ANDŨ ma ndũa mbingĩ nthĩnĩ wa nthĩ ya Kanaani nĩmeeyũmbanisye mokite na Aisilaeli. Masũanĩaa ta matonya kũsinda. Ĩndĩ andũ ma ndũa yaĩ o vau vakuvĩ ya Angiveoni maiasũanĩaa ũu. Mo maĩ na mũĩkĩĩo kana Ngai nĩwatetheeasya Aisilaeli, na mayendaa kũkita na Ngai. We nĩwĩsĩ ũndũ Angiveoni meekie?

Mavangie metw’e ta mekalaa kũndũ kũasa mũno. Kwoou andũ amwe moo meekĩa ngũa ndwĩkangu na iatũ ngũũ, na maĩkya mang’oi moo makunia makũũ na makua imũtũ nyũmũ na syĩna mbuka. Na ĩndĩ mathi kwa Yosua na mamwĩa: ‘Ithyĩ tumĩte nthĩ yĩ kũasa mũno, nũndũ nĩtwĩw’ĩte nguma nene ya Ngai waku mũnene, Yeova. Nĩtwĩw’ĩte maũndũ onthe ala wamwĩkie mwĩ Misili. Kwoou atongoi maitũ matwĩa twose lĩu wa kũya twĩ kyalonĩ na tũyũka tũkwĩe: “Twĩ athũkũmi maku. Tianĩai ũtianĩo naitũ kana mũikokita naitũ.” Sisyai ngũa sitũ nikũĩte nũndũ wa kyalo kĩasa na imũtũ sitũ nĩ mbũmũ na ikethĩwa na mbuka.’

Yosua na anene ala angĩ nĩmaĩkĩĩie Angiveoni. Kwoou matianĩa ũtianĩo namo kana maikokita namo. Ĩndĩ ĩtina wa mĩthenya ĩtatũ mamanya Angiveoni matwĩe o vau vakuvĩ.

Kwoou Yosua amakũlya, ‘Mũnatwĩie mumĩte nthĩ yĩ kũasa mũno nĩkĩ?’

Namo Angiveoni masũngĩa: ‘Tũnekie ũu nũndũ nĩtwataviw’e kana Ngai waku nĩwathanĩte akamũnenga nthĩ yonthe ya Kanaani. Kwoou twakĩa tũyona ta mũtonya kũtũaa.’ Ĩndĩ Aisilaeli malũmya ũtianĩo woo, na mayaũaa Angiveoni. Vandũ va ũu mamatw’a athũkũmi moo.

Mũsumbĩ wa Yelũsalemu nĩwathilĩkile mũno nũndũ Angiveoni nĩmaseũvisye mũuo na Aisilaeli. Kwoou eea asumbĩ angĩ ana: ‘Ũkai mũndetheesye kũkita na Ngiveoni.’ Na ũu nĩw’o asumbĩ asu atano meekie. Angiveoni nĩmeekie ũndũ wa ũĩ kũseũvya mũuo na Aisilaeli, na kwa kwĩka ũu kũtuma asumbĩ aa moka kũkita namo? Nĩtũkwona.

Yosua 9:1-27; 10:1-5.