Ngewa ya 25: Mũsyĩ wa Yakovo Kũthamĩĩa Misili
YOSEVU ndaĩ atonya kwĩyũmĩĩsya mbee wa vau. Na kwoou eea athũkũmi make onthe nĩmaumaale nza. Na atiwa na ana-a-ĩthe make me oka, Yosevu ambĩĩa kũĩa. Nĩtũtonya kũsũanĩa ũndũ ana-a-ĩthe make maseng’ie, nũndũ mayeesĩ eĩw’a nĩ kyaũ. Na ĩtina vyũ asya: ‘Ninyie Yosevu. Nau e o thayũ?’
Ana-a-ĩthe make maseng’ie mũno weethĩa o na maitonya kũtumũa. Nĩmew’aa w’ĩa. Ĩndĩ Yosevu amea: ‘Nĩngũmwĩsũva, thengeangĩai vakuvĩ nakwa.’ Na mathengeea, asya: ‘Ninyie Yosevu mwana-a-ĩthe wenyu ũla mwathooisye Misili.’
Yosevu nĩwaendeeie kũneena na ĩnee ayasya: ‘Mũikethatĩe ene nũndũ nĩmwanthooisye kũũ. Nĩkwĩthĩwa Ngai nĩwe wandũmie kũũ Misili nĩtangĩĩe mathayũ ma andũ. Valao nũndw’ĩte mũsumbĩki wa nthĩ yonthe ya Misili. Kwoou ĩkalaatei, mwambate kwa nau na mũimũtavya ũu. Na mũimwĩa nĩoke atũe kũũ.’
Na ĩndĩ Yosevu amakumbatĩlya ana-a-ĩthe make na amamumunya onthe. Na yĩla Valao weewie kana ana-a-ĩthe ma Yosevu nĩmooka, amwĩa Yosevu: ‘Eka mose makasya na maithi makose ĩthe woo na andũ ma nyũmba syoo na maisyoka Misili. Nakwa ngamanenga kũndũ kũla kũseo vyũ kũũ Misili.’
Na ũu nĩw’o meekie. Nũtonya kwona Yosevu vaa aimũthokya ĩthe wake yĩla wavikie Misili vamwe na andũ onthe ma nyũmba yake.
Andũ ma nyũmba ya Yakovo nĩmongelekile mũno. Onthe maĩ 70 yĩla mathamĩĩie Misili, tũitala Yakovo na syana syake na esũkũũe. Ĩndĩ iveti o na syo syaĩ vo, o na nĩkũtonyeka vaĩ athũkũmi aingĩ. Asu onthe matũie Misili. Meetawa Aisilaeli, nũndũ Ngai nĩwaalyũlĩte syĩtwa ya Yakovo akamwĩta Isilaeli. Aisilaeli matw’ĩkie andũ ma mwanya mũno kwa Ngai, o tondũ twĩona ĩtina.
Mwambĩlĩlyo 45:1-28; 46:1-27.
Makũlyo
- Kweekĩkie ata yĩla Yosevu watavisye ana-a-ĩthe we nũũ?
- Yosevu aeleisye ana-a-ĩthe kyaũ kwa ĩnee?
- Valao aisye ata yĩla weewie ũvoo wa ana-a-ĩthe ma Yosevu?
- Andũ ma mũsyĩ wa Yakovo maĩ meana yĩla mathamĩĩie Misili?
- Andũ ma nyũmba ya Yakovo mambĩĩie kwĩtwa syĩtwa yĩva, na nĩkĩ?
Makũlyo ma kwongeleela
- Soma Mwambĩlĩlyo 45:1-28.
Ũvoo wa Mbivilia ĩũlũ wa Yosevu wĩonany’a ata kana Yeova nũtonya kũvĩndũa ũndũ ũla ũvangĩtwe kũũmĩsya andũ make na kutuma wĩthĩwa na umĩĩlĩlo mũseo? (Mwa. 45:5-8; Isa. 8:10; Avi. 1:12-14)
- Soma Mwambĩlĩlyo 46:1-27.
Nĩ ũĩkĩĩthyo mwaũ Yeova wanengie Yakovo e nzĩanĩ aendete Misili? (Mwa. 46:1-4.)
