Ngewa ya 96: Yesũ Aivosya Awau
YESŨ nĩwavoasya awau o aendee na kyalo kyake kũthyũlũlũka nthĩ ĩsu yonthe. Ũvoo wa syama isu nĩwatavaniw’e mĩsyĩnĩ na ndũanĩ syonthe ila syaĩ vakuvĩ. Kwoou andũ mamũetee ala maĩ syonze na ilalinda na ala matatonya kũneena, na awau angĩ aingĩ. Na Yesũ amavosya onthe.
Yu myaka ĩtatũ na kĩndũ nĩ mĩvĩtu kuma yĩla Yoana wavatisie Yesũ. Kwoou Yesũ amea amanyĩw’a make kana o mĩtũkĩ akambata athi Yelusaleme, kũla ũkoaĩwa na ĩndĩ aithayũũkw’a. Ĩndĩ atanamba kũthi Yelusaleme, Yesũ nĩwaendeeie na kũvosya awau.
Mũthenya ũmwe Yesũ nĩwamanyĩasya mũthenya wa Savato. Savato waĩ mũthenya wa kũthũmũa wa Ayuti. Mũndũ mũka ũũ ũkwona vaa ethĩĩtwe e mũwau mũno. Kwa myaka 18 we aendaa akunguutĩtye, na ndaĩ atonya kũũngalala. Kwoou Yesũ amwilĩĩla moko make, na ambĩĩa kũũngalala. Nake avoa!
Ũndũ ũsu nĩwathatisye atongoi ma ndĩni mũno. Na ũmwe woo akũthũkĩa ĩkomano ayasya, ‘Kwĩ mĩthenya thanthatũ ĩla twaĩlwe nĩ kũtethya wĩa. Ĩsu nĩyo mĩthenya ya kũka mũvow’e, ĩndĩ ti mũthenya wa Savato!’
Nake Yesũ asũngĩa: ‘Inyw’ĩ andũ athũku. Kĩla ũmwe wenyu ndathaasya ĩng’oi yake vala yovetwe mũthenya wa Savato akatwaa kũyĩnyithya? Kwoou mũndũ mũka ũũ mũthĩni, ũtwĩe e mũwau myaka 18, ndaĩlĩte nĩ kũvow’a mũthenya wa Savato?’ Ũsũngĩo wa Yesũ watumie andũ asu athũku masonoka.
Ĩtina Yesũ na atũmwa make nĩmaendeeie na kyalo melekele Yelusaleme. Na me nza ya ndũa ya Yeliko, ilalinda ilĩ syaĩ avoyi ma syĩndũ syeew’a kana Yesũ nũvĩtĩte. Kwoou syaneena na wasya mũnene iyasya: ‘Yesũ, tũtethye!’
Yesũ nĩweetie aũme asu ilalinda na amakũlya: ‘Mwĩenda nĩmwĩke ata?’ Namo masya: ‘Mwĩaĩi, tũsalukye metho maitũ.’ Yesũ akiita metho moo, na vau kwa vau mambĩĩa kwona! We nĩwĩsĩ nĩkĩ Yesũ weekaa syama ii syonthe nzeo? Kĩtumi nũndũ nĩwendete andũ na nĩweendaa mamũĩkĩĩe. Kwoou nĩtũtonya kwĩthĩwa na ũ w’o kana yĩla ũkatw’ĩka Mũsumbĩ vaiĩ mũndũ ĩũlũ wa nthĩ ũkawaa ĩngĩ.
Mathayo 15:30, 31; Luka 13:10-17; Mathayo 20:29-34.
Makũlyo
- Yesũ eekie ata o aendee na kũthi kũũ na kũũ nthĩ ĩsu yonthe?
- Yesũ atavisye atũmwa make ata myaka ĩtatũ ĩtina wa ũvatiso wake?
- Andũ aa me visanĩ naaũ, na Yesũ eĩkana ata na mũndũ mũka ũũ?
- Nĩkĩ ũsũngĩo wa Yesũ kwa ũvinganĩsya wa atongoi ma ndĩni watumie masonoka?
- Yĩla Yesũ na atũmwa make maĩ vakuvĩ na Yeliko, Yesũ amekie ata avoyi elĩ ilalinda?
- Yesũ ekaa syama nĩkĩ?
Makũlyo ma kwongeleela
- Soma Mathayo 15:30, 31.
Yesũ oonanisye ata vinya wa Yeova kwa nzĩa ya ũsengy’a, na ũu waĩlĩte kũtuma twĩthĩwa na woni mwaũ ĩũlũ wa maũndũ ala Yeova wathanĩte makonanĩtye na nthĩ nzaũ? (Sav. 37:29; Isa. 33:24)
- Soma Luka 13:10-17.
Nũndũ Yesũ eekie imwe sya syama syake nene vyũ mũthenya wa Savato, ũu wĩonany’a ata ĩũlũ wa ũthyũmũo ũla we ũkaetee andũ ĩvinda ya Ũsumbĩ wake wa Myaka Ngili? (Lk. 13:10-13; Sav. 46:9; Mt. 12:8; Ako. 2:16, 17; Ũvu. 21:1-4)
- Soma Mathayo 20:29-34.
Ũvoo ũũ wĩonany’a ata kana Yesũ ndetalaa ta wĩna wĩa mwingĩ mũno ũndũ ũtatonya kũtethya andũ, na tũtonya kwĩmanyĩsya kyaũ kumana na ũndũ ũsu? (Kũt. 15:7; Yak. 2:15, 16; 1 Yoa. 3:17)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Nũũ Wamũnengete Yesũ Vinya wa Kwĩka Syama?
Ana-a-inyia ma Yesũ masũanĩaa Yesũ ta wĩ na thĩna wa kĩlĩko.
