MYAKA ĩlĩ nĩyathelile Yosevu e o kolokolonĩ. Mũnengani wa mbinyu wa Valao ndaamũlilikana. Na ĩndĩ ũtukũ ũmwe Valao aota ndoto ilĩ sya mwanya mũno na asaanĩw’a nĩ ũalyũlo wasyo. We nũmwene akomete vaa? Ũnĩ ũsu kwakya, Valao nĩweetie andũ make onthe ala oĩ na amatavya maũndũ onthe ala woonie ndotonĩ. Ĩndĩ mayaatonya kũmũtavya ũalyũlo wa ndoto syake.

Yu ĩndĩ mũnengani wa mbinyu wa Valao amũlilikana Yosevu. Nake amwĩa Valao: ‘Yĩla naĩ kolokolonĩ kũu kwaĩ mũndũ waĩ atonya kũalyũla ndoto.’ Vau kwa vau Valao eeĩaa Yosevu aetwe kuma kolokolonĩ.

Valao nĩwamũeleisye Yosevu ndoto syake ũũ: ‘Nĩnoonie ng’ombe mũonza nou na nzeo. Na nasyoka noona ng’ombe mũonza mosu na ite nzeo. Na ng’ombe ila mosu syaya ila nou.

‘Nthĩnĩ wa ndoto yakwa ya kelĩ nĩnoonie iia mũonza nima na nzeo syamea mũtĩnĩ ũmwe. Na nasyoka noona iia ingĩ mũonza mboovu na ntheke. Na iia ntheke syambĩlĩlya kũmelya iia ila nzeo.’

Yosevu amwĩa Valao: ‘Ũalyũlo wa ndoto isu syelĩ nĩ ũmwe. Ng’ombe mũonza nou, na iia mũonza nzeo nĩ myaka mũonza, na ng’ombe mũonza mosu na iia mũonza mboovu nĩ myaka ĩngĩ mũonza. Kũkeethĩwa myaka mũonza ya lĩu mwingĩ Misili. Na ĩndĩ kũyĩthĩwa myaka mũonza ya lĩu mũnini mũno.’

Kwoou Yosevu amwĩa Valao: ‘Nyuva mũndũ mũĩ na ũimũia aũngamĩe kũmbany’a lĩu ĩvinda ya myaka ĩsu mũonza ya lĩu mwingĩ. Namo ĩndĩ andũ maikoawa nĩ nzaa ĩvinda ya myaka ĩsu ĩngĩ mũonza ya lĩu mũnini mũno.’

Valao nĩwendeeiw’e nĩ woni ũsu. Na amũnyuva Yosevu nĩ kana ombany’e lĩu na kũwia makũmbĩnĩ. Yosevu nĩwatw’ĩkie mũndũ wa kelĩ kwa ũnene kũatĩĩa Valao kũu nthĩ ya Misili.

Myaka nyanya ĩtina, ĩvinda ya yũa yĩu, Yosevu nĩwoonie aũme amwe mokĩte. We nĩwĩsĩ mo maĩ aaũ? Mo maĩ akũũe make 10! Ĩthe woo Yakovo nĩwamatũmĩte Misili nũndũ lĩu woo waĩ vakuvĩ kũthela kũu kwoo Kanaani. Yosevu nĩwamamanyie ana-a-ĩthe, ĩndĩ mo mayaamũmanya. We nĩwĩsĩ nĩkĩ? Nũndũ Yosevu aĩ e anie na ekĩĩte ngũa sya mũthemba ũngĩ.

Yosevu nĩwalilikanile kana yĩla waĩ kĩmwana nĩwaotie ndoto ĩũlũ wa ana-a-ĩthe mayũka na kũmũkumanĩa. We nũũlilikana ũisoma ĩũlũ wa ũvoo ũsu? Kwoou Yosevu aĩ atonya kwona kana nĩ Ngai wamũtũmĩte athi Misili na kwa kĩtumi kĩseo. We wĩsũanĩa Yosevu eekie ata? Ekai twone.

Mwambĩlĩlyo 41:1-57; 42:1-8; 50:20.