Ngewa ya 29: Nĩkĩ Mose Wasembie Akĩa
KWASISYA Mose asembete aumĩte Misili. We nĩwene andũ aaya mamũsembanĩtye? Nĩwĩsĩ meenda kũmũaa nĩkĩ? Kwaeka tũsisye kana nĩtũtonya kũmanya.
Mose eanĩie nyũmbanĩ ya Valao, mũsumbĩ wa Misili. Nake atw’ĩka mũndũ mũĩ na mũnene mũno. Mose nĩweesĩ kana we ti Mũmisili, ĩndĩ asyai make maĩ Aisilaeli na maĩ ngombo.
Mũthenya ũmwe, yĩla waĩ na ũkũũ wa myaka 40, Mose atw’a nũkũthi akasisye ũndũ andũ moo maendee. Ũndũ meekawa waĩ ũthũku mũno. Nĩwoonie Mũmisili aikũna ngombo ĩmwe Mũisilaeli. Nake Mose asisya kũũ na kũũ na yĩla woonie vai mũndũ ũmũsyaĩĩsye, amũkũna Mũmisili ũsu akw’a. Na avitha mwĩĩ wake kĩthangathĩnĩ.
Mũthenya ũla watĩĩe Mose aumaala ĩngĩ akone andũ moo. Asũanĩaa ta ũtonya kũmatetheesya nĩ kana maeke kũendeea kwĩthĩwa me ngombo. Ĩndĩ oona aũme elĩ Aisilaeli mayũkita, kwoou Mose amwĩa ũla watheanĩte: ‘Wĩmũkũna mwana-a-au nĩkĩ?’
Nake mũndũ ũsu amũkũlya: ‘Nũũ ũla ũkũtw’ĩte mũnene na mũsili ĩũlũ witũ? Wĩsũanĩa kũmbũaa, o tondũ ũnamũwaie ũla Mũmisili?’
Mose yu ĩndĩ atelema. Amanya kaĩ andũ nĩmamanyĩte ũndũ ũneekanie na ũla Mũmisili. O na Valao nake nĩweewie ĩũlũ wa ũndũ ũsu, na atũma andũ makoae Mose. Kĩu nĩkyo kyatumie Mose asemba akĩe kuma Misili.
Yĩla Mose waumie Misili, aendie kũndũ kũasa mũno nthĩ ya Mitiani. Kũu eethĩie andũ ma mũsyĩ wa Yethilo na atwaa ũmwe wa eĩtu make weetawa Nzivola. Mose atw’ĩkie mũĩthi na aĩthasya malondu ma Yethilo. Ekalile nthĩ ya Mitiani myaka 40. Na yu aĩ na ũkũũ wa myaka 80. Na ĩndĩ mũthenya ũmwe Mose akĩĩthya malondu ma Yethilo, ũndũ wa ũsengy’a weekĩka ũla waalyũlile vyũ mwĩkalĩle wake. Ekai twone ũndũ ũsu wa ũsengy’a waĩ mwaũ.
Kuma 2:11-25; Meko 7:22-29.
Makũlyo
- Mose eanĩie kwaũ, ĩndĩ nũndũ mwaũ weesĩ ĩũlũ wa asyai make?
- Mose eekie ata yĩla waĩ na ũkũũ wa myaka 40?
- Mose eeie Mũisilaeli ũla wookitaa ata, na mũndũ ũsu amũsũngĩie ata?
- Nĩkĩ Mose wasembie akĩa kuma Misili?
- Mose akĩie athi va, na akomanie naũ kũu?
- Mose ekaa ata ĩvinda ya myaka 40 ĩtina wa kũkĩa kuma Misili?
Makũlyo ma kwongeleela
- Soma Kuma 2:11-25.
O na kau nĩwasomete myaka mingĩ ũĩ wa Amisili, Mose oonanisye ata kana alũmanĩtye na Yeova na andũ make? (Kuma 2:11, 12; Aevl. 11:24)
- Soma Meko 7:22-29.
Nĩ ũndũ mwaũ tũtonya kwĩmanyĩsya kumana na Mose kũtata kũtangĩĩa andũ ma Isilaeli kuma ũkombonĩ wa Amisili e weka? (Meko 7:23-25; 1 Vet. 5:6, 10)
