ĨSOMO YA 1
Kwambĩĩsya Ũneeni kwa Nzĩa Nzeo
Meko ma Atũmwa 17:22
KWA ŨKUVĨ: Ambĩĩsya ũneeni kwa nzĩa ĩkũtuma ethukĩĩsya mendeew’a nĩ kũkwĩthukĩĩsya. Weta kĩla ũũneenea na ũyonany’a nĩkĩ ethukĩĩsya maku maĩle kwendeew’a nĩkyo.
ŨNDŨ ŨTONYA KWĨKA ŨU:
-
Tetheesya ethukĩĩsya mendeew’e. Nyuva ĩkũlyo, ũndũ wĩkĩkĩte, kana ũvoo wa mĩtũkĩ ũla ũtonya kwendeesya ethukĩĩsya maku.
-
Tetheesya ethukĩĩsya mamanye kĩla ũũneenea. Ĩkĩĩthya kana wambĩĩsya ũneeni kwa nzĩa ĩkũtetheesya ethukĩĩsya mamanye wĩneenea kyaũ na wĩ na kĩeleelo kĩva.
-
Onany’a nĩkĩ kĩla ũũneenea nĩ kya vata. Kĩla ũũneenea kyaĩle kwosana na mavata ma ethukĩĩsya maku. Maĩle kũmanya nesa ũndũ kĩla ũũneenea kĩtonya kũmatethya mo ene.
