Ngewa ya 47: Kĩng’ei Nthĩ ya Isilaeli
KWASISYA syĩndũ ila mũndũ ũũ ũnũkwĩnzĩa nthĩ ĩeemanĩ yake! Ngũa mbanake, na kĩlungu kya thaavu, na ilungu sya vetha. Asyosie kuma ndũanĩ ya Yeliko. Ĩndĩ syindũ ila syaĩ ndũanĩ ĩsu syaaĩlĩtwe nĩkwĩkwa ata? We nũũlilikana?
Syaaĩlĩtwe nĩ kwanangwa, naw’o thaavu na vetha waaĩlĩtwe kũnenganwe vala ũthwii wa Yeova waiawa ĩeemanĩ yake. Kwoou andũ aa nĩmaleile kũmwĩw’a Yeova. Nĩmooyie syĩndũ sya Ngai. Syĩtwa ya ũ mũndũ nĩ Akani, na asu me nake nĩ amwe ma andũ ma nyũmba yake. Ekai twone ũndũ kweekĩkie.
Ĩtina wa Akani kũya syĩndĩ isu, Yosua nĩwatũmie aũme amwe makokite na andũ ma ndũa ya Ai. Ĩndĩ masindwa kaũnĩ. Amwe moo nĩmooaiwe, na ala angĩ masemba makĩa. Yosua nĩweewie kyeva mũno. Na avalũka nthĩ na ũthyũ wake na avoya Yeova ayasya: ‘Ũekie ũndũ ũũ wĩkĩke kwitũ nĩkĩ?’
Nake Yeova amũsũngĩa: ‘Ũkĩla we! Isilaeli nĩmavĩtĩtye. Nĩmosete syĩndũ imwe ila ĩnaaĩlĩte kwanangwa kana kũnenganwe vala ũthwii wa Yeova wiawa ĩeemanĩ yake. Nĩmanooyie ngũa mbanake na mavitha. Nyie ndikamũathima nginya yĩla mũkamyananga ngũa ĩsu o vamwe na ũla woosie syĩndũ isu.’ Na Yeova asya nũkũmwony’a Yosua mũndũ ũsu mũthũku.
Kwoou Yosua oombany’a andũ onthe vamwe, na Yeova anyuva mũndũ ũsu mũthũku Akani. Na Akani asya: ‘Nĩmbĩtĩtye. Nĩnonie ngũa nzeo, na kĩlungu kya thaavu, na ilungu sya vetha. Nakwa nasyenda mũno na nasyosa. Mwĩsyĩthĩa syĩnzĩĩtwe nthĩ ĩeemanĩ yakwa.’
Yĩla syĩndũ isu syoonekie na syaetewe Yosua, Yosua amwĩa Akani: ‘Ũtũthĩnĩtye nĩkĩ? Yeova nake nũnũũkũthĩny’a yu!’ Na kũvika vau, andũ onthe mamũkimanga na mavia Akani vamwe na andũ ma mũsyĩ wake makw’a. Ũndũ ũsu wĩtwony’a kana tũyaĩlĩte o na ĩndĩĩ kwosa syĩndũ ite sitũ.
Ĩtina wa ũu Aisilaeli nĩmaendie kũkita na Ai ĩngĩ. Na ĩvinda yĩĩ Yeova atethya andũ make, na masinda kaũ.
Yosua 7:1-26; 8:1-29.
Makũlyo
- Vaa visanĩ ũũ, nũũ mũndũ ũũ ũkwĩnzĩa ũthwii nthĩ ũla woosetwe kuma Yeliko, na asu meũmũtetheesya naaũ?
- Nĩkĩ yĩko yĩĩ Akani na andũ ma mũsyĩ wake meekie yaĩ yĩito?
- Yeova eeie Yosua ata yĩla wakũlilye kĩtumi kya Aisilaeli kũsindwa kaũnĩ Ai?
- Akani na andũ ma mũsyĩ wake meekiwe ata ĩtina wa kũetwe vala ve Yosua?
- Nĩ ĩsomo yaũ ya vata yĩla ũsilĩlo wa Akani ũũtũsomethya?
Makũlyo ma kwongeleela
- Soma Yosua 7:1-26.
Mboya sya Yosua syoonanisye kyaũ ĩũlũ wa mũamba wake na Mũmbi wake? (Yos. 7:7-9; Sav. 119:145; 1 Yoa. 5:14)
Ngelekany’o ya Akani yĩonany’a kyaũ, na nĩkĩ ũsu nĩ ũkany’o kwitũ? (Yos. 7:11, 14, 15; Nth. 15:3; 1 Tim. 5:24; Aevl. 4:13)
- Soma Yosua 8:1-29.
Ethĩwa nĩtwĩsĩ ĩũlũ wa ĩkosa ĩna yĩkĩtwe kĩkundinĩ, kĩla ũmwe waitũ aĩlwe nĩkwĩka ata? (Yos. 7:13; Ali. 5:1; Nth. 28:13)
