ĨTINA wa Ndaviti kwambĩĩa kũsumbĩka e Yelusaleme, Yeova nĩwatonyethisye ita syake kũsinda amaitha moo mavinda maingĩ. Yeova nĩwathanĩte kana akanenga Aisilaeli nthĩ ya Kanaani. Na ĩndĩ ĩtina, kwa ũtethyo wa Yeova, nthĩ ĩsu yonthe mathĩtwe yatwĩka yoo.

Ndaviti aĩ mũsumbĩ mũseo. Nĩwendete Yeova. Kwoou ũndũ wa mbee ũla weekie amina ũkwata Yelusaleme nĩ kũete ĩsandũkũ ya Yeova ya ũtianĩo kũu. Na nĩwendaa kwaka ĩkalũ ya kũyĩia nthĩnĩ.

Na yĩla Ndaviti wakũangie, nĩweekie ĩvĩtyo ĩnene. Ndaviti nĩweesĩ kana nĩ ĩvĩtyo kwosa kĩndũ kya mũndũ ũngĩ. Ĩndĩ mũthenya ũmwe mawĩoo, e ĩũlũ wa kĩala kya nyũmba yake ya ũsumbĩ, nĩwasiisye ngalĩko ya nthĩ na oona mũndũ mũka mwanake mũno. Syĩtwa yake eetawa Mbathi-sieva, na mũũme wake aĩ ũmwe wa asikalĩ ma Ndaviti weetawa Ũlia.

Ndaviti nĩwamwendie mũno Mbathi-sieva kwoou atũmana aetwe nyũmbanĩ yake ya ũsumbĩ. Mũũme aĩ kaũnĩ. Na ĩndĩ, Ndaviti akoma nake na ĩtina amanya kana nĩ mũito. Ndaviti nĩwamakie mũno na kwoou atũmana kwa Yoavu, mũnene wa ita syake na amwĩa aie Ũlia mbee vala ve kaũ mũvyũ nĩ kana oawe. Yĩla Ũlia wakwie, Ndaviti nĩwamũtwaie Mbathi-sieva.

Yeova nĩwathilĩkile mũno nũndũ wa Ndaviti. Kwoou atũma mũthũkũmi wake Nathani akamũtavye ĩũlũ wa naĩ syake. Nũtonya kũmwona Nathani aineena na Ndaviti. Ndaviti nĩĩweelilile mũno nũndũ wa maũndũ ala weekĩte, na kwoou Yeova ndaamũaa. Ĩndĩ amwĩa: ‘Nũndũ nĩwĩkĩte maũndũ aa mathũku, ũkeethĩwa na thĩna mwingĩ mũno nthĩnĩ wa nyũmba yaku.’ Ndaviti akwatiwe nĩ thĩna mwingĩ ta kĩ!

Mbee, kana ka kavĩsĩ ka Mbathi-sieva nĩkakwie. Na ĩndĩ Aminoni ĩkithathi yake asya natianĩw’e na mwĩĩtu-a-ĩthe Tamali me elĩ, nake akoma nake na vinya. Avisalomu nake nĩwathatiw’e mũno nĩ ũndũ ũsu na ooaa Aminoni. Ĩtina Avisalomu nĩwendiwe nĩ andũ aingĩ, na eetw’a mũsumbĩ. Ĩtina vyũ, Ndaviti nĩwamũsindie Avisalomu kaũnĩ, na Avisalomu ooawa. Ĩĩ, Ndaviti nĩwakwatiwe nĩ thĩna mwingĩ.

O ĩvindanĩ yĩu, Mbathi-sieva nĩwasyaie mwana wĩtawa Solomoni. Atoniya mwana wa Ndaviti nĩwatatie kwĩtw’a mũsumbĩ. Ĩvinda yĩu Ndaviti aĩ mũkũũ na aĩ mũwau. Kwoou Ndaviti eeĩaĩa mũthembi wĩtawa Nzatoki etĩkĩsye mũtwe wa Solomoni mauta nĩ kenda onany’e kana nĩwe ũkũtw’ĩka mũsumbĩ. Na ĩvinda ĩkuvĩ ĩtina, Ndaviti akw’a e na ũkũũ wa myaka 70. Asumbĩkie kwa myaka 40, ĩndĩ yu Solomoni nĩwe mũsumbĩ wa Isilaeli.

2 Samueli 11:1-27; 12:1-18; 1 Asumbĩ 1:1-48.