NĨ KYAŨ kĩendee vaa? Andũ maendee na kũvoka mboka nene. Mũsumbĩ wa Mbaviloni athoketye aeni ma ndaĩa ngili ũmwe. Maendee na kũtũmĩa ikombe sya thaavu na vetha na mbakũli ila syoosetwe kuma ĩkalũnĩ ya Yeova kũya Yelusaleme. Ĩndĩ, saa o ũsu, syaa sya kw’oko kwa mũndũ syaumĩla na syambĩĩa kũandĩka ũkũtanĩ. Na kĩla mũndũ akwatwa nĩ w’ĩa.

Mbelisasa, mwĩsũkũũe wa Nevukatilesa, nĩwe waĩ mũsumbĩ. Na aneena na wasya mũnene akasya aũme make ala oĩ nĩmaetwe. Nake amea: ‘O ũla ũkũsoma ũandĩko ũũ na kũmbony’a ũalyũlo waw’o, akanengwa mĩthĩnzĩo mingĩ na akeethĩwa mũsumbĩki wa katatũ ũsumbĩnĩ.’ Ĩndĩ vaiĩ o na ũmwe wa andũ asu oĩ waĩ atonya kũsoma ũandĩko ũsu waĩ ũkũtanĩ na kũtavany’a ũalyũlo waw’o.

Inyia wa mũsumbĩ nĩweewie kĩneene na ooka nyũmbanĩ ya mboka. Nake amwĩa mũsumbĩ: ‘Nĩngũkwĩsũva ndũkateleme. Ve mũndũ ũsumbĩnĩ waku wĩ na veva wa ila ngai ntheu nthĩnĩ wake. Yĩla ũmau waku Nevukatilesa waĩ mũsumbĩ nĩwamũtwie mũnene wa andũ oĩ onthe. Mũndũ ũsu etawa Ndanieli. Tũmana aetwe, nake nũkũkwony’a ũalyũlo wa maũndũ aa onthe.’

Na vate kweteela Ndanieli aetwe vala ve mũsumbĩ. Ĩtina wa kũlea kwosa mĩthĩnzĩo Ndanieli nĩwambĩĩie kũelesya nĩkĩ ĩvinda yĩmwe Yeova wamumisye ũsumbĩnĩ Nevukatilesa, ũmae wa Mbelisasa. Na Ndanieli asya: ‘Aĩ na mĩyono mũno. Na Ngai amũsilĩla.’

Na Ndanieli amwĩa Mbelisasa: ‘Ĩndĩ we, o na vala nĩwĩsĩ maũndũ asu onthe meethĩiwe, wĩ o na mĩyono o tondũ Nevukatilesa wailyĩ. Ũetie ikombe na mbakũli ila syaumitw’e nyũmbanĩ ya Yeova na mwanyw’a mbinyu nasyo. Naku nũkumisye ngai sya mĩtĩ na mavia, na ndũnataĩa Mũmbi Witũ. Kĩu nĩkyo kyatuma Ngai atũma kw’oko kũandĩke ndeto ii.’

Nake Ndanieli asya: ‘Ũandĩko nĩ ũũ ũla ũandĩkĩtwe, MENE, MENE, TEKELI, UVALASINI.’

‘MENE ũalyũlo wayo nĩ: Ngai nũtalĩte ũsumbĩ waku na kũwũmina. Na TEKELI ũalyũlo wayo nĩ: Nũthimĩtwe kĩthiminĩ, na ũkoneka ũtaĩle. Naw’o ũalyũlo wa UVALASINI nĩ: Ũsumbĩ waku nũnengetwe Ametia na Avelisia.’

Na ĩvinda yĩu Ndanieli waendee o na kũneena, Ametia na Avelisia nĩmaĩ mambĩĩe kũvithũkĩa Mbaviloni. Namo makwata ndũa ĩsu na mooaa Mbelisasa. Ũandĩko ũsu waĩ ũkũtanĩ weanĩie o ũtukũ ũsu! Ĩndĩ kweethĩiwe ata kwa Aisilaeli? Nĩtũũmanya o mĩtũkĩ, ĩndĩ ekai twambe twone kĩla kyamũkwatie Ndanieli.

Ndanieli 5:1-31.