Ngewa ya 69: Kelĩtu Katethisye Mũndũũme Wĩ Vinya
WE NĨWĨSĨ ũndũ kelĩtu kaa kanini kekwasya? Ketavya kĩveti kĩĩ ĩũlũ wa Elisa, mwathani wa Yeova, na maũndũ maũsengy’a ala Yeova wamũtetheeisye kw’ĩka. Kĩvetĩ kĩĩ kĩyĩsĩ ũvoo wa Yeova nũndũ kyo ti Kĩmũisilaeli. Ekai twone nĩkĩ kelĩtu kaa ke mũsyĩ kwa kĩveti kĩĩ.
Kĩveti kĩĩ kyaĩ Kĩmũsilia. Mũũme wakyo aĩ Naamani, mũnene wa ita sya Silia. Asilia matavie kelĩtu kaa kanini Kamũisilaeli, na makaete kwa mũka wa Naamani katw’ĩke kamũthũkũmi kake.
Naamani aĩ na ũwau mũthũku wĩtawa mangũ. Ũwau ũsu nũtonya kũtuma nyama imwe sya mwĩĩ itilĩkanga. Kwoou kelĩtu kaa kamwĩa mũka wa Naamani atĩĩ: ‘Kethĩwa mwĩaĩi wakwa nũthi kwa mwathani wa Yeova kũya Isilaeli. We no amũvosye mangũ make.’ Ĩtina mũũme wa kĩveti kĩĩ nĩwataviw’e ndeto isu.
Naamani nĩwendaa mũno kũvow’a; kwoou atw’a nũkũthi Isilaeli. Na avika kũu, athi nyũmbanĩ ya Elisa. Nake Elisa eea mũthũkũmi nĩaende atavye Naamani athi akathambe Ũsĩnĩ wa Yolotani mavinda mũonza. Ũndũ ũsu wamũthatisye Naamani mũno, na asya: ‘Mbũsĩ ila syĩ kũya mũsyĩ ti nzeo mbee wa ũsĩ o na wĩva wa nthĩ ya Isilaeli!’ Ĩtina wa kwasya ũu Naamani nĩweethyũũie na athi.
Ĩndĩ athũkũmi make mamwĩa: ‘Vwana, kethĩwa Elisa akwĩa wĩke ũndũ mũnene, wĩthĩwa weeka. Yu we wĩema kũthamba nĩkĩ, o tondũ wakũtavya?’ Naamani nĩweethukĩĩisye athũkũmi make na athi eethika mavinda mũonza Ũsĩnĩ wa Yolotani. Yĩla weekie ũu, mwĩĩ wake wavoa na waseũva!
Naamani nĩwatanie mũno. Na asyoka kwa Elisa na amwĩa: ‘Yu nĩnĩsĩ ki kana Ngai wa Isilaeli nĩwe Ngai wa w’o weka nthĩ yonthe. Kwoou, nĩngũkwĩsũva, osa mũthĩnzĩo ũũ kuma kwakwa.’ Ĩndĩ Elisa asũngĩa: ‘Aiee, nyie ndiwosa.’ Elisa nĩweesĩ kana wĩthĩwa wĩ ũndũ mũthũku kwosa mũthĩnzĩo ũsu nũndũ Yeova nĩwe wavoetye Naamani. Ĩndĩ Ngeasi, mũthũkũmi wa Elisa nĩwendie kũwosa.
Kwoou ũũ nĩw’o weekie. Naamani amina kũthi, Ngeasi nĩwasembie amũatĩĩa na amwĩa: ‘Elisa nĩwandũma nĩkwĩe kana nũkwenda mũthĩnzĩo waku kwondũ wa aeni matũthokea oyu.’ Vate nzika ũsu waĩ ũvũngũ. Ĩndĩ Naamani ndeesĩ; kwoou amũnenga syĩndũ imwe.
Yĩla Ngeasi wasyokie mũsyĩ, Elisa nĩweesĩ ũndũ weeka. Yeova nĩwamũtavĩtye. Kwoou amwĩa: ‘Kĩtumi nũndũ nĩweeka ũndũ ũũ mũthũku, mangũ ma Naamani nue meũkwata.’ Na mamũkwata o vau kwa vau!
Tũtonya kwĩmanyĩsya kyaũ kũmana na ũvoo ũũ wonthe? Mbee, nĩtwaĩlĩte kwĩthĩwa tũilyĩ ta kala kelĩtu kanini na kũneenaa ĩũlũ wa Yeova. Ũu nũtonya kũete moseo maingĩ. Kelĩ, tũyaĩlĩte kwĩthĩwa twĩ na mĩyono o tondũ Naamani wailyĩ mbee, ĩndĩ nĩtwaĩlĩte kũmew’a athũkũmi ma Ngai. Na katatũ, tũyaĩlĩte kũkengana o tondũ Ngeasi weekie. Ithyĩ tyo twĩmanyĩsye maũndũ maingĩ kwa kũsoma Mbivilia?
2 Asumbĩ 5:1-27
Makũlyo
- Kelĩtu kaa kanini keĩa kĩveti kĩĩ ata vaa visanĩ?
- Kĩveti kĩĩ kĩ visanĩ nũũ, na kelĩtu kaa kanini keĩka ata nyũmbanĩ yakyo?
- Elisa eeĩaĩe mũthũkũmi wake atavye Naamani ata, nake Naamani athatiw’e nĩ kyaũ?
- Kweethĩiwe ata Naamani eethukĩĩsya athũkũmi make?
- Eliya aleile mũthĩnzĩo wa Naamani nĩkĩ, na Ngeasi eekie ata?
- Kweethĩiwe ata kwa Ngeasi, na ũndũ ũsu ũtonya kũtũmanyĩsya kyaũ?
Makũlyo ma kwongeleela
- Soma 2 Asumbĩ 5:1-27.
Ngelekany’o ĩla yaiiwe nĩ kelĩtu kanini ka Isilaeli ĩtonya kũsyĩkĩa syana vinya ata ũmũnthĩ? (2 Asu. 5:3; Sav. 8:2; 148:12, 13)
Nĩkĩ nĩ ũndũ mũseo kũia kĩlĩkonĩ ngelekany’o ya Naamani yĩla twanengwa ũtao kuma Maandĩkonĩ? (2 Asu. 5:15; Aevl. 12:5, 6; Yak. 4:6)
Nĩ ĩsomo yaũ tũtonya kwĩmanyĩsya kwa kũsianĩsya ngelekany’o ya Elisa na ĩla ya Ngeasi? (2 Asu. 5:9, 10, 14-16, 20; Mt. 10:8; Meko 5:1-5)
No Wendeewʼe Nĩ Ii
ĨTHĨWA WĨ MŨNYANYA WA YEOVA
Yeova Akaũtetheesya Wĩthĩwe na Ũkũmbaũ
Nĩ kyaũ kĩtonya kũũtetheesya wĩthĩwe na ũkũmbaũ nĩ kana ũmatavye angĩ ĩũlũ wa Yeova?
