Ngewa ya 46: Mokũta ma Yeliko
MOKŨTA aa ma Yeliko meomboangwa nĩ kyaũ? Meoneka ta makimwa na mbomu nene. Ĩndĩ ĩvinda yĩu andũ mayaĩ na mbomu; o na mayaĩ na mavuti. Nĩ kyama kĩngĩ kya Yeova! Ekai twĩmanyĩsye kweekĩkie ũu ata?
Kweethukĩĩsye ũndũ Yeova ũnũũmwĩa Yosua: ‘We na aũme maku ma kaũ endai mũkathyũlũlũke ĩ ndũa. Mĩthyũlũlũkei ĩvinda yĩmwe kĩla mũthenya kwa mĩthenya thanthatũ. Kuai ĩsandũkũ ya ũtianĩo mũthi nayo. Na athembi mũonza nĩmayĩtongoesye na maivuva masoo moo.
Na mũthenya wa mũonza mũkathyũlũlũka ĩ ndũa mavinda mũonza. Na ĩndĩ mũivuva masoo asu ĩvinda yĩasa, na andũ onthe mayusya ngemi nene sya kaũ. Na mokũta makavalũka mbu!’
Yosua na andũ meekie o ũndũ Yeova waisye. Yĩla mathyũlũlũkaa, kĩla mũndũ avindĩtye ki. Vaiĩ mũndũ waneenaa ndeto nongi. Kĩla kyew’ĩkaa no wasya wa masoo na matuu ma maaũ. No nginya amaitha ma andũ ma Ngai ndũanĩ ya Yeliko methĩwe maĩ na w’ĩa mũno. We nĩwene ĩkanda yĩĩya ya ũlii mũtune yĩsũĩte ndĩlĩsyanĩ? Ndĩlĩsya ĩsu nĩ yaũ? Ĩĩ, Laavi nĩweekie ũndũ athiani ala elĩ mamwĩĩte nĩeke. Andũ onthe ma nyũmba ya ĩthe wake maĩ vau nthĩnĩ vamwe nake masyaĩĩsye.
Na ĩtina vyũ, mũthenya wa mũonza, mamina kũthyũlũlũka ĩ ndũa mavinda mũonza, mavuva masoo na mausya ngemi nene sya kaũ, na mokũta mavalũka mbu. Na ĩndĩ Yosua asya: ‘Ũaai kĩla mũndũ ĩ ndũanĩ na mũimĩvĩvya na mwaki. Vivyai kĩla kĩndũ. Ĩndĩ vonokyai o vetha, thaavu, ũthuku na kĩaa, na mũisiete vala vaiawa ũthwii wa Yeova ĩeemanĩ yake.’
Na Yosua atavya ala athiani elĩ: ‘Likai nyũmbanĩ ya Laavi, na mũimumaalya we vamwe na andũ ma nyũmba ya ĩthe wake.’ Laavi na andũ ma nyũmba ya ĩthe wake nĩmavonokiw’e o tondũ athiani asu mamwĩvĩtĩĩte.
Yosua 6:1-25.
Makũlyo
- Yeova eeie aũme ma kaũ na athembi ni meke ata kwa mĩthenya thanthatũ?
- Aũme maaĩlĩtwe nĩkwĩka ata mũthenya wa mũonza?
- Tondũ ũkwona vaa visanĩ, mokũta ma Yeliko maendee na kwĩka ata?
- Nĩkĩ ĩkanda ya ũlii mũtune yĩsũĩtw’e ndĩlĩsyanĩ?
- Yosua eeie aũme ma kaũ mekane ata na andũ na ĩ ndũa, ĩndĩ vetha, thaavu, ũthuku na kĩaa syaaĩlĩtwe nĩkwĩkwa ata?
- Athiani ala elĩ meeiwe makeke ata?
Makũlyo ma kwongeleela
- Soma Yosua 6:1-25.
Aisilaeli kũthyũlũlũka Yeliko mũthenya wa mũonza kũvw’anene ata na wĩa wa kũtavany’a wa Ngũsĩ sya Yeova mĩthenyanĩ ĩno ya mũminũkĩlyo? (Yos. 6:15, 16; Isa. 60:22; Mt. 24:14; 1 Ako. 9:16)
Wathani ũla ũandĩkĩtwe nthĩnĩ wa Yosua 6:26 weanĩiw’e ata ta myaka 500 ĩtina, na ũndũ ũsu wĩtũmanyĩsya kyaũ ĩũlũ wa ndeto ya Yeova? (1 Asu. 16:34; Isa. 55:11)
