Ngewa ya 102: Yesu e Thayũ
WE NĨWĨSĨ mũndũ mũka ũũ na aũme aa elĩ naaũ? Ũ mũndũ mũka nĩ Meli Makatalene, mũmanyĩw’a wa Yesũ. Namo andũ asu mekĩĩte ngũa nzaũ nĩ alaĩka. Kasũmba kaa kanini Meli ũkũkunĩkĩla nthĩnĩ nĩvo mwĩĩ wa Yesũ waiiwe amina kũkw’a. Ketawa mbũa. Ĩndĩ yu ũ mwĩĩ ndwĩvo! Wosiwe nũũ? Ekai twone.
Ĩtina wa Yesũ kũkw’a, athembi nĩmamwĩie Vilato ũũ: ‘Yĩla Yesũ waĩ thayũ aisye kana akathayũũkw’a ĩtina wa mĩthenya ĩtatũ. Kwoou ĩae mbũa ĩsyaĩĩw’e nĩ kana amanyĩw’a make maikoye mwĩĩ wake na kwasya kana nũnathayũũkiw’e.’ Na Vilato eea athembi nĩmatũme asikalĩ makasunge ĩ mbũa.
Ĩndĩ mũthenya wa katatũ ĩtina wa Yesũ kũkw’a, o kwa mĩtũkĩ mũlaĩka wa Yeova avika. Na avingilitya ĩvia kuma mbũanĩ. Asikalĩ meewie w’ĩa mũno weethĩa maitonya kũtambya. Na ĩtina vyũ makunĩkĩla mbũanĩ, meethĩa mwĩĩ ndwĩvo! Asikalĩ amwe nĩmaendie ndũanĩ na matavya athembi. We nĩwĩsĩ ũndũ athembi asu athũku meekie? Manengie asikalĩ asu mbesa nĩ kana maneene ũvũngũ. Namo athembi mamea: ‘Asyai kana amanyĩw’a make mokie ũtukũ, yĩla mwĩĩkomete, na mooya mwĩĩ wake.’
Ĩvindanĩ o yĩu, aka amwe amanyĩw’a ma Yesũ nĩmookie kũsisya mbũa. Maseng’ie ta kĩ kwĩthĩa mbũa yĩ nthei! Ĩndĩ o vau kwa vau alaĩka elĩ maumĩla mekĩĩte ngũa ĩũtisatisa. Namo mamakũlya, ‘Nĩkĩ mũũmũmantha Yesũ vaa? Nũthayũũkĩtw’e. Endai na mĩtũkĩ mũkatavye amanyĩw’a make.’ Aka asu masembie na mĩtũkĩ ta kĩ! Ĩndĩ me nzĩanĩ mũndũ amaũngamya. Nĩwĩsĩ mũndũ ũsu aĩ ũũ? Aĩ Yesũ! Nake amea ‘Endai mũtavye amanyĩw’a makwa.’
Aka asu matavya amanyĩw’a kana Yesũ e thayũ na nĩmamwona, amanyĩw’a malea kũĩkĩĩa. Na Vetelo na Yoana masemba mathi mbũanĩ makeyonee mo ene, ĩndĩ mbũa yaĩ nthei! Vetelo na Yoana mathi, Meli Makatalene nĩwatiiwe ĩtina. Yu nĩw’o wakunĩkĩlile nthĩnĩ na oona ala alaĩka elĩ.
We nĩwĩsĩ mwĩĩ wa Yesũ weekiwe ata? Ngai nĩwaũvetangie. Ngai ndaamũthayũũkya Yesũ ethĩwe thayũ na mwĩĩ wa nyama ũla wakwie naw’o. Amũnengie mwĩĩ mweũ wa kĩveva, ta wa alaĩka ĩtunĩ. Ĩndĩ nĩ kana ony’e amanyĩw’a make e thayũ, we aĩ atonya kwĩvw’ĩka mwĩĩ ũla andũ matonya kwona, o tondũ tũũsyoka kwĩmanyĩsya.
Mathayo 27:62-66; 28:1-15; Luka 24:1-12; Yoana 20:1-12.
Makũlyo
- Mũndũ mũka ũũ wĩ visanĩ nũũ, namo aũme aa elĩ naaũ, na me va?
- Nĩkĩ Vilato weeie athembi nĩmatũme asikalĩ makasũvĩe mbũa ya Yesũ?
- Mũlaĩka eekie ata kwakya tene mũno mũthenya wa katatũ ĩtina wa Yesũ kũkw’a, ĩndĩ athembi meekie ata?
- Aka amwe maseng’ie nĩkĩ yĩla maendie kũsisya mbũa ya Yesũ?
- Nĩkĩ Vetelo na Yoana masembie mbũanĩ ya Yesũ, namo meethĩie ata?
- Mwĩĩ wa Yesũ waendie va, ĩndĩ eekie ata nĩ kana amony’e amanyĩw’a kana we e thayũ?
Makũlyo ma kwongeleela
- Soma Mathayo 27:62-66 na 28:1-15.
Ĩvinda ya kũthayũũkw’a kwa Yesũ, athembi anene, Avalisi, na atumĩa meekie naĩ ĩũlũ wa veva mũtheu ata? (Mt. 12:24, 31, 32; 28:11-15
- Soma Luka 24:1-12.
Ũvoo ĩũlũ wa kũthayũũka kwa Yesũ wĩonany’a ata kana Yeova nĩwonaa aka ta ngũsĩ itonya kwĩkwatw’a? (Lk. 24:4, 9, 10; Mt. 28:1-7)
- Soma Yoana 20:1-12.
Ĩandĩko ya Yoana 20:8, 9 yĩtũtetheesya ata kwona vata wa kwĩthĩwa na wũmĩĩsyo ethĩwa tũikũelewa vyũ nĩkwĩanĩw’a kwa wathani wa Mbivilia? (Nth. 4:18; Mt. 17:22, 23; Lk. 24:5-8; Yoa. 16:12)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ Athayũũkw’a Nĩwaumĩlĩĩile Andũ Aingĩ
Yesũ aĩkĩĩthisye amanyĩw’a make ata kana aĩ thayũ?
MŨSYAĨĨSYA
Kũkw’a na Kũthayũũka kwa Yesũ Kũtonya Kũũtethya Ata?
Momanyĩsyo ma mũsingi ma Mbivilia nĩmaeleetye ũndũ kĩkw’ũ kya mũndũ ũmwe kĩtonya kũetee andũ aingĩ thayũ.
