Ngewa ya 3: Mũndũũme na Mũndũ Mũka ma Mbee
NĨ KĨVATHŨKANY’O kyaũ kĩ nthĩnĩ wa visa ũũ? Nĩ andũ ala mevo. Mo nĩ mũndũũme na mũndũ mũka ma mbee. Nũũ wamombie? Nĩ Ngai. We nĩwĩsĩ syĩtwa yake? Nĩ Yeova. Nake ũ mũndũũme na mũndũ mũka meetiwe Atamu na Eva.
Ũũ nĩw’o Yeova Ngai woombie Atamu. Oosie kĩtoo kuma nthĩ na kuma kĩtoonĩ kĩu aseũvya mwĩĩ mwĩanĩu, mwĩĩ wa mũndũ. Na ĩndĩ aveveea manyiũũnĩ ma ũ mũndũ, na Atamu eethĩwa thayũ.
Yeova Ngai nĩwamũnengie Atamu wĩa. Amwĩie atw’ĩĩe nyamũ syonthe sya kĩla mũthemba masyĩtwa. No kwĩthĩwa Atamu asyaaĩsye nyamũ kwa ĩvinda yĩasa nĩ kana ainyuvĩe masyĩtwa ala masyaĩle. Atamu o aendeee na kũtw’ĩĩa nyamũ masyĩtwa nĩwoonie ũndũ mũna. We nĩwĩsĩ ũndũ ũsu waĩ mwaũ?
Nyamũ syonthe syaĩ na atindany’a. Kwaĩ nzou nũme na nzou nga, na mĩnyambũ mĩũme na mĩnyambũ mĩka. No Atamu ndaĩ na ũmwe wa kũtindany’a nake. Kwoou ĩndĩ Yeova amũetee Atamu too mũnene, na aumya wau ĩvavanĩ yake. Yeova nĩwatũmĩie wau ũsu kũmũmbĩa Atamu mũndũ mũka, nake atw’ĩka kĩveti kyake
Atamũ atanie ta kĩ! Kwasũania ũndũ Eva nake watanie kwiwa mũũndanĩ mwanake ekalae vo! Atamu na Eva maĩ matonya kwĩthĩwa na syana na kwĩkalany’a na ũtanu.
Yeova endaa Atamu na Eva matũe tene na tene. We endaa mamĩseũvye nthĩ yonthe na mamyanakavye yĩkale ta mũũnda wa Eteni. Atamu na Eva matanie ta kĩ yĩla masũanĩie ĩũlũ wa ũndũ ũsu! We waĩ wenda kwĩthĩwa na kĩanda kya kwanakavya nthĩ yĩkale ta mũũnda ũsu? Ĩndĩ Atamu na Eva mayaaendeea kwĩthĩwa na ũtanu. Ekai twone kĩtumi nĩ kyaũ.
Savuli 83:18; Mwambĩlĩlyo 1:26-31; 2:7-25.
Makũlyo
- Visa ũla wĩ Ngewanĩ ya 3 wĩ kĩvathũkany’o kyaũ na ũla wĩ Ngewanĩ ya 2?
- Nũũ ũla woombie mũndũ wa mbee na mũndũ ũsu eetawa ata?
- Ngai anengie Atamu wĩa mwaũ atethasye?
- Ngai aeteie Atamu too mũnene nĩkĩ?
- Atamu na Eva maĩ mekale ĩvinda yĩana ata, na Yeova endaa matethye wĩa mwaũ?
Makũlyo ma kwongeleela
- Soma Savuli 83:18.
Syĩtwa ya Ngai nĩ yĩva, nake ena ũnene mwaũ ũtaelekanw’a na wa ũngĩ ĩũlũ wa nthĩ ĩno? (Yel. 16:21; Nda. 4:17)
- Soma Mwambĩlĩlyo 1:26-31.
Nĩ kyaũ Ngai woombie mũminũkĩlyonĩ wa wũmbi wake mũthenya wa thanthatũ, na kyũmbe kyu kyaĩ na kĩvathũkany’o kyaũ na nyamũ? (Mwa. 1:26)
Yeova anengie mũndũ na nyamũ syĩndũ myaũ? (Mwa. 1:30)
- Soma Mwambĩlĩlyo 2:7-25.
Nĩ kyaũ kĩla kyendekaa nthĩnĩ wa wĩa wa Atamu wa kũtw’ĩĩa nyamũ masyĩtwa? (Mwa. 2:19)
Mwambĩlĩlyo 2:24 yĩtũtetheeasya ata kũmanya woni wa Yeova ĩũlũ wa mũtwaano, kũtaanĩsya, na mũleano? (Mat. 19:4-6, 9)
