ANDŨ vakuvĩ 50,000 nĩmaendie kyalo kĩu kĩasa kuma Mbaviloni nginya Yelusaleme. Ĩndĩ mavika, meethĩa Yelusaleme no ivumbu sya nyũmba mbombokangu. Vaiĩ mũndũ wekalaa kw’o. Aisilaeli maĩ no nginya make kĩla kĩndũ ĩngĩ.

Mbee maakie kĩthembeo. Vaa nĩ vandũ vala maumĩasya Yeova nthembo sya nyamũ, kana mĩthĩnzĩo. Na ĩtina wa myei mĩvũthũ Aislaeli nĩmambĩĩe kwaka ĩkalũ. Ĩndĩ amaitha ala mekalaa nthĩ ila syĩ vakuvĩ mayeendaa Aisilaeli mayaka. Kwoou matata kũmatelemya maeke. Ĩtina vyũ, amaitha asu nĩmamũtaie mũsumbĩ mweũ wa Avelisia aumye mwĩao wa kũsiĩĩa wĩa wa kwaka.

Myaka nĩyaendeeie na kũvĩta. Na yu myaka 17 yaĩ ĩnavĩta kuma yĩla Aisilaeli masyokie kuma Mbaviloni. Yeova nĩwatũmie athani make Akai na Nzakalia matavye andũ mambĩĩe kwaka ĩngĩ. Andũ nĩmaĩkĩĩie kana Ngai nũnũmatethya na mamew’a athani asu. Namo mambĩĩa kwaka ĩngĩ, o na kau mwĩao waĩtye mayaĩle kwĩka ũu.

Kwoou mũnene ũmwe wa silikalĩ ya Avelisia weetawa Tatenai ooka akũlya Aisilaeli kana mena mwĩao wa kwaka ĩkalũ. Namo mamwĩa kana yĩla maĩ Mbaviloni, Mũsumbĩ Kulusi ameie: ‘Endai Yelusaleme na mũyaka ĩkalũ ya Yeova, Ngai wenyu.’

Kwoou Tatenai atũma valũa Mbaviloni na akũlya kana Kulusi, ũla ĩvinda yĩu waĩ mũkw’ũ, kana kwa w’o ki nĩwaisye ũu. O mĩtũkĩ valũa kuma kwa mũsumbĩ mweũ wa Avelisia wooka. Naw’o wasya kana kwa w’o ki Kulusi nĩwaisye ũu. Ĩndĩno mũsumbĩ aandĩka: ‘Ekanai na Aisilaeli make ĩkalũ ya Ngai woo. Na nĩmwĩaĩa inyw’ĩ mũmatetheesye.’ Na ĩtina wa myaka ta ĩna ĩkalũ yathela kwakwa, namo Aisilaeli matana mũno.

Myaka ĩngĩ mingĩ nĩyavĩtie. Na yu nĩ vakuvĩ myaka 48 kuma yĩla ĩkalũ yathelile. Andũ ma Yelusaleme nĩ ngya, na ĩ ndũa na ĩkalũ ya Ngai iikw’oneka syĩ mbanake. E kũya Mbaviloni, Mũisilaeli wĩtawa Esala nĩwamanyie kana kwĩ na vata wa kũseũvya ĩkalũ ya Ngai. We nĩwĩsĩ ũndũ weekie?

Esala nĩwaendie kwona Alitasasita, mũsumbĩ wa Avelisia, na mũsumbĩ ũsu mũseo amũnenga mĩthĩnzĩo mingĩ athi nayo Yelusaleme. Esala nĩwakũlilye Aisilaeli ala maĩ Mbaviloni mamũtetheesye kũkua mĩthĩnzĩo ĩsu nginya Yelusaleme. Na andũ vakuvĩ 6,000 masya nĩmekũthi nake. Maĩ na vetha na thaavu mwingĩ mũno na syĩndũ ingĩ sya thooa mũnene ila makuie mathi nasyo.

Esala aĩ na kĩũũyũ nũndũ kwaĩ andũ athũku nzĩanĩ. Andũ asu maĩ matonya ũmavena vetha na thaavu woo, na maimowaa. Kwoou Esala oombany’a andũ vamwe, o tondũ ũtonya kwona vaa visanĩ. Na ĩndĩ mavoya Yeova amasũvĩe me kyalonĩ kyoo kya kũsyoka Yelusaleme.

Yeova nĩwamasũvĩie. Na ĩtina wa kũthi kyalo kya myei ĩna, mavika o nesa Yelusaleme. Ũndũ ũũ wĩonany’a kana Yeova nũtonya kũsũvĩa ala mamwĩkwatasya amatethye.

Esala kilungu kya 2 nginya 8.