Mũthenya wa katatũ ĩtina wa kũkw’a kwake, Yesũ nĩwathayũũkiw’e. Mũthenya o ũsu nĩwaumĩlĩĩile aatĩĩi make mavinda atano me kĩvathũkany’o. Yesũ nĩwaendeeie na kũmaumĩlĩĩla kwa matukũ 40. Na ĩndĩ, amwe ma amanyĩw’a make masyaĩĩsye, Yesũ ambata ĩtunĩ. Matukũ ĩkũmi ĩtina, Ngai nĩwamonoeisye veva mũtheu aatĩĩi ma Yesũ ala meeteele me Yelusaleme.

Ĩtina, amaitha ma Ngai nĩmatumie atũmwa mekw’a kolokolonĩ, ĩndĩ mũlaĩka amathasya. Avinganĩsya nĩmamũkimangie mũmanyĩw’a Sitivini na mavia akw’a. Ĩndĩ nĩtũkwĩmanyĩsya ũndũ Yesũ wanyuvie ũmwe wa avinganĩsya asu ethĩwe mũthũkũmi wake wa mwanya, nake atw’ĩka mũtũmwa Vaulo. Na ĩndĩ, myaka ĩtatũ na nyusu ĩtina wa kĩkw’ũ kya Yesũ, Ngai atũma mũtũmwa Vetelo akamũtavye Kolinelio, mũndũ ũtaĩ Mũyuti, na andũ ma nyũmba yake.

Ta myaka 13 ĩtina, Vaulo nĩwambĩĩie kyalo kyake kya mbee kya kũthi kũtavany’a. Na e kyalonĩ kyake kya kelĩ, Timotheo aendany’a nake. Nĩtũkwĩmanyĩsya ũndũ Vaulo na ala waendanĩtye namo moonie maũndũ maingĩ ma kũsanzamũkya nthĩnĩ wa kũmũthũkũma Ngai. Ĩtina vyũ, Vaulo nĩweekĩiwe kolokolonĩ kũya Lomi. Na myaka ĩlĩ ĩtina alekw’a, ĩndĩ nĩweekĩiw’e kolokolonĩ ĩngĩ na ooawa. Maũndũ ma KĨLUNGU kya 7 meekĩkie kwa ĩvinda ya ta myaka 32.