Ngewa ya 112: Kwanangĩkĩwa Nĩ Ngalawa Kĩthamanĩ
KWASISYA! ngalawa yĩ thĩnanĩ! Ĩendee na kũtilĩkanga ilungu! We nũkwona andũ asu meeyĩkya kĩw’ũnĩ? Amwe nĩmaminĩte kũthambĩa makaumĩla ũtee wa ũkanga. Ũya nĩ Vaulo wĩ vaya? Ekai twone maũndũ ala methĩĩtwe maimũkwata.
Lilikana, kwa myaka ĩlĩ Vaulo asiĩĩwe Kaisalea e mwovwa. Na ĩndĩ we na ovwa angĩ malikw’a ngalawanĩ na makũsya melekele Lomi. Na yĩla mavĩtĩile vakuvĩ na kĩthama kya Kilete, makomana na kĩuutani kĩnene mũno. Kyauutanie na vinya mũno nginya atwai ma ngalawa maemwa nĩkũmĩtwaa. Na mayaĩ matonya kwona syũa mũthenya kana ndata ũtukũ. Ĩtina vyũ, mĩthenya mingĩ yathela, ala maĩ ngalawanĩ maasya wĩkwatyo wa kũvonoka.
Vaulo ĩndĩ aũngama na asya: ‘Vaiĩ ũmwe wenyu wĩasya thayũ wake; ngalawa noyo yĩanangĩka. Nũndũ ũtukũ mũlaĩka wa Ngai nũmbũkĩie na ambĩa: “Ndũkakĩe, Vaulo! No mũvaka ũũngame mbee wa Kaisali, mũsumbĩ wa Alomi. Na Ngai akatangĩĩa onthe ala me ngalawanĩ vamwe naku.”’
Ta ũtukũ katĩ mũthenya wa 14 ĩtina wa kĩla kĩuutani kwambĩĩa, atwai ma ngalawa nĩmoonie kana kĩw’ũ nĩkĩendee na kwĩthĩwa kĩte kĩliku! Na nũndũ wa ũkĩa kũkima mavia kĩvindunĩ, matheesya nanga syoo. Ũnĩ ũsu kwakya moona nthĩ nyũmũ. Namo matw’a nĩmatate kũtwaa ngalawa nginya vau.
Yĩla mathengee ũtee wa ũkanga, ngalawa yatina kĩthangathĩ na yalũma. Na ĩndĩ itulumo syambĩĩa kũmyananga, nayo yambĩĩa kũtilĩkanga ilungu. Na mũsikalĩ ũla waũngamĩe asya: ‘Inyw’onthe ala mũtonya kũthambĩa ĩyĩkyei ũkanganĩ na mũithambĩa mũvike nthĩ nyũmũ. Nenyu ala mwatiala ĩyĩkyei ĩtina woo, na mũyĩkwatĩla ilungu sya mbwaũ sya ngalawa.’ Na ũu nĩw’o meekie. Kwa nzĩa ĩsu andũ 276 ala maĩ ngalawanĩ nĩmavikie nthĩ nyũmũ o nesa, o tondũ mũlaĩka wathanĩte.
Kĩthama kĩu kĩtawa Melita. Andũ ma kũu maĩ aseo mũno, na nĩmathokisye ala maumie ngalawanĩ. Na nzeve yaseũva, Vaulo nĩwalikilw’e ngalawanĩ ĩngĩ na atwawa Lomi.
Meko 27:1-44; 28:1-14.
Makũlyo
- Ngalawa ĩla Vaulo waĩ nthĩnĩ wayo yakwatiwe nĩ kyaũ vakuvĩ na kĩthama kya Kilete?
- Vaulo amatavisye ata ala maĩ nthĩnĩ wa ngalawa ĩsu?
- Ngalawa ĩsu yatilĩkangie ilungu ata?
- Nĩ mawatho maũ mũnene wa asikalĩ wanenganie, na nĩ andũ meana ata maumĩlile nginya nthĩ nyũmũ me aima?
- Kĩthama kĩu mavikie kĩtawa ata, na kweethĩiwe ata kwa Vaulo nzeve yaseũva?
Makũlyo ma kwongeleela
- Soma Meko 27:1-44.
Mũĩkĩĩo witũ wa kana Mbivilia ndĩ mavĩtyo ũlũlũmĩĩlaw’a ata twasoma Ngewa ya kyalo kya Vaulo kya ũkanganĩ aendete Lomi? (Meko 27:16-19, 27-32; Lk. 1:3; 2 Tim. 3:16, 17)
- Soma Meko 28:1-14.
Ethĩwa andũ mate etĩkĩli ma kĩthama kya Melita nĩmasukumiwe nĩ ngoo kũmeka “ũseo mũnene” Vaulo na andũ ala waanangĩkĩiwe nĩ ngalawa vamwe namo, Aklĩsto maĩlĩte kũsukumwa monany’e kyaũ na mũno mũno kwa nzĩa yĩva? (Meko 28:1, 2; Aevl. 13:1, 2; 1 Vet. 4:9)
