmwana kĩnũke.’
Yosevu nũtonya kwona kana ana-a-ĩthe make nĩaalyũku. Mai na wĩyendi na kwĩthĩwa mate na tei ta tene. Ekai yu twone ũndũ Yosevu ũkwĩka.
Mwambĩlĩlyo 42:9-38; 43:1-34; 44:1-34.
Makũlyo
- Yosevu eeie ana-a-ĩthe make nĩ athiani nĩkĩ?
- Yakovo alekily’e ĩlumaita yake, Mbenyamini, yĩende Misili nĩkĩ?
- Kĩkombe kya Yosevu kya vetha kyalikile ata ĩkunianĩ ya Mbenyamini?
- Yuta eeyumisye kwĩka ata nĩ kana Mbenyamini alekw’e?
- Ana-a-ĩthe ma Yosevu maalyũkĩte ata?
Makũlyo ma kwongeleela
- Soma Mwambĩlĩlyo 42:9-38.
Ũndũ Yosevu weekie nthĩnĩ wa Mwambĩlĩlyo 42:18 nĩ kĩlilikany’o kĩseo kwa nzĩa myaũ kwa ala me na wĩa wa ũsyaĩĩsya nthĩnĩ wa ũseũvyo wa Yeova ũmũnthĩ? (Nee. 5:15; 2 Ako. 7:1, 2)
- Soma Mwambĩlĩlyo 43:1-34
O na kau Luveni nĩwe waĩ ĩkithathi, nĩ kyaũ kĩonanany’a kana Yuta aĩ anatw’ĩka mũneeni wa ana-a-ĩthe make? (Mwa. 43:3, 8, 9; 44:14, 18; 1 Mav. 5:2)
Yosevu amatatie ana-a-ĩthe make ata, na nĩkĩ? (Mwa. 43:33, 34)
- Soma Mwambĩlĩlyo 44:1-34.
Yosevu eekie ata ta nzĩa ĩmwe ya kũvitha ndakamanyĩke nĩ ana-a-ĩthe make? (Mwa. 44:5, 15; Ali. 19:26)
Ana-a-ĩthe ma Yosevu moonanisye ata kana mayaĩ na kĩwĩu kĩla maĩ nakyo vau mbee kũmwelekela? (Mwa. 44:13, 33, 34)
