Ngewa ya 37: Ĩeema ya Kũthaithĩa
WE NĨWĨSĨ mwako ũũ nĩ kyaũ? Nĩ ĩeema ya mwanya ya kũthaithĩa Yeova. Na ĩngĩ yĩtawa wĩkalo. Andũ maminie kũyaka mwaka ũmwe ĩtina wa kuma Misili. We nĩwĩsĩ nũũ wasũanĩie yakwe.
Yaĩ ĩsũanĩo ya Yeova. Yĩla Mose waĩ Kĩĩmanĩ kya Sinaĩ ĩũlũ, Yeova nĩwamũtavisye ũndũ yaĩle kwakwa. Amwĩie ayake kwa nzĩa yĩtonya kũthaanw’a kwa ũvũthũ. Kwa nzĩa ĩsu ilungu syayo syaĩ itonya kũthamĩĩw’a vandũ vangĩ na iikwatanw’a ĩngĩ. Kwoou yĩla Aisilaeli maendaa kũũ na kũũ weũnĩ, nĩmakuaa ĩeema yĩu makathi nayo.
Wasisya nthĩnĩ wa kasũmba kanini ngalĩko ya mũthya wa ĩeema, nũtonya kwona ĩsandũkũ. Yĩu yĩtawa ĩsandũkũ ya ũtianĩo. Ĩũlũ wayo, ngalĩko syelĩ, vaĩ alaĩka kana akelũvi elĩ maseũvĩtw’e na thaavu. Ngai nĩwaandĩkie ĩngĩ ĩla Mĩao Ĩkũmi masengeanĩ elĩ ma mavia, nũndũ Mose nĩwooaie ala ma mbee. Masengea asu ma mavia maiiwe ĩsandũkũnĩ ya ũtianĩo nthĩnĩ. Na kavisũ keekĩĩtwe mana o nako kaiwa ĩsandũkũnĩ yĩu. We nũũlilikana mana nĩ kyaũ?
Yeova anyuvie mwana-a-inyia wa Mose Aluni atw’ĩke mũthembi mũnene. Nĩwe watongoeasya andũ nthĩnĩ wa kũmũthaitha Yeova. Ana make o namo maĩ athembi.
Yu kwasisya ĩndĩ nyũmba ĩla nenange ya ĩeema. Ũnene wayo nĩ ta kũndũ kwĩlĩ kwa kala kasũmba kanini. We nĩwene kasandũkũ kau keũtoa syũki? Kĩu nĩ kĩthembeo vala athembi mavĩvĩasya kĩndũ kĩnyungaa nesa kĩtawa ũvani. Na ve na kĩndũ kya kwĩkĩwa mataa mũonza. Na kĩndũ kya katatũ nthĩnĩ wa nyũmba ĩsu nĩ mesa. Ĩũlũ wayo vaiawa imũtũ 12.
Na vau nza wa ĩeema vaĩ na mbakũli nene kana kalaĩ kausũĩte kĩw’ũ. Athembi makatũmĩaa kũthamba. Na ĩngĩ vaĩ o na kĩthembeo kĩnene. Ĩũlũ wakyo nĩvo nyamũ mbũae syavĩvĩaw’a ta nthembo kwa Yeova. Ĩeema yaĩ katĩkatĩ wa kambi, namo Aisilaeli mekalaa maeemanĩ moo kũyĩthyũlũlũka.
Kuma 25:8-40; 26:1-37; 27:1-8; 28:1; 30:1-10, 17-21; 34:1, 2; Aevelania 9:1-5.
Makũlyo
- Mwako ũũ wĩ vaa visanĩ wĩtawa ata, na watũmĩawa kwa wĩa mwaũ?
- Nĩkĩ Yeova weeie Mose nĩaseũvye ĩeema wĩthĩe nĩyĩtonya kũthaanw’a kwa ũvũthũ?
- Ĩsandũkũ yĩĩya yĩ kasũmbanĩ kanini ngalĩko ya mũthya wa ĩeema nĩ yĩva, na yĩkĩĩtwe kyaũ nthĩnĩ?
- Yeova anyuvie ũũ atw’ĩke mũthembi mũnene, na mũthembi mũnene atethasya wĩa mwaũ?
- Weta syĩndũ itatũ ila syĩ nthĩnĩ wa nyũmba nene ya ĩeema.
- Nĩ syĩndũ myaũ ilĩ ila syĩ vau nza wa ĩeema ya kũmbanĩa, na itũmĩawa kwa wĩa mwaũ?
Makũlyo ma kwongeleela
- Soma Kuma 25:8-40; 26:1-37; 27:1-8; na 28:1.
Makelũvi ala maĩ ĩũlũ wa “ĩsandũkũ ya ũtianĩo” maũngamĩe kyaũ? (Kuma 25:20, 22; Mot. 7:89; 2 Asu. 19:15)
- Soma Kuma 30:1-10, 17-21; 34:1, 2; na Aevelania 9:1-5.
Nĩkĩ Yeova wakindĩlĩĩile vata wa ũtheu wa mwĩĩ kwa athembi ala mathũkũmaa ĩeemanĩ ya kũmbanĩa, na ũndũ ũsu waĩlĩte ũtũtethya ata ũmũnthĩ? (Kuma 30:18-21; 40:30, 31; Aevl. 10:22)
Mũtũmwa Vaulo eonany’a ata kana ĩeema ya kũmbanĩa na Mĩao ya ũtianĩo iyaĩ na vata ĩvinda yĩla waandĩkie valũa wake kwa Aevelania? (Aevl. 9:1, 9; 10:1)
