Kwa Mũtavanyʼa wa Ũsumbĩ Mwendwa:

Kwasũanĩa wĩ ũmwe wa atũmwa ala maũngamĩte Kĩĩmanĩ kya Mĩthata, na Yesũ ayumĩla mbee wenyu. Ĩndĩ atanamba kwambata ĩtunĩ aimwĩa: “Mũkakwata vinya yĩla veva mũtheu wĩũka ĩũlũ wenyu, na mũkeethĩwa mwĩ ngũsĩ syakwa Yelusaleme, Yutia yonthe, na Samalia, na kũvika itulu sya nthĩ.” (Meko 1:8) We wĩthĩwa weekie ata?

Nĩvatonyeka ũkewʼa kĩu kĩ kĩanda kĩito mũno ũtatonya kwĩanĩsya. O na no wĩkũlye atĩĩ: ‘Vatonyeka ata twĩ kĩkundi kĩnini kya amanyĩwʼa kumya ũkũsĩ “kũvika itulu sya nthĩ”?’ O na noĩthwa ũtonya kũlilikana ũkanyʼo ũla Yesũ waumisye ũtukũ wake wa mũthya atanamba kũkwʼa. Aisye atĩĩ: “Ngombo tiyo nene kwĩ vwana wayo. Ethĩwa nĩmanthĩnisye, o nenyu makamũthĩnyʼa; ethĩwa nĩmakwatie ndeto yakwa, o na yenyu makamĩkwata. Ĩndĩ makamwĩka maũndũ asu onthe kwondũ wa ĩsyĩtwa yakwa, nũndũ maimwĩsĩ Ũla wandũmie.” (Yoa. 15:20, 21) Wĩ na ndeto isu kĩlĩkonĩ, no wĩkũlye, ‘Nĩtonya ata kumya ũkũsĩ mwĩanĩu yĩla ngũvĩngwa kana yĩla ngũthĩnwʼa?’

O na ũmũnthĩ nĩtwĩkũlasya makũlyo ta asu. O naitũ twĩ Ngũsĩ sya Yeova, nĩtũnengetwe wĩa wa kumya ũkũsĩ mwĩanĩu kũvika “itulu sya nthĩ” kwa “andũ ma mbaĩ syonthe.” (Mt. 28:19, 20) Ĩndĩ wʼo wĩa ũsu ũtonya kwĩanĩwʼa ata, o na kau nĩkwaathaniwe kana tũkavĩngwa?

Ĩvuku ya Meko ma Atũmwa yĩ na ngewa sya kũkiita ngoo mũno syonanĩtye ũndũ Yeova watetheeisye atũmwa na Aklĩsto ala angĩ ma ĩvindanĩ ya atũmwa meanĩsye kĩanda kyoo. Ĩvuku yĩĩ ũendeee kũsoma yĩseũvĩtwʼe nĩ kana yĩũtetheesye ũelewe ngewa isu nesa na ũitanĩa yĩla ũkũisoma. O na ĩngĩ, nũũsengʼa mũno woona ũndũ Aklĩsto ma ĩvindanĩ ya atũmwa makomanie na maũndũ mavwʼanene na ala athũkũmi ma Ngai ũmũnthĩ makomanaa namo. O na nũkwona ũndũ maũndũ asu makonanĩtye na wĩa wa kũtavanyʼa ũla tũtethasya na ũndũ twĩthĩawa tũvangĩtwe nĩ kana tũũtethye. Tũi na nzika kana kũvindĩĩsya maũndũ asu nĩkũũlũlũmĩlya mũĩkĩĩo waku kana Yeova Ngai nũendeee kũtongoesya kĩlungu kya ũseũvyo wake kya kũũ nthĩ.

Twĩĩkwatya kana kwĩmanyĩsya ĩvuku ya Meko ma Atũmwa nĩkũũlũlũmĩĩlya mũĩkĩĩo waku kana Yeova akaũtetheeasya na akatũmĩaa veva wake mũtheu kũũtwʼĩĩka. Twĩĩkwatya nũkwĩkĩwa vinya ũendeee ‘kumya ũkũsĩ mwĩanĩu’ ĩũlũ wa Ũsumbĩ wa Ngai na ũiendeea kũtetheesya angĩ makwate nzĩa ya ũtangĩĩo.—Meko 28:23; 1 Tim. 4:16.