Saulo nĩwe watwĩkie mũsumbĩ wa mbee wa Isilaeli. Ĩndĩ Yeova nĩwamũleile, na Ndaviti anyuvwa atw’ĩke mũsumbĩ vandũ vake. Nĩtũkwona maũndũ maingĩ ĩũlũ wa Ndaviti. E mwanake, nĩwokitie na ĩmũndũ ĩnene yeetawa Ngoliathu. Ĩtina nĩwatolokile akĩa Mũsumbĩ wĩ kĩwĩu Saulo. Avikaili mũndũ mũka mũmbe nesa niwamũsiĩĩie ndakeke ũndũ wa ũtumanu.

Na ĩtina wa ũu, nĩtũkwĩmanyĩsya maũndũ maingĩ ĩũlũ wa Solomoni mwana wa Ndaviti, ũla wasumbĩkie Isilaeli ĩtina wa Ndaviti. Asumbĩ atatũ ma mbee ma Isilaeli masumbĩkie myaka 40 kĩla ũmwe. Ĩtina wa kĩkw’ũ kya Solomoni, Isilaeli nĩyatilĩkanile yatw’ĩka mosumbĩ elĩ, ũsumbĩ wa ĩũlũ na wa ĩtheo.

Ũsumbĩ wa ĩũlũ wa mbaĩ 10 wekalile myaka 257 mbee wa kwanangwa nĩ Asuli. Na ĩndĩ myaka 133 ĩtina, ũsumbĩ wa ĩtheo wa mbaĩ ilĩ o naw’o waanangwa. Ĩvinda yĩu Aisilaeli nĩmataviwe matwawa Mbaviloni. Kwoou Kĩlungu kya KANA kĩeleetye isitoli ya myaka 510, ĩvindanĩ yĩla tũkwona maũndũ maingĩ maũsanzamũkya.