AISILAELI mesa ũlika thĩnanĩ, nĩmamwĩkaĩlaa Yeova. Nake aimasũngĩa kwa kũmanenga atongoi ngũmbaũ mamatethye. Mbivilia yĩtaa atongoi asu asili. Yosua nĩwe waĩ mũsili wa mbee, na asili amwe katĩ wa ala mookie ĩtina wake meetawa Othinieli, Euti, na Samukali. Ĩndĩ elĩ katĩ wa andũ ala matetheeisye Aisilaeli nĩ aka meetawa Ndevola na Yaeli.

Ndevola aĩ mwathani mũndũ mũka. Yeova amũnengae ũvoo wa ĩvinda yĩla yũkĩte, nake ĩndĩ aitavya andũ ũndũ Yeova ũnũkwasya. Na ĩngĩ Ndevola aĩ mũsili. Nake ekalaa ĩtina wa mũtĩ wa mũtende nthĩnĩ wa nthĩ yĩ iĩma, na andũ nĩmaendaa vala ũĩ nĩ kana makwate ũtethyo kwondũ wa mathĩna moo.

Ĩvinda yĩu Yavini nĩwe waĩ mũsumbĩ wa Kanaani. Aĩ na makasya ma kaũ 900. Ita syake syaĩ na vinya mũno, kwoou Aisilaeli aingĩ matw’ĩkĩthw’a athũkũmi ma Yavini kwa vinya. Mũnene wa ita syake eetawa Sisela.

Mũthenya ũmwe Ndevola nĩwatũmanie Mũsili Mbalaka, na amwĩa: ‘Yeova easya: “Osa aũme 10,000 na ũimatongoesya mũthi nginya Kĩĩmanĩ kya Tavoli. Nakwa ngakũetee Sisela ĩtheo wa kĩĩma kĩu. Na ngaũnenga ũsindi ĩũlũ wake na ita syake.”’

Nake Mbalaka amwĩa Ndevola: ‘Nĩngũthi ethĩwa we o naku nũkũendany’a nakwa.’ Ndevola nĩwaendanisye nake, ĩndĩ amwĩa Mbalaka: ‘We ndũkakwata ndaĩa ya ũsindi, kĩtumi nũndũ Yeova akanengane Sisela kw’okonĩ kwa mũndũ mũka.’ Na ũu nĩw’o kweethĩiwe.

Mbalaka nĩwatheeie kuma Kĩĩmanĩ kya Tavoli akakomane na asikalĩ ma Sisela. Na kwa kĩthũlũmũkĩlo Yeova aete kĩw’ũ kingĩ, na asikalĩ aingĩ ma amaitha mooawa nĩ kĩw’ũ kĩu. Ĩndĩ Sisela auma ĩkasyanĩ yake ya kaũ na akũka.

Na ĩtina wa kavinda kanini Sisela nĩwavikie ĩeemanĩ ya Yaeli. Na Yaeli amũthokya ĩeemanĩ na amũnenga ĩia. Ĩia yĩu yatumie akwatwa nĩ too, na o mĩtũkĩ akoma vyũ. Nĩvo ĩndĩ Yaeli woosie kyambo kya ĩeema na akĩkũnĩĩa mũtwenĩ wa mũndũ ũsu mũthũku. Ĩtina yĩla Mbalaki wookie, Yaeli amwony’a Sisela e mũkw’ũ! Kwoou nũtonya kwona kana ũndũ Ndevola waisye nĩweanĩie.

Ĩtina vyũ mũsumbĩ Yavini o nake nĩwooaiwe, na Aisilaeli meethĩwa na mũuo ĩngĩ kwa kavinda.

Asili 2:14-22; 4:1-24; 5:1-31.