Ngewa ya 87: Kamwana Yesũ ke Ĩkalũnĩ
KWASISYA kamwana kaa kanini keũneena na atumĩa aa. Nĩ alimũ ma ĩkalũ ya Yelusaleme. Nako kamwana nĩ Yesũ. Nũminĩte kwĩananga. Yu e na ũkũũ wa myaka 12.
Alimũ asu nĩmaseng’ete mũno nũndũ Yesũ nĩwĩsĩ maũndũ maingĩ mũno ĩũlũ wa Ngai na maũndũ ala me Mbivilianĩ. Ĩndĩ nĩkĩ Yosevu na Meli matevaa o namo? Mo maĩ va? Ekai twone.
Kĩla mwaka Yosevu aetae andũ ma mũsyĩ wake Yelusaleme mbokanĩ ya mwanya yeetawa Vasaka. Kyaĩ kyalo kĩasa kuma Nasaleti kũvika Yelusaleme. Vai ũmwe waĩ na mũtokaa, o na kũyaĩ ngalĩ sya mwaki. Syĩndũ isu iyaĩ kw’o mĩthenya ĩsu. Andũ aingĩ maendaa na maaũ, na maendaa ta ĩvinda ya mĩthenya ĩtatũ nĩ kana mavike Yelusaleme.
Kũvika ĩvinda yĩu Yosevu aĩ na mũsyĩ mũnene. We aĩ na syana ingĩ sya kũea, nasyo nĩ ana-a-inyia na eĩtu-a-inyia ma Yesũ. Mwaka ũsu Yosevu na Meli na syana syoo nĩmambĩĩie kyalo kĩu kĩasa kya kũsyoka mũsyĩ Nasaleti. Masũanĩaa kana Yesũ e vamwe na ala angĩ menũkanĩtye namo. Ĩndĩ yĩla mathũmũie mũthenya wathela, mayaamwona Yesu. Na mamũmantha andũnĩ ma mbaĩ yoo na anyanyae, ĩndĩ ndaĩ namo! Kwoou masyoka Yelusaleme makamũmanthe kw’o.
Ĩtina vyũ mamwĩthĩa vaa e na alimũ. Aendee na kũmethukĩĩsya na kũmakũlya makũlyo. Na andũ onthe nĩ maseng’aa nũndũ Yesũ ũĩvĩte. Ĩndĩ Meli asya: ‘Mwana, ũtwĩkie ũu nĩkĩ? Ĩthe waku nakwa twĩkũmanthaa na kyeva.’
Nake Yesũ amakũlya: ‘Mwĩmanthĩaa kĩ? Mũyĩsĩ kana naĩlĩte kwĩthĩwa nyũmbanĩ ya Asa wakwa?’
Yesũ nĩwendete kwĩthĩwa vandũ ũtonya kwĩmanyĩsya ĩũlũ wa Ngai. O naitũ nĩtwaĩlĩte kwĩthĩwa na wendi ũsu. Kũya mũsyĩ Nasaleti, Yesũ nĩwaendaa maũmbanonĩ ma ũthaithi kĩla kyumwa. Na nũndũ ĩvinda yonthe nĩweethukĩĩasya, nĩweemanyĩisye maũndũ maingĩ kuma Mbivilianĩ. Ekai twĩkale ta Yesũ na tũiatĩĩaa ngelekany’o yake.
Luka 2:41-52; Mathayo 13:53-56.
Makũlyo
- Yesũ ena ũkũũ mwaũ vaa visanĩ, na e va?
- Yosevu ekaa ata na andũ ma mũsyĩ wake kĩla mwaka?
- Ĩtina wa kũthi kyalo kya mũthenya ũmwe menũkĩte mũsyĩ, nĩkĩ Yosevu na Meli masyokie Yelusaleme?
- Yosevu na Meli mamwĩthĩie Yesũ va, na nĩkĩ andũ ala me vau maseng’ete?
- Yesũ eeie Meli inyia wake ata?
- Tũtonya kwĩthĩwa tũilyĩ ta Yesũ ata nthĩnĩ wa kwĩmanyĩsya ĩũlũ wa Ngai?
Makũlyo ma kwongeleela
- Soma Luka 2:41-52.
O na kau Mwĩao waĩtye aũme me oka tũ maendae mbokanĩ sya kĩla mwaka, nĩ ngelekany’o myaũ nzeo Yosevu na Meli maiĩie asyai ma ĩvinda yĩĩ? (Lk. 2:41; Kũt. 16:16; 31:12; Nth. 22:6)
Yesũ aiie ngelekany’o nzeo ata kwa andũ ma mũika ũmũnthĩ ĩũlũ wa kwĩnyivĩsya asyai moo? (Lk. 2:51; Kũt. 5:16; Nth. 23:22; Ako. 3:20)
- Soma Mathayo 13:53-56.
Ana-a-inyia ma Yesũ ma kĩmwĩĩ ala mawetetwe nthĩnĩ wa Mbivilia naaũ, na elĩ katĩ woo mesie kũtũmĩwa ata nthĩnĩ wa kĩkundi kya Kĩklĩsto? (Mt. 13:55; Meko 12:17; 15:6, 13; 21:18; Aka. 1:19; Yak. 1:1; Yuta 1)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ na Andũ Ala Angĩ ma Mũsyĩ Nĩmaendie Yelusaleme
Yosevu na Meli nĩmatelemile yĩla maleile kũmwona Yesũ. Yesũ nĩwaseng’ie mũno amanya kana mayeesĩ vala waĩle kwĩthĩwa aĩ.
