ĨLA wasoma makaseti, wasisya televiseni, kana weethukĩĩsya letiũ, nĩwonaa na ũkew’a ũvoo mwingĩ wa ũtũli wa mĩao, kaũ, na ũng’endu. O naku mwene no wĩthĩwe ũithĩna nũndũ wa ũwau, kana kũkw’ĩĩwa nĩ mũndũ wendete.

Ĩkũlye atĩĩ:

• Yo Ngai endaa nyie na mũsyĩ wakwa twĩthĩwe na mathĩna ta asu?

• Ndonya ũkwata ũtethyo va wa kũmĩanĩsya na mathĩna?

• Ve ĩvinda kũkethĩwa na mũuo?

Mbivilia nĩtũnengete mosũngĩo maseo ma makũlyo asu.

• Andũ maikew’aa woo, maikakũaa, kana kũkw’a.—Ũvuan’yo 21:4

• ‘Mũndũ ũthuaa akatũlĩla ta ndaatai nũme.’—Isaia 35:6

• ‘Metho ma ililinda makasalukw’a.’—Isaia 35:5

•  Akw’ũ makathayũũkw’a.—Yoana 5:28, 29

• Vai mũndũ ũkawaa. —Isaia 33:24

• Kĩla mũndũ ĩũlũ wa nthĩ akeethĩwa na lĩu wĩanĩtye. —Savuli 72:16

Nĩ laisi kũsũanĩa kana maũndũ ala wasoma no ndoto itakeanĩa. Ĩndĩ Ngai nĩwathanĩte kwĩka moalyũku asu ĩũlũ wa nthĩ o mĩtũkĩ, na Mbivilia nĩeleetye ũndũ ũkeka ũu.

Mbivilia yĩ na maũndũ angĩ maingĩ. Nĩtũtavasya kĩla twaĩle kũmanya nĩ kana twĩthĩwe na ũtanu wa w’o na tũitanĩa thayũ. Kwasũanĩa ĩũlũ wa maũndũ ala matumaa wĩmakĩa. Amwe ma maũndũ asu nĩ ta mathĩna ma mbesa, mathĩna ma mũsyĩ, mowau, kana kũkw’ĩĩwa nĩ mũndũ wendete. Mbivilia nĩtonya kũũtetheesya ũmĩanĩsye na mathĩna asu, na nĩtonya kũũkiakisya kwa kũkwony’a mosũngĩo ma makũlyo ta aa:

• Nĩkĩ tũthĩnaa?

• Tũtonya kũmĩanĩsya na mathĩna ata?

• Mĩsyĩ yitũ no yĩthĩwe na ũtanu?

• Kwĩthĩawa ata ĩla andũ makw’a?

• Tũkamona ĩngĩ endwa maitũ ala makwie?

• Nĩ kyaũ kĩtonya kũtũĩkĩĩthya kana Ngai akeeka kyonthe kĩla wathanĩte?

 Kwĩmanyĩsya ĩvuku yĩĩ kwĩonany’a kana nũkwenda kũmanya kĩla Mbivilia ĩmanyĩasya. Ĩvuku yĩĩ nĩyĩũkũtethya. Yĩ na ilungu na makũlyo matonya ũkũtetheesya ũelewe Mbivilia nesa. Andũ milioni mbingĩ nĩmatanĩĩte kwĩmanyĩsya Mbivilia na Ngũsĩ sya Yeova. Twĩĩkwatya o naku nũũtanĩa. Ngai nakũathime ĩla ũendeee kũmanya kĩla Mbivilia ĩmanyĩasya!