Ngewa ya 98: E Kĩĩmanĩ kya Mĩthata
ŨYŨ nĩ Yesũ e Kĩĩmanĩ kya Mĩthata. Andũ asu ana wĩ namo nĩ atũmwa make. Namo nĩ Andalea na mwana-a-inyia Vetelo, na Yakovo na mwana-inyia Yoana. Yĩĩya ũkwona vaaya mbee nĩ ĩkalũ ya Ngai yĩla yaĩ Yelusaleme.
Nĩ mĩthenya ĩlĩ mĩthelu kuma yĩla Yesũ ũnalikile Yelusaleme akuĩtwe nĩ ndena ya ĩng’oi. Nĩ Wakelĩ. Mũthenya ũsu makwakya Yesũ aĩ ĩkalũnĩ. Na kũu athembi matata kũmũkwata mamũae. Ĩndĩ makĩa kwĩka ũu nũndũ andũ nĩmamwendete Yesũ.
Yesũ eetie atongoi asu ma ndĩni: ‘Nzoka na ũsyao wa nzoka!’ Na Yesũ amea kana Ngai akamasilĩla nũndũ wa maũndũ mathũku ala meekĩte. Ĩtina wa ũu Yesũ nĩwambatie Kĩĩmanĩ kya Mĩthata, na ĩndĩ atũmwa asu ana mambĩĩa kũmũkũlya makũlyo. We nĩwĩsĩ mekũlya ata?
Mekũlya ĩũlũ wa maũndũ ma ĩvinda yĩla yũkĩte. Nĩmeesĩ kana Yesũ akavetanga ũthũku w’onthe ĩũlũ wa nthĩ. Ĩndĩ meenda kũmanya yĩla ũu ũkethĩwa. Yesũ akooka ĩngĩ ĩndĩĩ kũsumbĩka ta Mũsumbĩ?
Yesũ nĩwĩsĩ kana aatĩĩi make ĩũlũ wa nthĩ maikethĩwa matonya kũmwona yĩla ũkasyoka ĩngĩ e Mũsumbĩ. Kĩtumi nũndũ akeethĩwa e ĩtunĩ, na maikethĩwa matonya kũmwona e kũu. Kwoou Yesũ nĩwatavisye atũmwa make maũndũ amwe ala makethĩwa mayĩkĩka ĩũlũ wa nthĩ yĩla ũkethĩwa asumbĩkĩte ĩtunĩ. Maũndũ asu nĩ meva?
Yesũ aisye kana kũkeethĩwa na makaũ manene, na andũ aingĩ makeethĩwa me awau na mena nzaa, ũtũli wa mĩao ũkeethĩwa wĩ mwingĩ mũno, na kũkeethĩwa na itetemo nene sya nthĩ. Na ĩngĩ nĩwaisye kana ũvoo mũseo wa ũsumbĩ wa Ngai ũkatavanw’a kĩla vandũ ĩũlũ wa nthĩ. Nĩtwonete maũndũ asu mayĩkĩka ĩvindanĩ yitũ? Ĩĩ! Na kwoou nĩtũtonya kwĩthĩwa na w’o ki kana Yesũ yu nũsumbĩkĩte ĩtunĩ. O mĩtũkĩ akavetanga ũthũku w’onthe ĩũlũ wa nthĩ.
Mathayo 21:46; 23:1-39; 24:1-14; Maliko 13:3-10.
Makũlyo
- Nthĩnĩ wa visa ũũ, Yesũ nĩwe wĩva, na asu me vamwe nake naaũ?
- Athembi matatie kũmwĩka Yesũ ata e ĩkalũnĩ, nake ameie ata?
- Atũmwa mamũkũlilye Yesũ ata?
- Nĩkĩ Yesũ watavisye atũmwa make maũndũ amwe ala makethĩwa mayĩkĩka ĩũlũ wa nthĩ yĩla ũkethĩwa asumbĩkĩte ĩtunĩ?
- Yesũ aisye kũkeethĩwa ata mbee wa atanavetanga ũthũku ĩũlũ wa nthĩ?
Makũlyo ma kwongeleela
- Soma Mathayo 23:1-39.
O na kau Maandĩko monanĩtye kana kũtũmĩa masyĩtwa ma ũnene no kwĩthĩwe kwaĩle nthĩnĩ wa mawĩa ma nthĩ, ndeto sya Yesũ nthĩnĩ wa Mathayo 23:8-11 syĩonany’a ata ĩũlũ wa kũtũmĩa masyĩtwa ma ngathĩĩo ma ũnene kĩkundinĩ kya Kĩklĩsto? (Meko 26:25; Alo. 13:7; 1 Vet. 2:13, 14)
Avalisi matũmĩaa kyaũ nĩ kana masiĩĩe andũ maikatw’ĩke Aklĩsto, namo atongoi ma ndĩni methĩĩtwe maitũmĩa nzĩa ta isu ata ĩvindanĩ yitũ? (Mt. 23:13; Lk. 11:52; Yoa. 9:22; 12:42; 1 Ath. 2:16)
- Soma Mathayo 24:1-14.
Vata wa wũmĩĩsyo ũkindĩlĩĩlwe ata nthĩnĩ wa Mathayo 24:13?
Ndeto ĩno “mũminũkĩlyo” nthĩnĩ wa Mathayo 24:13 yĩonany’a ata? (Mt. 16:27; Alo. 14:10-12; 2 Ako. 5:10)
- Soma Maliko 13:3-10.
Nĩ ndeto syĩva nthĩnĩ wa Maliko 13:10 ikwonany’a kana ũvoo mũseo nĩwaĩlĩte kũtavanw’a na mĩtũkĩ, na ndeto isu sya Yesũ syaĩlĩte ũtũthangaasya twĩke ata? (Alo. 13:11, 12; 1 Ako. 7:29-31; 2 Tim. 4:2)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Atũmwa Nĩmakũlilye Manengwe Wonany’o
Wathani wake weanĩiw’e ya mbee ĩvinda ya atũmwa. Wathani ũsu nĩwaĩ wĩse kwĩanĩa kwa nzĩa nene ĩvinda yũkĩte?
MŨSYAĨĨSYA
W’O Mũminũkĩlyo wĩ Vakuvĩ?
Kwasũanĩa ĩũlũ wa maũndũ ana ala maeleetw’e Mbivilianĩ monanĩtye nesa vyũ kana twĩ ĩvindanĩ ya mũminũkĩlyo.
