Ngewa ya 41: Nzoka ya Ũthuku
ĨĨ yĩlingĩlĩĩle mũtĩnĩ ĩilyĩ ta nzoka ya w’o? Ti ya w’o. Nzoka ĩĩ ĩseũvĩtw’e na ũthuku. Yeova eeie Mose amĩkĩe mũtĩnĩ ĩũlũ nĩ kana wĩthĩe andũ nĩmatonya kũmĩsisya na kwĩkala thayũ. Ĩndĩ nzoka ii ingĩ syĩ kũu nthĩ nĩ sya w’o. Nĩsyaũmaa andũ makawaa. We nĩwĩsĩ nĩkĩ?
Kĩtumi nũndũ Aisilaeli nĩmaneeneie Ngai na Mose naĩ. Manyungunyĩisye mayasya: ‘Mwatumisye Misili tũkw’ĩĩe weũnĩ ũũ nĩkĩ? Nũndũ vaa vaiĩ kya ũya, na vaiĩ kĩw’ũ. Na nĩtũtiikĩĩtwe nĩ kũya mana ĩno.’
Ĩndĩ mana waĩ lĩu mũseo. Yeova amanengete yo kwa kyama. O na ĩngĩ nĩwamanengete kĩw’ũ kwa kyama. Ĩndĩ andũ mayaĩ na mũvea nũndũ wa ũndũ Ngai wamasũvĩĩte. Kwoou Yeova atũma nzoka syĩ na sumu nĩ kana amasilĩle Aisilaeli. Nzoka isu nĩsyamaũmie, na aingĩ moo makw’a.
Ĩtina vyũ andũ nĩmookie vala ve Mose na mamwĩa: ‘Nĩtũvĩtanĩtye, nũndũ wa kũmũneenea Yeova naĩ, na kũũneenea naĩ o naku. Mũvoye Yeova avetange nzoka ii vala tũĩ.’
Kwoou Mose amavoyea andũ asu. Na Yeova atavya Mose aseũvye nzoka ĩno ya ũthuku. Na amwĩa amĩkĩe mũtĩnĩ ĩũlũ, na mũndũ o na wĩva ũla waũmwa no nginya amĩsisye. Mose eekie o ũndũ Ngai waisye. Na andũ ala maũmwa masiasya nzoka ĩsu ya ũthuku na makew’a nesa ĩngĩ.
Ve na ĩsomo twaĩlĩtwe nĩkwĩmanyĩsya kuma ũvoonĩ ũũ. Ithyonthe, kwa nzĩa na, tũilyĩ ta Aisilaeli ala maũmĩtwe nĩ nzoka isu. Ithyonthe twelekele kũkw’a. Wasisya kĩla vandũ nũkwona kana andũ nĩmakũaa, makawaa, na makakw’a. Kĩtumi nũndũ mũndũũme na mũndũ mũka ma mbee, Atamu na Eva, nĩmamũtiie Yeova, na ithyonthe twĩ syana syoo. Ĩndĩ Yeova nũseũvĩtye nzĩa nĩ kana tũtonye kwĩkala tene na tene.
Yeova nĩwamũtũmie Mwana wake, Yesũ Klĩsto, kũũ nthĩ. Yesũ nĩwasũiw’e mũtĩnĩ, kĩtumi nũndũ andũ aingĩ masũanĩaa aĩ mũndũ mũthũku. Ĩndĩ Yeova nĩwanenganie Yesũ nĩ kana atũtangĩĩe. Ethĩwa tũkamwĩkwatya na kũmũatĩĩa, tũkeethĩwa tũtonya kũkwata thayũ ũtathela. Ĩndĩ tũkeemanyĩsya mũnango ĩũlũ wa ũu ĩtina.
Motalo 21:4-9; Yoana 3:14, 15.
Makũlyo
- Nthĩnĩ wa visa ũũ, ĩya yĩlingĩlĩĩle mũtĩnĩ nĩ myaũ, na Yeova eeie Mose amĩkĩe vau nĩkĩ?
- Nĩ kwa nzĩa myaũ andũ mataĩ na mũvea ĩũlũ wa maũndũ ala Yeova wamekĩte?
- Andũ meĩa Mose nĩeke ata ĩtina wa Yeova kũete nzoka syĩna sumu nĩ kana amasilĩle?
- Yeova eeie Mose aseũvye nzoka ya ũthuku nĩkĩ?
- Tũtonya kwĩmanyĩsya kyaũ kuma ngewanĩ ĩno?
Makũlyo ma kwongeleela
- Soma Motalo 21:4-9.
Nĩ ũkany’o mwaũ tũũkwata kumana na Aisilaeli kũnyungunyĩka nũndũ wa syĩndũ ila manengawe nĩ Yeova? (Mot. 21:5, 6; Alo. 2:4)
Myaka maana maingĩ ĩtina, Aisilaeli matũmĩaa nzoka ĩsu ya ũthuku ata, na Mũsumbĩ Esekia eekie ata? (Mot. 21:9; 2 Asu. 18:1-4)
- Soma Yoana 3:14, 15.
Kwĩkĩa nzoka ya ũthuku mũtĩnĩ kwĩelekany’a ata kũsũsw’a kwa Yesũ Klĩsto mũtĩnĩ? (Aka. 3:13; 1 Vet. 2:24)
