Ngewa ya 52: Ngiteoni na Aũme Make 300
WE NĨWENE kĩla kĩendee vaa? Aa onthe nĩ aũme ma kaũ ma Isilaeli. Aũme aa makumanĩte menyw’a kĩw’ũ. Mũsili Ngiteoni nĩwe ũsu ũũngamĩte vakuvĩ namo. Asyaĩĩsye ũndũ meũnyw’a kĩw’ũ.
Sisya nesa nzĩa syĩ kĩvathũkany’o ila aũme aa meũtũmĩa kũnyw’a kĩw’ũ. Amwe mainamĩty’e mothyũ moo vyũ kwelekela kĩw’ũnĩ. Ĩndĩ ũmwe euta kĩw’ũ akanyw’ĩĩa ũvĩnĩ wa kw’oko kwake, nĩ kana wĩthĩe nũtonya kwona kĩla kĩendee vakuvĩ nake. Ũndũ ũũ nĩ wa vata mũno, nũndũ Yeova eeĩte Ngiteoni anyuve o aũme ala meũnyw’a kĩw’ũ metũĩĩe. Ngai aisye aũme ala angĩ no nginya mewe menũke. Ekai twone kĩtumi nĩkĩ.
Aisilaeli maĩ thĩnanĩ mũnene ĩngĩ. Kĩtumi nũndũ nĩmaleete kũmwĩw’a Yeova. Andũ ma nthĩ ya Mitiani nĩmamakĩlĩtye vinya na nĩmamathĩnasya. Kwoou Aisilaeli makayĩa Yeova amatethye, nake Yeova eew’a kĩĩo kyoo.
Yeova eeie Ngiteoni ombany’e nguthu ya ita. Kwoou Ngiteoni oombany’a aũme ma kaũ 32,000. Ĩndĩ ita ila syaĩ syũkite na Aisilaeli syaĩ na asikalĩ 135,000. Ĩndĩ o na kũilyĩ ũu Yeova amwĩa Ngiteoni: ‘Wĩ na aũme aingĩ mũno.’ Yeova aisye ũu nĩkĩ?
Kĩtumi nũndũ ethĩwa Aisilaeli makasinda kaũ, nĩmatonya kũsũanĩa masindie kwa ũtonyi woo ene. Nĩmatonya kũsũanĩa kana mainaĩ na vata wa kũtetheew’a nĩ Yeova nĩ kana masinde. Kwoou Yeova eea Ngiteoni: ‘Tavya aũme onthe ala me na w’ĩa masyoke mũsyĩ.’ Yĩla Ngiteoni wameie ũu, aũme make ma kaũ 22,000 menũka. Kwoou atiwa o na aũme 10,000 ma kũkita na ala asikalĩ 135,000.
Ĩndĩ, kweethukĩĩsye! Yeova aisye: ‘O na yu wĩ na aũme aingĩ mũno.’ Kwoou amwĩa Ngiteoni nĩatavye aũme manyw’e kĩw’ũ kalũsĩnĩ kaa na ayĩa andũ onthe ala mekũinamya mothyũ moo vyũ nĩ kana manyw’e kĩw’ũ nĩmenũke. Na Yeova athana, ‘Ngakũtonyethya kũsinda na aũme asu 300 ala meũnyusaa kĩw’ũ metũĩĩe.
Na ĩvinda ya kũkita yavika, Ngiteoni aany’a aũme make 300 nguthu itatũ. Na anenga kĩla mũndũ soo na kĩkuu kĩ na ũmũĩ nthĩnĩ. Na ta ũtukũ katĩ, onthe moombana kũthyũlũlũka kambi ya asikalĩ ma amaitha. Na ĩndĩ, o ĩvinda yĩmwe, onthe mavuva masoo na mooaa ikuu syoo, na maneena na wasya mũnene: ‘Ũvyũ wa Yeova na wa Ngiteoni!’ Asikalĩ ma amaitha maamũka, nĩmasaanĩiw’e na makwatwa nĩ w’ĩa. Na onthe mambĩĩa kũsemba, na Aisilaeli masinda kaũ.
Asili kĩlungu kya 6 nginya 8.
Makũlyo
- Aisilaeli me thĩnanĩ mwaũ mũnene mũno, na nĩkĩ?
- Nĩkĩ Yeova ũkwĩa Ngiteoni e na aũme aingĩ mũno nthĩnĩ wa ita syake?
- Nĩ aũme meana matialile ĩtina wa Ngiteoni kwĩa aũme ala me na w’ĩa nĩmasyoke mũsyĩ?
- Kwosana na visa ũũ, elesya ũndũ Yeova waolile ita sya Ngiteoni nginya o aũme 300.
- Ngiteoni avangie aũme make 300 ata, na Aisilaeli masindie kaũ ata?
Makũlyo ma kwongeleela
- Soma Asili 6:36-40.
Ngiteoni aĩkĩĩthisye ata wendi wa Yeova?
Ithyĩ ũmũnthĩ tũmanyaa wendi wa Yeova ata? (Nth. 2:3-6; Mt. 7:7-11; 2 Tim. 3:16, 17)
- Soma Asili 7:1-25.
Nĩ ĩsomo yaũ tũtonya kwĩmanyĩsya kumana na andũ ala 300 mekalile metũĩĩe kwa kũmasianĩsya na ala angĩ matetũĩĩe? (Asi. 7:3, 6; Alo. 13:11, 12; Aev. 5:15-17)
O tondũ aũme ala 300 meemanyĩisye kwa kũsisya Ngiteoni, ithyĩ tũtonya kwĩmanyĩsya ata kwa kũsisya Ngiteoni Mũnene, Yesũ Klĩsto? (Asi. 7:17; Mt. 11:29, 30; 28:19, 20; 1 Vet. 2:21)
Ĩandĩko ya Asili 7:21 yĩtũtetheesya ata kwĩanĩwa nĩkũtethya wĩa vala twaaĩwa nthĩnĩ wa ũseũvyo wa Yeova? (1 Ako. 4:2; 12:14-18; Yak. 4:10)
- Soma Asili 8:1-3.
Yĩla twatw’ĩka nĩtũũneena ĩũlũ wa kũemanwa na mwana-a-asa kana mwĩĩtu-a-asa, tũtonya kwĩmanyĩsya kyaũ kumana na nzĩa ĩla Ngiteoni watũmĩie kũmina thĩna katĩ wake na Aevalaimu? (Nth. 15:1; Mt. 5:23, 24; Lk. 9:48)
