ĨSOMO YA 2
Kũneena o Ũndũ Ũneenaa
2 Akolintho 2:17
KWA ŨKUVĨ: Neena o ũndũ ũneenaa, na ũyĩka ũu kuma ngoonĩ kwa nzĩa ĩkwonany’a ũndũ ũkwĩw’a ĩũlũ wa kĩla ũũneenea, na ĩũlũ wa ethukĩĩsya maku.
ŨNDŨ ŨTONYA KWĨKA ŨU:
-
Voya yĩla ũkwĩyũmbany’a na ũyĩyũmbany’a nesa. Voya nĩ kana wĩthĩwe ũtonya kũneena maũndũ ala me ũvoonĩ waku nesa vandũ va kwĩsũanĩa we mwene. Ĩthĩwa wĩsĩ nesa maũndũ manene ala ũkwenda kũneenea. Tũmĩa ndeto syaku mwene kũelesya maũndũ na ndũkatũngĩlĩĩle ndeto o ũndũ iandĩkĩtwe.
-
Neena kuma ngoonĩ. Sũanĩa nĩkĩ ethukĩĩsya maku me na vata wa kwĩw’a ũvoo ũla ũũneenea. Neena ũmasũanĩĩte. Na ũu ũkatuma ũũngama nesa na kũtũmĩa moko na ũthyũ waku kũkindĩlĩĩla maũndũ kwa nzĩa ĩkwonany’a maumĩte ngoonĩ, na nũkwendeew’a nĩ ethukĩĩsya maku.
-
Sisya ethukĩĩsya maku. Sisya ethukĩĩsya maku metho ethĩwa ti ũthũku kwĩka ũu. Yĩla ũkumya ũvoo, sisya mũndũ ũmwe ũmwe kwa kavinda, vandũ va kũsisya kĩkundi kyonthe, kana o kũvĩtĩlya metho andũnĩ.
